Read Oshindonga-Ombiimbeli Ondjapuki 2 AATESSALONIKA 3 Bible Online

2 AATESSALONIKA 3 - Oshindonga-Ombiimbeli Ondjapuki bible

2 AATESSALONIKA 3

¹Hugunina, aamwameme, tu galikaneneni, opo oohapu dhOmuwa dhi taandele mbala nodhi simanekwe, ngashika naanaa mokati keni.

²Galikaneni wo, Kalunga e tu hupithe maantu aadhudhu naawinayi, oshoka haantu ayehe yi itaala elaka lye.

³Ihe Omuwa oye omwiinekelwa, oye ote mu koleke e te mu gamene kuuwinayi.

⁴Omuwa ne tu pe einekelo mune. Otu shi shi kutya ohamu longo, ngaashi twe mu lombwele, notamu ke shi ninga nokomeho.

⁵Omuwa na thikithe oomwenyo dheni mohole yokuhola Kalunga nomeidhidhimiko lyaKristus.

⁶Aamwameme, otatu mu lombwele medhina lyOmuwa Jesus Kristus: Ikalekeni kokule naantu mboka inaa hala okulonga sha noitaa landula omakumagidho getu.

⁷Ne omwa tseya nawa kutya omu na okulonga, ngaashi twe mu pe oshiholelwa. Tse inatu kala aananyalo mokati keni.

⁸Inatu taamba nando okulya iikwatha yasha inaatu yi futila. Ihe otwa longo nokwiihepeka uusiku nomutenya, opo twaa etele nando ogumwe gwomune uupyakadhi.

⁹Shika inatu shi ninga ando, sho twaa na epitikilo lyokukala tatu kwathwa kune, ihe otwe shi ningi, opo tu mu pe oshiholelwa.

¹⁰Sho twa li pune, otwe mu lombwele tatu ti: “Ngoka inaa hala okulonga, ina ethiwa a lye.”

¹¹Otatu popi ngeyi, oshoka otu uvu kutya mokati keni omu na aantu aananyalo inaa hala okulonga sha, ihe oye na owala ethimbo lyokwiitula miinima yayakwawo.

¹²Medhina lyOmuwa Jesus Kristus otatu ganda nokukumagidha aantu ya tya ngeyi, naa kale ya ngungumana e taa longo, yi imonene iipalutha.

¹³Aamwameme inamu vulwa okulonga uuwanawa.

¹⁴Otashi vulika ku na gumwe ngoka inaa hala okuvulika kelaka ndyoka twe mu tumine montumwafo ndjika. Ngele oku na omuntu a tya ngaaka, mu konekeni ne inamu endathana naye, opo a se ohoni.

¹⁵Ihe inamu mu tala omutondi gweni, ihe mu pukululeni ongomumwanyoko.

¹⁶Omuwa ngoka oluthithiya lwombili yetu, ne mu pe aluhe ombili pamikalo adhihe. Omuwa na kale pamwe nane amuhe.

¹⁷Otandi nyola ngeyi noshikaha shandje mwene: Omakundo ga zi kuPaulus. Nguka ogwo omukalo gwandje gwokushaina ontumwafo kehe; osho handi nyola ngaaka.

¹⁸Esilohenda lyOmuwa gwetu Jesus Kristus nali kale nane amuhe.