Read Oshindonga-Ombiimbeli Ondjapuki JOSUA 3 Bible Online

JOSUA 3 - Oshindonga-Ombiimbeli Ondjapuki bible

JOSUA 3

¹Josua noshigwana ashihe shaIsrael oya meneka ongula onene, ya zi montanda yaShittim noya yi kuJordan, nkoka ya yungu ontanda, ya tegelele okutokola omulonga.

²Konima yomasiku gatatu aawiliki oye ende nontanda

³noya lombwele aantu ya ti: “Shimpa mwa mono aayambi ya humbata oshikethahangano shOmuwa Kalunga keni, zii mo montanda, mu ya landule.

⁴Otaye mu kwatele komeho, oshoka ondjila kamu yi shi. Ihe omu na okukala kokule noshikethahangano, tu tye oshinano shi thike pokilometa yimwe.”

⁵Josua okwa lombwele oshigwana a ti: “Iyapuleni, oshoka ngula Omuwa ota ka longa iikumithalonga mokati keni.”

⁶Nena okwa lombwele aayambi, ya kuthe oshikethahangano, ya tetekele nasho komeho gaantu. Oyo noya ningi, ngaashi ya lombwelwa.

⁷Omuwa okwa ti kuJosua: “Shoka tandi ningi nena, otashi ku simanekitha kAaisraeli ayehe, u ninge omuntu omunene, notaa dhimbulula kutya ondi li nangoye, ngaashi nda li naMoses.

⁸Lombwela aayambi taa humbata oshikethahangano kutya nge ya adha omulonga, oye na okuthikama popepi nomunkulo.”

⁹Nena Josua okwa ti kAaisraeli: “Ileni, mu pulakene shoka Omuwa Kalunga keni ta ti.

¹⁰Ngele tamu humu komeho, ote ke mu tidhila po Aakaanana, Aaheti, Aahevi, Aaperesi, Aagirgashi, Aayamori nAayebusi. Otamu ka tseya kutya Kalunga omunamwenyo oku li mokati keni,

¹¹sho oshikethahangano shOmuwa gwevi alihe tashi tokola Jordan komeho geni.

¹²Ngashingeyi hogololeni aalumentu omulongo nayaali, gumwe mezimo kehe lyaIsrael.

¹³Shimpa tuu aayambi mboka taa humbata oshikethahangano shOmuwa gwevi alihe, taa lyata oompadhi dhawo momeya, nena Jordan otagu kankama okukunguluka, nomeya ngoka taga zi kombanda, otaga gongala peha limwe.”

¹⁴Ethimbo olya li lyeteyo, nomulonga ogwa li gu na efundja. Aantu sho ya zi montanda, ya tokole Jordan, aayambi oye ya tetekelele ya humbata oshikethahangano. Naanziya sho aayambi ya lyata omeya,

¹⁶omeya oga mwena okumatuka noga gongala puAdam, oshilando shi li pooha dhaSaretan. Ekunguluko lyokuuka kEfuta lyeso olya li lya tokolwa thilu; Aaisraeli oya vulu okupita popepi naJeriko.

¹⁷Manga taa ende puukukutu, aayambi mboka ya humbata oshikethahangano, oya li ya thikama puukukutu pokati kaJordan, sigo oshigwana ashihe sha piti.