Read Oshindonga-Ombiimbeli Ondjapuki AAHEBELI 13 Bible Online

AAHEBELI 13 - Oshindonga-Ombiimbeli Ondjapuki bible

AAHEBELI 13

¹Kaleni mu holathane, oshoka one aamwayinathana muKristus.

²Inamu dhimbwa okutaamba aayenda momagumbo geni. Okwa li ku na mboka ye shi ningi e taa taamba aayengeli inaaye shi tseya.

³Dhimbulukweni mboka ye li moondholongo, mu kale mwa fa mu li nayo. Dhimbulukweni mboka taa hepekwa, mu kale mwa fa tamu hepekwa pamwe nayo.

⁴Oondjokana nadhi simanekwe kaantu ayehe, naanandjokana naa kale yi inekelathana. Kalunga ota ka pangula mboka ye hole oluhondelo nuuholume.

⁵Mokukala kweni inamu mangwa kohole yeliko, ihe kaleni mwa gwana naashoka mu na. Oshoka Kalunga okwa ti: “Itandi ku etha nando; itandi ku thigi po.”

⁶Onkee ano tu kaleni tu na omukumo, tse tu tye: “Omuwa oye omukwathi gwandje, itandi tila sha. Omuntu ota ningi ndje shike?”

⁷Dhimbulukweni aawiliki yeni mboka ye mu uvithile oohapu dhaKalunga. Dhiladhileni, nkene ya li ya kala nonkene ya hulitha oondjenda dhawo, ne mu holele eitaalo lyawo.

⁸Jesus Kristus iha lunduluka, oku li ngaashi a li ohela, nosho ta kala nena nosigo aluhe.

⁹Inamu pukithwa komalongo galwe mwaa ga shi. Osho oshinima oshiwanawa, oomwenyo dheni ngele tadhi kolekwa kesilohenda lyaKalunga, hakokuvulika koompango dhokombinga yiikulya; mboka haa vulika koompango dha tya ngeyi, inadhi ya kwatha sha.

¹⁰Aayambi Aajuda mboka haa yakula metsali, itaa vulu okulya omayambo gomoshiyambelo shika shetu.

¹¹Omuyambimukuluntu Omujuda ohe eta ombinzi yiinamwenyo muuyapukielela, opo e yi yambe molwoondjo; ihe omalutu giinamwenyo ohaga fikilwa kondje yontanda.

¹²Onkee ano Jesus wo okwa sile kondje yeelo lyoshilando, opo a yelithe aantu koondjo dhawo nombinzi ye mwene.

¹³Tu yeni ano kuye kondje yontanda, tu ka shekwe pamwe naye.

¹⁴Oshoka kombanda yevi katu na ko oshilando tashi kalelele; tse otatu kongo oshilando shoka tashi ke ya.

¹⁵Tu hambeleleni ano Kalunga aluhe, shi ninge eyambo lyetu molwaJesus nokutya, tu panduleni edhina lye noku mu imbila.

¹⁶Inamu dhimbwa okulonga uuwanawa nokukwathathana, oshoka omayambo ga tya ngeyi oga hokiwa kuKalunga.

¹⁷Vulikeni kaawiliki yeni, ne mu landule omalombwelo gawo. Ohaa tonatele oomwenyo dheni yaa na evululuko, oshoka otaa ke dhi pulwa kuKalunga. Ngele otamu vulika, nena otaa longo iilonga yawo nenyanyu, ihe ngele hasho, nena otaa longo neyeme, naashika itashi mu kwatha sha.

¹⁸Dhiginineni oku tu galikanena. Tse otu na eiyuvo lya yela, oshoka otwa hala aluhe okulonga shoka shi li mondjila.

¹⁹Unene otandi mu indile, mu galikanene ndje, opo Kalunga a tume ndje kune ishewe mbala.

²⁰Kalunga oye a yumudha Omuwa gwetu Jesus kuusi. Jesus, Omusita omukuluntu gwoonzi, okwa koleke neso lye ehangano lyaaluhe.

²¹Ihe Kalunga kombili ne mu pe ayihe mbyoka mwa pumbwa, opo mu vule okugwanitha ehalo lye. Kalunga na longe mutse shoka sho opalela ehalo lye omolwaJesus Kristus, ngoka e na okusimanekwa aluhe sigo aluhe. Amen.

²²Aamwamene, otandi mu indile, mu taambe neidhidhimiko oohapu ndhika dhomakumagidho, oshoka ontumwafo ndjika nde mu nyolele, kayi shi onde unene.

²³Otandi mu tseyithile kutya omumwameme Timoteus okwa mangululwa mo mondholongo. Ngele okwe ya huka mbala, otatu ke ya naye, tu mu talele po.

²⁴Kundilii po aawiliki yeni ayehe nosho wo aantu yaKalunga ayehe. Aakriste ooyakweni yomuItalia otaye mu kundile po.

²⁵Esilohenda lyaKalunga nali kale nane amuhe.