Read Oshindonga-Ombiimbeli Ondjapuki 1TIMOTEUS 6 Bible Online

1TIMOTEUS 6 - Oshindonga-Ombiimbeli Ondjapuki bible

1TIMOTEUS 6

¹Aapika naa simaneke ooyene yawo, opo edhina lyaKalunga nelongo lyetu lyaa shekwe.

²Aapika mboka ye na ooyene ooitaali, inaye ya dhina, oshoka ayehe otaa talwa aamwayinathana. Ihe naye ya longele nomwenyo omwaanawa, oshoka oyo ooitaali pamwe nayo aaholike. Ano ou na okulonga nokuuvitha iinima mbika.

³Ihe ngoka ta longo elongo li ili ye ina taamba oohapu dhoshili dhOmuwa gwetu Jesus Kristus nosho wo elongo lyashili,

⁴okwa kwatwa kuuntsa nokokwaashisha. Oye ota hingwa kehalo ewinayi tali fala momaludhikithathano nomomatompathano, moka hamu zi efupa, oontamanana, omashekathano nomalundilathano.

⁵Aantu mboka yaa na oondunge noihaa landula oshili, oye hole aluhe okuludhika. Oyo otaa dhiladhila kutya uukriste owo olunza lweliko.

⁶Eeno, uukriste owo shili eliko enene, ihe ongele wa gwana naashoka u shi na.

⁷Muuyuni inatu ya mo nando onasha, osho wo itatu vulu okuza mo nasha.

⁸Onkee ano natu kale twa gwana, ngele otu na iikulya nomizalo.

⁹Ihe mboka ya hala okuninga aayamba, otaa gwile memakelo. Oyo otaa yulwa kuuhalu uuwinayi wuugoya mboka tau ya fala moshiponga nomekano.

¹⁰Oshoka mohole yeliko omo tamu zi uukolokoshi auhe. Aantu oyendji sho ya lalakanene eliko, oya puka mo mondjila yeitaalo noya yono po oomwenyo dhawo niimpwiyu oyindji.

¹¹Onkee ano ngoye omuntu gwaKalunga, yanda iinima ayihe ya tya ngeyi. Lalakanena uuyuuki, esimanekokalunga, eitaalo, ohole, eidhidhimiko nombili.

¹²Matuka methigathano ewanawa lyeitaalo, u hakane omwenyo gwaaluhe, ngoka we gu ithanenwa kuKalunga, sho wa hempulula ehempululo ewanawa lyeitaalo montaneho yoonzapo oyendji.

¹³Koshipala shaKalunga, ngoka ha tula iinima ayihe omwenyo noshaJesus Kristus, ngoka a hempulula ehempululo ewanawa koshipala shaPontius Pilatus, otandi ku kumagidha:

¹⁴Vulika koshipango, u kale wa yogoka nowaa na oshipo sigo esiku Omuwa gwetu Jesus Kristus ta ka holoka.

¹⁵Eholoko lye otali ka etwa po kuKalunga pethimbo lyo opala, omulalekwa nuuyamba nOmupangeli awike, Omukwaniilwa gwaakwaniilwa nOmuwa gwaawa.

¹⁶Oye awike ihaa si; a kala muuyelele itaau wapa okuyiwa. Kaku na nando omuntu e mu mona nokaku na nando omuntu ta vulu oku mu tala. Oye na simanekwe ye na pangele aluheluhe! Amen.

¹⁷Kumagidha aayamba yeliko lyokombanda yevi, yaa inenepeke yo yaa inekele iinima mbyoka tayi hulu po, ihe naa inekele Kalunga ngoka he tu pe iinima ayihe kee na uuluya.

¹⁸Ya kumagidhila okulonga uuwanawa, ya ninge aayamba yiilonga iiwanawa, haa gandja nohaa topolele yalwe momaliko gawo.

¹⁹Osho ngeyi otayi igongelele eliko ndyoka tali ka ninga ekankameno lya kola konakuyiwa. Nena otaa vulu okwiimonena okukalamwenyo kwashili.

²⁰Timoteus, pungula nawa shoka we shi pewa. Yanda omapopyagano ga nyata nomaludhiko guunongo wuugoya, ngaashi aantu yamwe haye u tala owo oondunge.

²¹Oshoka yamwe mboka ya ti kutya oye na uunongo wa tya ngaaka, oyi iteka eitaalo. Esilohenda lyaKalunga nali kale nane amuhe.