Read Oshindonga-Ombiimbeli Ondjapuki 1TIMOTEUS 2 Bible Online

1TIMOTEUS 2 - Oshindonga-Ombiimbeli Ondjapuki bible

1TIMOTEUS 2

¹Omakumagidho gandje ogo ngaka: Tangotango naku ningwe omaindilo, omagalikano, omagalikaneno nomahambelelo koshipala shaKalunga omolwaantu ayehe.

²Naku galikanenwe aakwaniilwa naapangeli ayehe, opo tu kale nokukala kwa ngungumana nokwombili mokusimaneka Kalunga akuhe nomikalo omiwanawa.

³Shika osho oshiwanawa nosho opalela Kalunga, omuhupithi gwetu,

⁴ngoka a hala, aantu ayehe ya hupithwe noya tseye oshili.

⁵Oshoka Kalunga ogumwe awike, naangoka a hanganitha aantu naKalunga, ogumwe, omuntu Jesus Kristus,

⁶ngoka i igandja, a ninge iikulila yaantu ayehe. Shika osha ningwa pethimbo lyo opala, oshoka Kalunga okwa li a hala aantu ayehe ya hupithwe.

⁷Onkee ano ngame onda tumwa, ndi ninge omuyapostoli nomulongi mokati kaapagani nondi uvithe elaka tali popi eitaalo noshili. Otandi popi oshili, ite fundju.

⁸Onda hala, aalumentu ya galikane akuhe nokuyelutha omaako gawo pombanda yaa na uutondwe nomalimbililo.

⁹Onda hala wo, aakiintu ya dhiladhile nawa kombinga yomizalo dhawo, yo ya zale oonguwo dhi shi kutalwa nodha yogoka. Inaa panda omafufu ya zalekwe oombandi dhiingoli nomagwe taga adhima nenge oonguwo dhi na ondilo.

¹⁰Peha lyaambika kaleni mu udha iilonga iiwanawa, ngaashi sho opalela aakiintu ooitaali.

¹¹Melongelokalunga aakiintu naa pulakene ya mwena nokuvulika kelandulathano.

¹²Ngame itandi pitika, aakiintu ya ninge aalongihapu nenge ya pangele aalumentu, ihe naa kale ya mwena.

¹³Oshoka Adam oye a shitwa tango e taku landula ihe Eva.

¹⁴Adam haye a pukithwa, ihe omukiintu oye a pukithwa nokwa yono oshipango shaKalunga.

¹⁵Ano omukiintu ota ka hupithwa omolwokuvala uunona, ihe ongele ta dhiginine eitaalo, ohole yopakriste neiyapulo.