Read Oshindonga-Ombiimbeli Ondjapuki JOSUA 24 Bible Online

JOSUA 24 - Oshindonga-Ombiimbeli Ondjapuki bible

JOSUA 24

¹Josua okwa gongele omazimo agehe gaIsrael puShekem. Okwi ithana aakuluntu, aawiliki, aatokolihapu naambala yaIsrael, oyo noya holoka miipathi yaKalunga.

²Josua okwa ti koshigwana ashihe: “Omuwa Kalunga kaIsrael ota ti: ‘Nalenale oohokulu oya li ya kala handiyaka yomulonga Eufrat noya simaneke iikalunga. Gumwe gwawo oTera, he yaAbraham naNahor.

³Nena onda kutha hokulu Abraham handiyaka yaEufrat nonde mu enditha a taakana evi alihe lyaKaanan. Onde mu pe oluvalo olwindji. Onde mu pe Isak,

⁴naIsak onde mu pe Jakob naEsau. Esau onde mu pe evi lyokoondundu dhaEdom, li ninge eliko lye, ihe hokulu Jakob noyana oya yi kuEgipiti.

⁵Konale onda ka tuma Moses nAaron nonda tumine Egipiti uudhigu uunene. Ihe onde mu tembudha mo.

⁶Onda tembudha oohokulu muEgipiti, nAayegipiti oye ya landula nomatembakwiita naakawilinkambe. Ihe oohokulu sho ye ya pEfuta etiligane,

⁷oya kugile ndje onkugo, ndi ya kwathe, nonda tula omilema pokati kawo nAayegipiti. Onda wayulile Aayegipiti efuta nonde ya li omeya. Omu shi shi shoka nda ningile Aayegipiti. “ ‘Omwa kala mombuga ethimbo ele.

⁸Nena onde mu eta mevi lyAayamori, mboka ya kala kuuzilo waJordan. Oye mu kondjitha, ihe onde ye mu sinditha. Omwa kutha po evi lyawo, nonde ya yonagula po komeho geni.

⁹Nena omukwaniilwa gwaMoab, Balak yaZippor, okwe mu kondjitha. Okwa tumu elaka kuBileam yaBeor, e mu thinge.

¹⁰Ihe ngame inandi pulakena nando Bileam, onkee okwe mu yambeke, nonde mu yululula kuBalak.

¹¹Omwa tokola Jordan nomwe ya kuJeriko. Aalumentu yaJeriko oye mu kondjitha, ngashika wo Aayamori, Aaperesi, Aakaanana, Aaheti, Aagirgashi, Aahevi nAayebusi. Ihe onde ye mu sinditha ayehe.

¹²Onda tumu omambonzi ge mu tetekele noga tidha po aakwaniilwa mbeyaka yaali Aayamori. Shika inashi ningwa komagongamwele geni nokomatati geni.

¹³Onde mu pe evi ndyoka inaamu li kokola, niilando mbyoka inaamu yi tunga. Ngashingeyi omo mu li tamu li omandjembele gomiviinu ndhoka inaamu dhi tsika, nomu na ooholivi dhomiti inaamu dhi kuna.’ ”

¹⁴Josua okwa tsikile: “Ngashingeyi nduno simanekeni Omuwa noku mu longela mevuliko nomuudhiginini. Mangulukeni kiikalunga mbyoka oohokulu ye yi simaneke muMesopotamia nomuEgipiti, mu longele Omuwa awike.

¹⁵Ngele inamu hala okulongela Omuwa, tokoleni nena ndjika ngoka tamu longele; ongele iikalunga yoohokulu yomuMesopotamia nenge mbyoka yAayamori mboka mwa kala mevi lyawo. Ihe ngame negumbo lyandje, tse otatu longele Omuwa.”

¹⁶Oshigwana osha yamukula: “Katu na mpoka tatu etha Omuwa, tse tu longele iikalunga.

¹⁷Omuwa Kalunga ketu okwa tembudha ootate natse muupika womuEgipiti, otse notwa mono iinyengandunge mbyoka a ningi. Oye e tu gamene shaa mpoka twa yi mokati kiigwana ayihe mbyoka twa pitilile.

¹⁸Sho twe ya mevi ndika, Omuwa okwa tidha po Aayamori ayehe ya kala mpaka. Onkee natse wo otatu longele Omuwa, oshoka oye Kalunga ketu.”

¹⁹Josua okwa ti koshigwana: “Ihe itamu vulu okulongela Omuwa, oye Kalunga omuyapuki noita dhimi po oondjo dheni. Ita vulu okwiidhidhimikila ookalunga yalwe,

²⁰nongele tamu mu etha, mu longele iikalunga yiigwana mbyoka, nena ote mu pilukile e te mu geele. Ote mu thekeke po, nonando okwa li nale omwaanawa kune.”

²¹Oshigwana osha ti kuJosua: “Aawe! Otatu longele Omuwa.”

²²Josua okwa ti kuyo: “One oonzapo kune yene moshinima shika, sho mwa hogolola okulongela Omuwa.” Oya yamukula ya ti: “Eeno, osho tu li.”

²³Okwa ti: “Etheni nduno iikalunga yiigwana mbyoka, ne mu igandje mevuliko kOmuwa, Kalunga kaIsrael.”

²⁴Oshigwana osha yamukula Josua: “Tse otatu longele Omuwa Kalunga ketu. Otatu vulika kiipango ye.”

²⁵Onkee esiku ndyoka Josua okwa ningi ehangano noshigwana nokwe ya pele muShekem iipango nomautho, ye ga landule.

²⁶Josua okwa nyola iipango mbika membo lyompango yaKalunga. Nena okwa kutha emanya enene e te li dhike momwandi gwopuuyapuki wOmuwa.

²⁷Okwa ti koshigwana ashihe: “Emanya ndika otali kala onzapo yetu. Olyu uvu oohapu adhihe ndhoka Omuwa e dhi tu lombwele. Olyo onzapo yoku mu pangula, ngele otamu tukulile Kalunga keni oshipotha.”

²⁸Nena Josua okwa laleke oshigwana, noya shuna kehe gumwe koshitopolwa shezimo lye.

²⁹Konima yaambika omumati gwOmuwa Josua yaNun okwa sile muukulupe wepipi lyomimvo ethele nomulongo.

³⁰Oye mu fumvike mevi lye mwene puTimnat Sera mevi lyokoondundu dhaEfraim kuumbangalantu wondundu Gaash.

³¹Josua manga a li e na omwenyo, oshigwana shaIsrael osha longele Omuwa. Osho sha li pethimbo lyaawiliki ayehe mboka ya li ya mono yo yene shoka Omuwa e shi ningile Israel.

³²Iipongo yaJosef, mbyoka Aaisraeli ye yi etelele okuza nayo kuEgipiti, oye yi fumvike puShekem, meyana ndyoka Jakob e li landele niimaliwa yiisiliveli ethele limwe kaana yaHamor, he yaShekem. Eyana ndika olya ningi eliko lyoluvalo lwaJosef.

³³Eleasar lyAaron okwa mana oondjenda nokwa fumvikwa puGibea, oshilando shomevi lyokoondundu dhaEfraim shoka sha adhika sha pewa omwana Pinehas.