Read Oshindonga-Ombiimbeli Ondjapuki 1TIMOTEUS 5 Bible Online

1TIMOTEUS 5 - Oshindonga-Ombiimbeli Ondjapuki bible

1TIMOTEUS 5

¹Ino ganda omusamane omukokele, ihe mu popitha ongaho. Aalumentu aagundjuka kala nayo ongaamwanyoko,

²naakulukadhi ongoonyokokulu naakiintu aagundjuka ongaamwanyoko omuuyogoki auhe.

³Simaneka aaselekadhi, oomboka aaselekadhilela.

⁴Omuselekadhi ngoka e na oyana nenge aatekulu, naa ilonge okukwatha aakuluntu yawo nooyinakulu paukriste. “Kayuhwena hadhela nyoko, nyoko onale e ku hadhele,” oshoka osho ehalo lyaKalunga.

⁵Omukiintu omuselekadhilela ngoka kee na nando omusilishimpwiyu, ohi inekele Kalunga ye e ta dhiginine okugalikana noku mu indila ekwatho omutenya nuusiku.

⁶Ihe omuselekadhi ngoka ti iyethele natango muuhalu we, oye okwa sa, nonando na kale e na omwenyo.

⁷Ya lombwela eutho ndika, opo kwaa kale nando omuntu te ya pe uusama.

⁸Ihe ngele ope na omuntu ngoka itaa sile aanezimo lye oshimpwiyu, unene aanegumbo lye, oye okwi idhimbike eitaalo nomwiinayi e vulike komupagani.

⁹Omuselekadhi ngoka e na oomvula dhaa vule omilongo hamano, ita vulu okuyalulilwa komwaalu gwaaselekadhi ooyakwawo. Ihe omuselekadhi a tya ngaaka oku na wo okukala a hokanwa lumwe aluke,

¹⁰nokwa popiwa a longa iilonga iiwanawa: a putudha nawa oyana, a yakula aayenda megumbo lye, a yoga oompadhi dhaantu yaKalunga, a kwatha mboka ye li muudhigu nokwiigandjela oshilonga kehe oshiwanawa.

¹¹Aaselekadhi aagundjuka inaaya yalulilwa komwaalu nguka, oshoka uuhalu wawo otau ya thiminike okuya moondjokana. Oyo otaa gamuka kuKristus,

¹²e taa kala ye na oondjo, sho inaa gwanitha euvaneko lyawo lyotango.

¹³Otaa igilile wo okukala monyalo nokweendagula nomagumbo, ihe unene otaa igilile okupopyagana, okwiitula miinima yaantu nokupopya iinima mbyoka itaayi pumbwa okupopiwa.

¹⁴Onkee onda hala, aaselekadhi aagundjuka ya hokanwe, ya vale aanona noya dhiginine okukala nawa nomagumbo gawo, opo yaa pe aanandumbo natse ompito yoku tu popila muuwinayi.

¹⁵Oshoka aaselekadhi yamwe oya puka nokuli e taa landula Satana.

¹⁶Ihe ngele oku na omukiintu omwiitaali e na aaselekadhi megumbo lye, ne ya sile oshimpwiyu, opo egongalo kaali tsikwe omutenge lyo li vule okusila aaselekadhilela oshimpwiyu.

¹⁷Aakuluntu yegongalo mboka ya monika aadhiginini miilonga yawo, oyi ilongela okusimanekwa, unene mboka haa ihepeke mokuuvitha nomokulonga aantu.

¹⁸Oshoka enyolo otali ti: “Ino manga okana konani ndjoka tayi yungula nokulyatagulithwa iilya molupale;” na: “Omulongi okwi ilongela okupewa ondjambi ye.”

¹⁹Omukuluntu gwegongalo ngele ta tamanekwa, ino zimina oohapu ndhoka, manga kaapu na oonzapo yaali nenge yatatu.

²⁰Mboka taa yono, ya ganda montaneho yegongalo, opo yakwawo ya tile okuyona.

²¹Otandi ku ganitha koshipala shaKalunga noshaJesus Kristus nomontaneho yaayengeli aayapuki: Dhiginina elongo ndika, waa kale nando nontondo nenge nondhipi mwaayihe mbyoka to yi ningi.

²²Ino endelela okutenteka omuntu iikaha yoye omolwoshilonga shOmuwa. Ino kwatathana noondjo dhaantu yalwe; ikaleka wa yela.

²³Ino nwa we omeya ageke, ihe kala ho nu omaviinu omashona omoluuwehame womela lyoye.

²⁴Oondjo dhaantu yamwe odhi igalala nale, notadhi ya tetekele okuya mepangulo, ihe dhayamwe otadhi ka holoka owala komeho.

²⁵Osho ngeyi iilonga ayihe iiwanawa oyi li puuyelele, naambyoka wo inaayi holoka, itayi kala aluhe ya holama.