Read Oshindonga-Ombiimbeli Ondjapuki 1TIMOTEUS 1 Bible Online

1TIMOTEUS 1 - Oshindonga-Ombiimbeli Ondjapuki bible

1TIMOTEUS 1

¹Ontumwafo ndjika oya zi kuPaulus, omuyapostoli gwaJesus Kristus, opalombwelo lyaKalunga, omuhupithi gwetu, nolyaJesus Kristus, etegameno lyetu.

²Oya nyolelwa Timoteus, omumwandjelela meitaalo. Esilohenda, ontalanteni nombili yaKalunga Tate noyOmuwa gwetu Jesus Kristus nayi kale nangoye.

³Sho nda li mondjila yokuuka kuMakedonia, onda li nde ku lombwele kutya onda hala u kale muEfeso, opo u indike aantu mboka ye li mo taa longo omalongo ga puka.

⁴Ya lombwela ano, ye ethe po oongano dhawo nomukalo gwawo gwokusimaneka oondjokonona dhomadhina goohekulu, oshoka iinima ya tya ngeyi otayi eta owala omaludhi. Oyo inayi opalela edhiladhilo lyaKalunga, ndyoka tali tseyika mokwiitaala.

⁵Elalakano lyekumagidho ndika olyo oku ya penduthila ohole tayi zi momwenyo gwa yela, meiyuvo ewanawa nomeitaalo lyashili.

⁶Aantu yamwe oya za mo miinima mbika e tayi ipukitha nomapopyagano guugoya.

⁷Oyo oya hala okukala aalongi yompango yaKalunga, nando kaa uvite ko shoka taa popi naashoka taa ludhike.

⁸Tse otu shi shi kutya ompango oyo ombwanawa, ngele tayi longithwa pamukalo ngoka yi na okulongithwa.

⁹Otu na okutseya kutya oompango ihadhi ningilwa aantu mboka haa longo uuwanawa, ihe aayoni naakolokoshi, aakeenakonasha naKalunga naalunde, mboka kaaye na eiyapulo nuukwambepo, aadhipagi yoohe nooyina nosho wo aadhipagi yalwe,

¹⁰aahondeli, omashenge naalali nomashenge, aayakipo yaantu, aafundja naamboka haa gana iifundja nenge haa ningi shoka inaashi tsa kumwe nelongo ndyoka lyu uka.

¹¹Elongo lyu uka otali monika mevaangeli ndyoka nde li pewa, ndi li uvithe, elaka etoye lya zi kuKalunga keadhimo nomulalekwa nuuyamba.

¹²Ngame otandi hambelele Jesus Kristus, Omuwa gwetu, sho a pe ndje oonkondo dhokulonga oshilonga shandje. Otandi mu hambelele, sho a tala ndje kutya otandi vulu oku mu longela, e ta tula ndje miilonga ye,

¹³nando ngame onda li nale handi mu popi nayi, nde mu tidhagana nonde mu sheke. Ihe Kalunga okwa sile ndje ohenda, oshoka onda li inaandi itaala nokanda li ndi shi wo shoka te ningi.

¹⁴Omuwa gwetu okwa hololele ndje esilohenda lye lya gwanenena nokwa pe ndje eitaalo nohole mbyoka tu yi na muukumwe naKristus Jesus.

¹⁵Ohapu ndjika oyoshili noyi shilela okutaambwa nokwiitaalwa: Jesus Kristus okwe ya muuyuni, a hupithe aalunde, nangame omulunde omunene ndi vule aalunde ayehe.

¹⁶Onda hala ndi tye: Kalunga okwa sile ndje ohenda, opo Jesus Kristus a holole mungame komeho gaayehe eidhidhimiko lye alihe lyokwiidhidhimikila ndje. Ngame onda ningi oshiholelwa shaayehe mboka taye ke mu itaala, ya mone omwenyo gwaaluhe.

¹⁷Kalunga awike, omukwaniilwa gwaaluhe, ngoka kee na ehulilo noiha monika, na hambelelwe ye na simanekwe aluheluhe! Amen.

¹⁸Omumwandje Timoteus, otandi ku pe oshilonga shika shokukumagidha opahapu dhehunganeko ndyoka lyonale lye ku popi. Oohapu dhehunganeko ndyoka nadhi ninge omatati goye, u kondje ekondjo lya mana mo.

¹⁹Dhiginina eitaalo neiyuvo lya yela. Aantu yamwe inaa vulika keiyuvo lyawo, onkee oya teya omutenge gwolweendo lweitaalo lyawo.

²⁰Mongundu yawo omu na Himeneus naAleksander, mboka nde ya gandja miikaha yaSatana, opo shi ya longe, yaa sheke we Kalunga.