Read Oshindonga-Ombiimbeli Ondjapuki AAHEBELI 10 Bible Online

AAHEBELI 10 - Oshindonga-Ombiimbeli Ondjapuki bible

AAHEBELI 10

¹Mompango yAajuda omu na owala efano lya dhimeya lyiinima iiwanawa tayi ke ya, ihe itali holola onkalo yoyene yiinima mbyoka. Onkee itayi vulu okuthikitha aantu megwano, nando taa hedha kuKalunga nomayambo gawo aluhe omumvo nomumvo.

²Ando okwa li aantu mbeyaka ya li ya yelithwa lela koondjo dhawo, ando kaya li we ye na eiyuvo lyoondjo, nomayambo ando inaga pumbiwa we.

³Ihe omayambo oge lile po okudhimbulutha aantu omumvo nomumvo oondjo dhawo.

⁴Oshoka ombinzi yoontsezi noyiikombo kayi na mpoka nayi ka dhima po oondjo.

⁵Onkee ano Kristus sho a li pokuya muuyuni, okwa ti kuKalunga: “Omagano nomayambo giinamwenyo ito ga pumbwa, ihe owa longekidhile ndje olutu.

⁶Ongoye ito hokwa omayambo giinamwenyo haga lungunithilwa koshiyambelo, nenge omayambo gokukutha po oondjo.

⁷Ongame nonda ti: ‘Ongame nguka, otandi ya okulonga ehalo lyoye, Kalunga, ongaashi sha nyolwa membo lyompango tashi popi ndje.’ ”

⁸Tango Kristus okwa ti: “Omagano nomayambo giinamwenyo ito ga pumbwa, ngoye ito ga hokwa, osho wo omagano giinamwenyo haga lungunithilwa koshiyambelo nomayambo gokukutha po oondjo.” Okwa popi ngeyi, nando omayambo ngaka oga li haga yambwa pampango.

⁹Opo ihe okwa ti ishewe: “Ongame nguka tandi ya okulonga ehalo lyoye, Kalunga.” Onkee ano Kalunga okwa kutha po omukalo omukulu gwokuyamba nokwa tula po eyambo lyaKristus peha lyagwo.

¹⁰Onkee ano tse otwa yelithwa lumwe aluke koondjo molwaJesus Kristus, ngoka a gwanitha ehalo lyaKalunga, sho a yamba olutu lwe mwene.

¹¹Omuyambi kehe paShijuda oha longo a thikama mokulonga iilonga ye esiku kehe noha yamba omayambo ogo tuu ngoka olwindji. Ihe omayambo ngaka kage na mpoka naga ka kutha po oondjo.

¹²Ihe Kristus sho a yamba omolwoondjo eyambo limwe lya gwanenena sigo aluhe, okwa kuutumba kolulyo lwaKalunga.

¹³Ngashingeyi Kristus okwa tegelela, Kalunga a tule aatondi ye kohi yoompadhi dhe.

¹⁴Neyambo limwe alike okwa yelitha sigo aluhe mboka ya yelithwa.

¹⁵Ombepo Ondjapuki otayi tu hokololele kutya tango Kalunga okwa ti:

¹⁶“Ndika olyo ehangano ndyoka tandi ke li ninga pokati ketu nayo, konima yomasiku ngoka, Omuwa osho ta ti: Ompango yandje otandi ke yi nyolela momitima dhawo, notandi ke yi tula momadhiladhilo gawo.”

¹⁷Nokwa ti ishewe: “Itandi ka dhimbulukwa we oondjo niilonga yawo iiwinayi.”

¹⁸Onkee ano inaku pumbiwa we omayambo gokukutha po oondjo, uuna ayihe mbika ya dhimwa po.

¹⁹Aamwameme, ngashingeyi otu na ompito ya manguluka yokuthika muuyapukielela omolweso lyaJesus.

²⁰Oye okwe tu egululile osheelo oshipe shi na omwenyo, tashi pitile metopolitho, nokutya molutu lwe.

²¹Ano otu wa omuyambi omunene nomuleli gwegumbo lyaKalunga.

²²Tu hedheni ano kuKalunga noomwenyo dha yela neinekelo lya kola, twa kuthwa eiyuvo lyoondjo notwa yogwa nomeya omayelele.

²³Tu dhiginineni okuhempulula nomukumo etegameno lyetu, oshoka Kalunga oku shi kwiinekelwa mokugwanitha omauvaneko ge.

²⁴Tu silathaneni oshimpwiyu, tu kwathathaneni mokuholathana nomokulongelathana uuwanawa.

²⁵Inatu etha po okugongala pamwe, ngaashi yamwe haa ningi. Ihe natu kumagidhathaneni, unene sho tu wete esiku lyOmuwa tali hedha popepi.

²⁶Tse otwa tseyithilwa oshili. Opo ihe ngele otatu yono owina, nena kaku na we eyambo lyokudhima po oondjo.

²⁷Otu na owala okutegelela epangulo tali tilitha nomulilo gwa hanya tagu fike po aanandumbo naKalunga.

²⁸Omuntu ngoka itaa vulika kompango yaMoses, oha dhipagwa pwaa na ondjaalela, uuna eyono lye lya kolekwa koonzapo yaali nenge yatatu.

²⁹Otamu ti ngiini komuntu ngoka ta dhini Omuna gwaKalunga, ta tala ombinzi yehanganitho naKalunga ndjoka tayi mu yelitha ongoyaa na oshilonga, e ta sheke Ombepo yohenda? Egeelo oli thike peni ndyoka iilongela?

³⁰Oshoka otu mu shi ngoka a ti: “Ongame mwene tandi galulile omuntu uuwinayi we, ongame tandi mu geele;” nota ti ishewe: “Omuwa ota ka pangula aantu ye.”

³¹Iihuna yowala okugwila miikaha yaKalunga omunamwenyo!

³²Dhimbulukweni ano okukala kweni kwonale. Pomasiku ngeyaka uuyelele waKalunga sho we mu minikile, omwa li mwa hepekwa kiinima oyindji, ihe inamu sindika.

³³Pomathimbo gamwe omwa popiwa nayi nomwa hepekwa montaneho yaayehe, ihe pomathimbo omakwawo omwa gama kumboka taa hepekwa pamukalo gwa tya ngaaka.

³⁴One omwa hepekwa pamwe noonkwatwa nomwi idhidhimike nenyanyu, uuna ndoka mwa yugwa omaliko geni. Oshoka omwa tseya kutya omu na sha shilwe oshiwanawa itashi hulu po.

³⁵Kaleni ano nokwiidhidhimika, oshoka eidhidhimiko oli na ondjambi onene.

³⁶Omu na okwiidhidhimika, opo mu gwanithe ehalo lyaKalunga ne mu pewe shoka e shi uvaneka.

³⁷Oshoka enyolo otali ti: “Oku na okathimbo okafupi kowala, ngoka e na okuya, ote ya ihe, ye ita kala ko.

³⁸Ihe aayuuki yandje otaa ki itaala ndje e taa kala ye na omwenyo. Naamboka taa shuna monima, itandi ya hokwa.”

³⁹Ihe tse katu lile po okushuna monima, tu ka kane, aawe, tse otatu itaale e tatu hupithwa.