Read Oshindonga-Ombiimbeli Ondjapuki 2 AATESSALONIKA 1 Bible Online

2 AATESSALONIKA 1 - Oshindonga-Ombiimbeli Ondjapuki bible

2 AATESSALONIKA 1

¹Ontumwafo ndjika oya zi kuPaulus, Silvanus naTimoteus. Oya nyolelwa egongalo lyomuTessalonika, lyaantu yaKalunga Tate noyOmuwa Jesus Kristus.

²Silweni ohenda ne mu kale mu na ombili yaKalunga Tate noyOmuwa Jesus Kristus.

³Aamwameme, tse otu na okuhambelela Kalunga aluhe omolweni. Osho opala, tu shi ninge, oshoka eitaalo lyeni otali koko nohole yeni yokuholathana otayi indjipala noonkondo.

⁴Onkee ano tse momagongalo gaKalunga ohatu itanga molweni. Tse otatu mu itangele, sho hamu idhidhimike nomwa dhiginina eitaalo momatidhagano nomomahepeko ngoka hage mu adha.

⁵Shika otashi holola kutya epangulo lyaKalunga olyo eyuuki, oshoka kehulilo lyaambika ayihe, Kalunga ote ke mu ninga mwoopalela Oshilongo she, shoka tamu shi hepekelwa.

⁶Oshoka Kalunga oha longo shoka shu uka; ota ka galulila omahepeko kombanda yaamboka ya li ye mu hepeke,

⁷no te ke mu pa evululuko pamwe natse. Oye ote ke shi ninga, uuna Omuwa Jesus ta ka za megulu pamwe naayengeli ye aanankondo.

⁸Oye ote ke ya momulilo gwa hwama okugeela mboka inaa tseya Kalunga naamboka inaa vulika kelaka etoye tali popi Omuwa gwetu Jesus.

⁹Oyo otaa ka adhika kegeelo lyehanagulo lyaaluhe, ndyoka tali ke ya kaleka kokule naKalunga nonesimano lyoonkondo dhe.

¹⁰Ihe aantu ye otaye ke mu hambelela nooitaali ayehe otaye mu tanga esiku ndyoka te ya. Nena nane wo otamu ka kala mongundu yawo, oshoka omwi itaala elaka ndyoka twe li mu uvithile.

¹¹Onkee ano tse ohatu mu galikanene aluhe. Otatu galikana Kalunga, e mu ukithe paithano ndyoka e mu ithanena. Oye ne mu pe oonkondo nehalo lyokulonga uuwanawa nolyokutsakanitha iilonga yeni yomeitaalo.

¹²Osho ngeyi mokusimaneka edhina lyOmuwa gwetu Jesus naye wo ote ke mu simaneka omolwesilohenda lyaKalunga ketu nolyOmuwa Jesus Kristus.