Read Oshindonga-Ombiimbeli Ondjapuki 2 TIMOTEUS 3 Bible Online

2 TIMOTEUS 3 - Oshindonga-Ombiimbeli Ondjapuki bible

2 TIMOTEUS 3

¹Dhimbulukwa aluhe kutya komasiku gokomeho otaku ke ya omathimbo omadhigu.

²Aantu otaa ka kala nokwiihola, ye hole eliko, aainomi noye hole uuntsa. Otaa ka kala aasheki, ihaa vulika kaakuluntu yawo, ihaa pandula noya pota.

³Oyo otaa ka kala yaa na olukeno nohenda, haa lundilathana, aapwidhi naadhudhu; otaa kala ye tonde uuwanawa.

⁴Otaa kala aakotokeli, ihaa yawala, haa tuwalala noye hole iihulo peha lyokuhola Kalunga.

⁵Oyo otaa ka kala ya fa haa simaneke Kalunga, ihe otaa idhimbike oonkondo dhe. Yanda aantu ya tya ngaaka.

⁶Yamwe yomuyo ohaa gwayele momagumbo, haa kwata aakiintu mboka ya lolodhwa kuulunde nohaa endithwa kuuhalu womaludhi ogendji.

⁷Aakiintu mbaka otaa kambadhala aluhe okwiilonga okutseya oshili, ihe oyo kaye na nando oompoka naa ke yi tseya.

⁸Ngashika naanaa Jannes naJambres ya li ya tsile Moses ondumbo, osho wo naantu mbaka otaa tsu ondumbo noshili. Aalumentu mbaka oye na oondunge dha pilaala noya gwaya mo meitaalo.

⁹Ihe kaye na nando oompoka naa ka huma komeho, oshoka aantu ayehe otaa ka mona uugoya wawo ngashika naanaa mbwiyaka waJannes naJambres.

¹⁰Ihe ngoye owa landula elongo lyandje, omikalo dhandje nelalakano lyandje; owa holele ndje meitaalo, meidhidhimiko, mohole nomomukumo,

¹¹mokutidhaganwa nomokuhepekwa. Ngoye owa tseya nawa, nkene nda li nda hepekwa noonkondo muAntiokia, muIkonium nomuListra. Ihe Omuwa okwa hupitha ndje mo mwaayihe mbika.

¹²Ayehe mboka ya hala okulongela Kalunga nesimaneko muukumwe naKristus Jesus, otaa ka tidhaganwa.

¹³Ihe aakolokoshi naafudhime otaa tsikile okuza muuwanawa yu uka muuwinayi, okupukitha yalwe nokwiipukitha wo yo yene.

¹⁴Ngoye kombinga yoye kala mwaambyoka yoshili, ngaashi we yi longwa nowe yi itaala. Oshoka mboka ye yi ku longo, ou ya shi.

¹⁵Owa tseya Omanyolo omayapuki okuza kuunona woye. Otaga vulu oku ku pa oondunge ndhoka tadhi ku thikitha mehupitho, sho wi itaala Jesus Kristus.

¹⁶Oshoka Enyolo kehe olya nyolithwa kOmbepo yaKalunga noli na oshilonga shokulonga oshili, okukumagidha, okupukulula nokuulukila omuntu ondjila yu uka,

¹⁷opo kehe ngoka ta longele Kalunga, a kale a gwana a pwa nokwoopalela oshilonga kehe oshiwanawa.