Read Oshindonga-Ombiimbeli Ondjapuki JOSUA 9 Bible Online

JOSUA 9 - Oshindonga-Ombiimbeli Ondjapuki bible

JOSUA 9

¹Omasindano gaIsrael oga tseyika kaakwaniilwa ayehe ya li kuuninginino waJordan — koondundu, kiikulundundu yoponyonga yadho nokombinga ayihe yomunkulo gwEfuta lyopokati, sigo okuLibanon kuumbangalantu. Mbaka oyo aakwaniilwa Aaheti, Aayamori, Aakaanana, Aaperesi, Aahevi nAayebusi.

²Oya gongala kumwe, ya hangane okukondjitha Josua nAaisraeli.

³Ihe aantu yomuGibeon, mboka ya li Aahevi, sho yu uvu, Josua nkene a ningile Jeriko naAi,

⁴oya tokola, ye mu kotokele. Oya yi niikulya yimwe ye yi londeke kuusino nomahahi omakulu noompunda dhomaviinu dha andekwa.

⁵Oya zala oonguwo dha kulupa noongaku oonkulu dha andekwa. Iikwiila yawo oya li ya kukuta noyi na oshushi.

⁶Oya yi kontanda kuGilgal taa ti kuJosua nokaalumentu yaIsrael: “Otwa zi koshilongo shokokule; otwa hala, mu ninge euvaneno natse.”

⁷Ihe aalumentu Aaisraeli oya ti: “Omolwashike tu na okuninga euvaneno nane? Mwa fa ngaa mu li popepi mpoka.”

⁸Oyo ya ti kuJosua: “Tse aapiya yoye.” Josua okwe ya pula: “One oolye notamu zi peni?”

⁹Oyo ye mu hokololele ya ti: “Otatu zi kevi lyokokule, tatekulu, oshoka otwa kundana Omuwa Kalunga keni. Otu uvu ayihe mbyoka a ningi muEgipiti.

¹⁰Naashoka a ningile aakwaniilwa yaali yAayamori kuuzilo waJordan: omukwaniilwa Sihon gwaHeshbon nomukwaniilwa Og gwaBaasha, mboka ya kala muAshtarot.

¹¹Aawiliki yetu naantu ayehe moshilongo shetu oye tu lombwele, tu kuthe iikulya yimwe, tu idhenge mondjila, tu ye tu ku tsakaneke. Otwa lombwelwa, tu ninge aayakuli yoye noku ku pula, u ninge euvaneno natse.

¹²Tala kiikwiila yetu. Sho twa zi kegumbo, tu ye tu ku tsakaneke, oya li ya pupyala. Ihe yi tala ngashingeyi! Oya kukuta noyi na oshushi.

¹³Sho tu udha oompunda ndhika dhomaviinu, odha li oompe, ihe ngashingeyi odha kulupa. Oonguwo dhetu noongaku dhetu odha kulupile mondjila onde.”

¹⁴Aalumentu Aaisraeli oya taamba kuyo iikulya yimwe, ihe inaa pula nando omayele kOmuwa moshinima shika.

¹⁵Josua okwa ningi euvaneno lyombili naantu yomuGibeon e te ya pitika, ya kale ye na omwenyo. Aawiliki yAaisraeli oye shi koleke nokugana.

¹⁶Omasiku gatatu sho ga piti po okuza keuvaneno, Aaisraeli oya koneke kutya nani aantu mbaka oya zi popepi.

¹⁷Onkee Aaisraeli oya thikama nokonima yomasiku gatatu oya thiki kiilando yawo: Gibeon, Kefira, Beerot naKiriat Jearim.

¹⁸Ihe Aaisraeli inaye ya dhipaga, oshoka aawiliki oya adhika ya ninga naantu mbaka euvaneko lyokwakola medhina lyOmuwa, Kalunga kaIsrael. Aantu ayehe oye shi nyenyetele kaawiliki,

¹⁹ihe mbaka oya yamukula: “Otse twe ya pe euvaneko lyokwakola medhina lyOmuwa Kalunga kaIsrael. Onkee itatu vulu oku ya ninga nayi.

²⁰Otu na oku ya etha, ya kale ye na omwenyo omolweuvaneko lyetu; ngele itatu shi ningi, nena Kalunga ote tu geele.

²¹Naa kale ye na omwenyo, ihe oye na okutyaya iikuni noku tu tekela omeya.” Osho aawiliki ya tokola omolwawo.

²²Josua okwi ithanitha aantu yomuGibeon, ye ye kuye, nokwe ya pula: “Omolwashike tamu tu kotokele noku tu lombwela kutya omwa zi kokule, nando omu li popepi natse?

²³Molwashoka mwa ningi ngeyi, Kalunga okwe mu tokola. Oshigwana sheni otashi ka kala aluhe oshipika, aatyayi yiikuni naateki yomeya gomotempeli yaKalunga kandje.”

²⁴Oya yamukula ya ti: “Shika otwe shi ningi, tatekulu, oshoka otu uvile kutya Omuwa Kalunga koye okwa li a lombwele omumati gwe Moses, e mu pe evi ndika alihe nokudhipaga aantu ayehe mondjila yeni. Otwe shi ningi, oshoka otwa li twe mu tila nokutya otamu tu dhipaga.

²⁵Ngashingeyi otu li miikaha yoye; tu ninga shoka she ku opalela noshu uka.”

²⁶Josua osho a ningi. Okwe ya gamene noina zimina, Aaisraeli ye ya dhipage.

²⁷Ihe okwe ya ningi aapika yokutyaya iikuni nokuteka omeya gAaisraeli nogoshiyambelo shOmuwa. Sigo ongashingeyi oya tsikile okulonga mbika meha ndyoka Omuwa a hogolola, a simanekelwe mo.