Read Oshindonga-Ombiimbeli Ondjapuki JOSUA 8 Bible Online

JOSUA 8 - Oshindonga-Ombiimbeli Ondjapuki bible

JOSUA 8

¹Omuwa okwa lombwele Josua a ti: “Kutha aakwiita ayehe, u ye nayo kuAi. Ino tila ngoye ino tyololoka. Otandi ke ku pa esindano lyokusinda omukwaniilwa gwaAi; aantu ye, oshilando nevi otayi ningi yeni.

²Ai nomukwaniilwa gwasho oto mu ningi, ngaashi wa ningi Jeriko nomukwaniilwa gwasho, ihe nena otamu ka likola iinima niimuna. Longekidha, u matukile oshilando ombaadhilila kosindo yasho.”

³Josua okwa pyakudhukwa okuya kuAi pamwe naakwiita ye ayehe. Okwa kutha po aakwiita ya pyokoka omayuvi omilongo ndatu e te ya tumu uusiku

⁴nelaka ndika: “Holameni kombinga ndjiya yoshilando, ihe hakokule unene; ilongekidheni oku ya matukila.

⁵Aantu yandje nangame otatu ki ikokela moshilando. Shimpa Aayai ya zi mo taye tu matukile, otatu finyuka tatu fadhuka po, ano ngaashi twe shi ningi moshikando shotango.

⁶Otaye ke tu tidha, sigo twe ya heke okuza ko koshilando. Otaa ka dhiladhila kutya otatu ya yi ontuku, ngaashi twa ningile nale.

⁷Nena ne otamu hololoka mo miilangela yeni e tamu kwata po oshilando. Omuwa Kalunga keni ote ke shi mu pa.

⁸Shimpa mwa kwata po oshilando, shi tomekeni omulilo, ngaashi Omuwa a ti. Omalombwelo ogo ngaka.”

⁹Josua okwe ya tumu e taa yi kiilangela pokati kaAi naBetel, kuuninginino waAi, noya tegelele nkoka. Josua okwa tokelwa uusiku mboka montanda.

¹⁰Ongulangula Josua okwa penduka e ta gongele aakwiita. Oye naawiliki yaIsrael oye ya kwatele komeho okuya kuAi.

¹¹Aakwiita pamwe naye oya yi popepi noshilando e taa yungu ontanda kuumbangalantu washo. Pokati kawo naAi opwa li olusilu.

¹²Josua okwa kutha konyala aalumentu omayuvi gatano e te ya holeke kuuninginino woshilando, pokati kaAi naBetel.

¹³Aakwiita oya longekidhilwa olugodhi. Ontanda onene oya li kuumbangalantu woshilando noshihupe shaakwiita osha li kuuninginino washo. Josua okwa tokelwa molusilu uusiku mboka.

¹⁴Omukwaniilwa gwaAi sho a mono aantu yaJosua, oku uluma. Oye naantu ye oya hwanuka yu ukilila olusilu lwaJordan, ya ka kondje nAaisraeli, ngaashi ya ningile nale. Oya li inaa tseya kutya otaa vulu okumatukilwa okuza konima.

¹⁵Josua naantu ye oya shuna ya fa taa yi ontuku noya fadhuka po yu uka kombuga.

¹⁶Aalumentu ayehe yomoshilando oya lombwelwa, ye ke ya landule. Sho ya tidha Josua, oya yi kokule kashona noshilando.

¹⁷Aalumentu ayehe yomuAi nenge Betel, oya ka tidha Aaisraeli; moshilando inamu kala we omupopili.

¹⁸Nena Omuwa okwa ti kuJosua: “Ganeka egonga lyoye kuAi, otandi shi ku pe.” Josua okwa ningi, ngaashi a lombwelwa.

¹⁹Ohaluka sho a yelutha oshikaha she, aalumentu mboka ya li ya holama, oya hituluka mo mbala e taa yi moshilando e taye shi kwata po. Ohaluka oye shi tomeke omulilo.

²⁰Aalumentu yomuAi sho ya tala konima, oya mono olwithi lwa tsinagala kegulu. Kaya li we ye na ompito yokuhenuka, oshoka Aaisraeli mbeyaka ya li yu uka lwokombuga, oya piluka, opo ye ya homone.

²¹Josua naakwiita ye sho ya mono kutya yakwawo mbeya oya kwata po oshilando notashi tsinagala olwithi, oya piluka e taa dhipaga aalumentu yaAi.

²²Aaisraeli yomoshilando oye ya wo kolugodhi. Aalumentu yaAi oya dhimbulula kutya oya kondekwa kAaisraeli, noya dhipagwa ayehe. Inapu za nando ondhi po inapu kala ngoka e na omwenyo,

²³shila omukwaniilwa gwaAi, okwa kwatwa nokwa falwa kuJosua.

²⁴Aaisraeli oya dhipaga kehe gumwe gwaatondi yawo meyalala kombuga, nkoka ye ya tidhile. Nena oya galukile ishewe kuAi e taa dhipaga ayehe.

²⁵Josua okwa kala a taganekela egonga lye kuAi noine li tenteka pohi, manga aantu ayehe inaaya pwa po okudhipagwa. Oshigwana ashihe shaAi osha dhipagwa esiku ndyoka — aalumentu naakiintu omayuvi omulongo nagaali.

²⁷Aaisraeli oyi ihupithile iimuna niinima mbyoka ya hakana moshilando, ngaashi Omuwa a lombwele Josua.

²⁸Josua okwa fike po Ai e te shi lokotitha po ashihe. Osha ningi eputu nosho shi li sigo onena.

²⁹Okwa mangeleke omukwaniilwa gwaAi komuti okusa e te ethele omudhimba gwe nkoka sigo ongulohi. Peningino lyetango Josua okwa lombwele, omudhimba gu kuthwe ko, nogu umbilwa posheelo shoshilando. Oye gu siikile nondumba yomamanya, ndjoka tayi monika natango nkoka.

³⁰Josua okwa tungile Omuwa, Kalunga kaIsrael, oshiyambelo kondundu Ebal.

³¹Okwe shi tungu pamaudhikilo ngoka Moses, omumati gwOmuwa, e ga pe Aaisraeli, ngaashi tashi popiwa mompango yaMoses taku tiwa: “Oshiyambelo nashi kale shomamanya inaaga hongwa niiyela.” Oya yambele ko Omuwa omafikilondjambo noye mu etele omakwatathanondjambo.

³²Josua okwa kutha emanya e li hongo montaneho yAaisraeli e ta nyola mo oohapu dhompango yaMoses.

³³Aaisraeli pamwe naawiliki yawo, aambala naatokolihapu naakwiilongo mboka ya li mokati kawo, oya li ya thikama koombinga noombinga dhoshikethahangano ya tongolola aayambi Aalevi mboka ye shi humbata. Etata limwe lyaantu oya li ya thikama ya pilamena kondundu Garizim, manga etata limwe lya thikama lya pilamena kondundu Ebal. Omumati gwOmuwa Moses okwe ya lombwelele, ya ninge ngeyi, ngele ethimbo lyeyambeko lyawo lya thiki.

³⁴Josua okwa lesha mokule ompango ayihe mwa kwatelelwa omayambeko nomatulomutima, ngaashi naanaa sha nyolwa membo lyompango.

³⁵Oshipango kehe shaMoses osha leshwa kuJosua pokugongala kwaayehe, nkoka kwa kwatelele mo aakiintu naanona nosho wo aakwiilongo mboka ya kala mokati kawo.