Read Oshindonga-Ombiimbeli Ondjapuki 1TIMOTEUS 4 Bible Online

1TIMOTEUS 4 - Oshindonga-Ombiimbeli Ondjapuki bible

1TIMOTEUS 4

¹Ombepo Ondjapuki ote shi popi sha yela kutya komasiku gokomeho aantu yamwe otaa ke etha eitaalo. Oyo otaa ka vulika koombepo dhiifundja notaa ka landula omalongo goompwidhuli.

²Omalongo ga tya ngeyi otaga zi maantu aanamakoto naafundja, oomboka ye na eiyuvo lya sa, ongolya fikwa noshiyela sha hanya.

³Aantu ya tya ngeyi ohaa indike okuhokana nosho wo okulya iikulya yontumba noyongandi. Ihe Kalunga okwa shiti iikulya mbika, yi liwe kooitaali nokumboka ya tseya oshili noku mu hambelela.

⁴Ashihe shoka sha shitwa kuKalunga, osho shiwanawa; inashi ekelwahi, ihe nashi taambwe nokuhambelela Kalunga.

⁵Oshoka oohapu dhaKalunga negalikano oyo tayi shi taambitha kuKalunga.

⁶Ngele to longo yakweni omalombwelo ngano, nena oto talwa omuyakuli omwaanawa gwaJesus Kristus. Oto mono ihe eitaalo moohapu nomelongo lyu uka, ngaashi wa kala mulyo.

⁷Onkee ano yanda oongano itaadhi popi Kalunga nodhaa na ekwatho lyasha. Ihe iputudha, u kale ho simaneke Kalunga.

⁸Eidheulo lyopalutu oli na ekwatho eshona lyowala, ihe okusimaneka Kalunga otaku kwatha miinima ayihe, oshoka omo mu na euvaneko lyomwenyo ngashingeyi nokonakuyiwa.

⁹Ohapu ndjika oyoshili, onkee oyi shi kutaambwa nokwiitaalwa.

¹⁰Shika osho tatu kondjele notatu shi ihepekele, oshoka otwi inekela Kalunga omunamwenyo, Omuhupithi gwaantu ayehe, unene gwaamboka ooitaali.

¹¹Ano ya lombwela, u ya longe iinima mbika ayihe.

¹²Inapu kala nando ogumwe te ku dhini molwaasho omugundjuka, ihe kala omuholelwa kooitaali moohapu, momikalo, mohole, meitaalo nomuuyogoki.

¹³Longitha ethimbo lyoye mokulesha Omanyolo omayapuki montaneho yaayehe, mokuuvitha nomokulonga aantu, sigo tandi ya.

¹⁴Ino hepitha omagano gopambepo ge li mungoye, ngoka we ga pewa, aahunganeki sho ya popi elaka lyaKalunga, naakuluntu sho ye ku tenteke iikaha yawo.

¹⁵Iinima mbika yi ninga ano, ngoye wi itule mo muyo, opo okuhuma kwoye komeho ku monike kwaayehe.

¹⁶Itonatela ano mwene nosho wo elongo lyoye. Iinima mbika yi dhiginina, oshoka ngele to shi ningi, oto ihupitha nosho wo mboka taye ku pulakene.