Read Oshindonga-Ombiimbeli Ondjapuki 2 TIMOTEUS 2 Bible Online

2 TIMOTEUS 2 - Oshindonga-Ombiimbeli Ondjapuki bible

2 TIMOTEUS 2

¹Mumwandje, ikolelela ano mesilohenda ndyoka tu li na muukumwe naKristus Jesus.

²Dhiginina oohapu ndhoka u uvu tandi dhi uvitha montaneho yoonzapo oyendji. Dhi gandja kaantu ye shi kwiinekelwa, mboka taa vulu oku dhi longa yakwawo.

³Idhidhimikila omahepeko ongomukwiita ofule gwaJesus Kristus.

⁴Omukwiita ngoka e li molugodhi, ihi ipyakidhile noompumbwe dhilwe, oshoka okwa hala okwoopalela aluhe omuwiliki gwe.

⁵Omumatuki kehe methigathano ita mono ondjambi, ngele ita vulika koompango.

⁶Omunepya ngoka i ihepeke nokulonga epya lye, oku na okumona tango sha meteyo lyepya lye.

⁷Dhiladhila nawa shoka tandi ku lombwele, oshoka Omuwa ote ke ku pa oondunge dhokuuva ko iinima ayihe mbika.

⁸Dhimbulukwa Jesus Kristus, omunezimo lyaDavid ngoka a yumudhwa kuusi, ngaashi tashi popiwa kelaka etoye ndyoka tandi li uvitha.

⁹Otandi hepekwa, sho tandi uvitha elaka etoye nonda mangwa nokuli ongomukolokoshi. Ihe oohapu dhaKalunga inadhi mangwa.

¹⁰Onkee ano otandi idhidhimikile iinima ayihe, opo aahogololwa yaKalunga ya mone ehupitho neadhimo lyaaluhe ndyoka li li muKristus Jesus.

¹¹Ohapu ndjika oyoshili: “Ngele twa si pamwe naye, otatu ka kaleni wo tu na omwenyo pamwe naye.

¹²Ngele tatu tsikileni okwiidhidhimika, otatu ka pangeleni wo pamwe naye. Ngele tatu mu idhimbike, naye wo ote ke tu idhimbika.

¹³Ngele itatu kala aainekelwa, nena oye ota kala omwiinekelwa, oshoka ita vulu okwiifundjaleka.”

¹⁴Aakwanegongalo yaandjeni ya dhimbulutha iinima mbika, ngu u ya londodhe koshipala shaKalunga, yaa kale ye hole okuludhika. Omaludhi itaga eta uuwanawa washa, ihe otaga yono po owala aapulakeni.

¹⁵Kambadhala, u kale omulongihapu a hokiwa kuKalunga, ongaangoka inaa sa ohoni iilonga ye noha longo aantu oshili ya yela yomoohapu dhaKalunga.

¹⁶Yanda omapopyo ga nyata noguugoya, ngoka taga fala aantu kokule naKalunga.

¹⁷Elongo lyawo olya fa ondhiya tayi kunya ko oontumba kolutu. Yaali yomaalongi mbaka oyo Himeneus naFiletus.

¹⁸Yo oya puka mo mondjila yoshili notaa yono po eitaalo lyoyendji, sho taa popi kutya eyumuko lyaasi olya ningwa nale.

¹⁹Ihe ekankameno ndyoka lya tungwa kuKalunga, olya kola noitali tenguka. Kekankameno ndika okwa nyolwa oohapu ndhika: “Omuwa oku ya shi mboka ye,” na: “Kehe ngoka ta tumbula edhina lyOmuwa, ne ethe uulunde.”

²⁰Megumbo enene omu na iiyaha nomatiti goludhi kehe: Yimwe oya ningwa moshisiliveli nomoshingoli, yimwe omiiti nomeloya, yimwe ohayi longithwa ashike omasiku gamwe niikwawo ohayi longithwa esiku kehe.

²¹Ano ngele ku na ngoka ti iyoolola mo muuwinayi mbuka auhe, ota vulu okulongithwa miilonga yi na esimano. Oye okwa yapulwa, a kale oopalela mwene gwe nokwi ilongekidha okulongithwa moshilonga kehe oshiwanawa.

²²Yanda uuhalu womuugundjuka, lalakanena uuyuuki, eitaalo, ohole nombili pamwe naamboka ye na omitima dha yela nohaa pula ekwatho kOmuwa.

²³Yanda okuludhika kwa nika uugoya nokwaa na owino, oshoka iinima ya tya ngeyi ohayi hulile moontamanana.

²⁴Omumati gwOmuwa ita pumbwa okutamanana. Oye oku na okukala omulongi omwaanawa, omwiidhidhimiki, e na olukeno naayehe

²⁵noha pukulula aatamaneki ye nombili. Oshoka Kalunga ota vulu oku ya pa ompito yokwiitedhulula e taa tseya oshili.

²⁶Nena otaa papudhuka e taa manguluka mo momwigo gwaSatana, ngoka a li e ya manga e te ya vulikitha.