Read Oshindonga-Ombiimbeli Ondjapuki AAHEBELI 2 Bible Online

AAHEBELI 2 - Oshindonga-Ombiimbeli Ondjapuki bible

AAHEBELI 2

¹Onkee ano otu na okukanyatela koshili ndjoka twe yi uvu, opo twaa falafalwe kiifundja.

²Nokuli elaka ndyoka aayengeli ye li eta, olyo lyoshili. Shaa ngoka inee li landula noina vulika kulyo, okwa geelwa ngaashi i ilongela.

³Tse otatu vulu tuu okuya ontuku, ngele katu na ko nasha nehupitho li thike mpaka? Omuwa mwene okwe li tu uvithile tango, naamboka ye mu uvu ko, oye tu hokololele kutya osho lela.

⁴Pethimbo tuu ndyoka Kalunga okwa gwedhele ko ehokololo lye kehempululo lyawo, sho a longo iilongankondo niikumithalonga nomandhindhiliko ogendji. Oye okwa gandja wo omagano gOmbepo Ondjapuki pahalo lye mwene.

⁵Oshoka Kalunga ina lenga aayengeli, ya ninge aapangeli yuuyuni mboka a li poku u shita. Tashi ti uuyuni mbuka tatu popi.

⁶Ihe okwa nyolwa wo peha limwe mOmanyolo: “Kalunga, omuntu omushike, sho ho mu dhiladhila? Sho ho sile omuntu gwanathangwa oshimpwiyu?”

⁷Owa tile: “Na shonopekwe okathimbo kowala e vulike kaayengeli. Owe mu pe eadhimo ngaashi omukwaniilwa,

⁸nowe mu ningi omupangeli gwaayihe.” Tashi ti, Kalunga okwa shiti omuntu omupangeli gwaayihe. Shika osha kwatelela mo iinima ayihe. Ihe katu wete natango kutya omuntu oye omupangeli gwaayihe.

⁹Ihe otu wete Jesus oye a shonopekwa okathimbo okafupi e vulike kaayengeli, opo a sile aantu ayehe omolwesilohenda lyaKalunga. Otu mu wete nena a zalekwa eadhimo nesimano, molwaasho a sile ayehe.

¹⁰Kalunga, omushiti nomuhumbati gweshito alihe, okwa hala okuthikitha aana ye oyendji meadhimo. Onkee okwe shi tala she mu opalela okulenga Jesus, a kale a pwa omolwomahepeko ge.

¹¹Jesus okwa yelitha aantu koondjo dhawo nokwa ningi omumwahe naamboka ya yelithwa koondjo. Onkee ano ite ya idhimbike oku ya ithana aamwayina.

¹²Ngaashi ta ti: “Kalunga, otii ku hokolola paamwameme; Otii ku imbile omaimbilo montaneho yegongalo alihe.”

¹³Oye ota ti wo: “Ondi inekela Kalunga.” Niishewe ota ti: “Ongame nguka naanona mboka Kalunga e ya pe ndje.”

¹⁴Aanona mbaka oyo aantu yonyama nombinzi. Onkee Jesus okwa faathana nayo muukwatya wawo, opo a hanagule po neso lye mwene omuhindadhi, ngoka he eta eso.

¹⁵Osho ngeyi okwa mangulula aantu muumbanda weso, moka ya li muupika okukalamwenyo kwawo akuhe.

¹⁶Oshoka Jesus ine ya okukwatha aayengeli, ihe enyolo otali ti: “Ota kwatha oluvalo lwaAbraham.”

¹⁷Omolwaashika okwa li e na okufaathana naamwayina miinima ayihe, opo a ninge omuyambi omukuluntu gwawo omunamutimahenda nomwiinekelwa meyakulo lye koshipala shaKalunga. Osho ngaaka oondjo dhaantu otadhi dhimwa po.

¹⁸Onkee ano ye mwene sho a makelwa nokwa hepekwa, ota vulu okukwatha mboka taa makelwa.