Read Oshindonga-Ombiimbeli Ondjapuki JOSUA 5 Bible Online

JOSUA 5 - Oshindonga-Ombiimbeli Ondjapuki bible

JOSUA 5

¹Aakwaniilwa ayehe yAayamori kuuninginino waJordan naakwaniilwa ayehe yAakaanana komunkulo gwEfuta lyopokati oyu uvu kutya Omuwa okwa pwinike omeya gaJordan, sigo oshigwana shaIsrael she gu tokola. Oya sholola e taa tyololoka molwAaisraeli.

²Nena Omuwa okwa lombwele Josua ta ti: “Longekidha iimbele yomamanya, u kenke nayo Aaisraeli ishewe.”

³Josua okwa ningi, ngaashi Omuwa e mu lombwele e ta kenkele Aaisraeli pehala lya lukwa Oshikulundundu shefukaleko.

⁴Oshigwana shaIsrael sho sha zi muEgipiti, aalumentu ayehe oya li ya fukalekwa nokuli. Ihe momukokomoko gwondjila yomombuga omimvo omilongo ne oya li yi ipyakidhila nolweendo, onkee uunona wuumati owa li inaau fukalekwa. Ishewe, pethimbo ndyoka aalumentu ayehe yepipi lyokuhinga iita sho ya zi muEgipiti, oya li ya hulu po kokusa, oshoka oya li inaa vulika kOmuwa. Ngaashi naanaa a li e ya ganene, inaa pitikwa okumona evi ndyoka eyamba noli na omalunza, ngaashi e shi uvanekele oohekulu.

⁷Oyanamati yaantu mbaka oya li inaa fukalekwa, ano oluvalo nduka olupe olwo aluke lwa fukalekwa kuJosua.

⁸Konima yefukaleko oshigwana ashihe osha kala montanda, sigo iilalo ya polo nawa.

⁹Omuwa okwa ti kuJosua: “Onena tuu ndjika onde mu pengitha omupya gwokukala aapika muEgipiti.” Onkee eha ndyoka lya lukwa Gilgal, nosho li li sigo onena.

¹⁰Manga Aaisraeli ya li montanda puGilgal, polushandja ontega naJeriko, oya dhana Opaasa ongulohi yesiku etimulongo netine lyomwedhi ngoka.

¹¹Esiku lya landula ko olya li esiku lyotango, sho ya tameke okulya iikulya yomuKaanan, iikwiila inaayi fulikwa nomaha giilya ga yaywa.

¹²Omanna oga sheka okuloka nduno, Aaisraeli inaye ga mona we. Okuza kesiku ndyoka oya li iikulya yomuKaanan.

¹³Josua manga a li popepi naJeriko, ohaluka oku wete omulumentu a thikama komeho ge a yelutha egongamwele. Josua okwa yi kuye e te mu pula: “Ngoye omukwiita omukwetu nenge ogwaatondi yetu?”

¹⁴Omulumentu okwa ti: “Aawe, ngame ondjayi yiita yOmuwa.” Josua okwi ihata pevi koshipala she e te mu simaneke ta ti: “Ngame omupiya gwoye, tatekulu. Owa hala, ndi ninge shike?”

¹⁵Ondjayi yiita yOmuwa oya ti kuye: “Hula ko oongaku dhoye, oshoka owa thikama peha eyapuki.” Josua nokwa ningi, ngaashi a lombwelwa.