Read Oshindonga-Ombiimbeli Ondjapuki AAHEBELI 3 Bible Online

AAHEBELI 3 - Oshindonga-Ombiimbeli Ondjapuki bible

AAHEBELI 3

¹Aamwameme ne aakriste, ne mbo mwi ithanwa kuKalunga. Taaleleni Jesus, ngoka a tumwa kuKalunga, a kale omuyambi omukuluntu gwehempululo lyeitaalo lyetu.

²Oshoka Jesus okwa li omwiinekelwa koshipala shaKalunga, ngoka e mu hogolola okulonga iilonga mbika, ongaashi naanaa Moses a li omwiinekelwa melelo lyegumbo lyaKalunga.

³Omutungi gwegumbo oku na esimano enene li vule lyegumbo lyo lyene. Onkee Jesus oku na esimano enene li vule lyaMoses.

⁴Egumbo kehe oli na omutungi gwalyo, ihe ngoka a tungu ayihe, oKalunga.

⁵Moses okwa li omwiinekelwa megumbo lyaKalunga. Oye okwa li omuyakuli nokwa popi iinima mbyoka Kalunga ta ka popya konakuyiwa.

⁶Ihe Kristus, sho e li po Omuna gwaKalunga, oye omwiinekelwa miilonga yomegumbo lyaHe. Otse egumbo lyaKalunga, ngele tatu dhiginine nomukumo notu na einekelo okwiinekela shoka twe shi tegelela.

⁷Oshoka ngaashi Ombepo Ondjapuki ta ti: “Onena tuu ndjika ngele tamu uvu ewi lyaKalunga,

⁸inamu ikukutika, ngaashi mwa tsile ondumbo naKalunga, sho mwa li mwe mu hindi uuna ndwiyaka mombuga,

⁹moka oohokulu ya makelele ndje e taa hindi ndje. Kalunga osho ta ti, nando oya monene shoka nda longo muule woomvula omilongo ne.

¹⁰Onkee onda li nda geele aantu mbeyaka nonda ti: ‘Oyo oya puka aluhe momadhiladhilo gawo. Oyo inaa ilonga nando okutseya oondjila dhandje.’

¹¹Ngame onda li nda geya nonda gana kutya: ‘Kaye na mpoka naa ke ya, ya vululukwe pungame!’ ”

¹²Aamwameme ne! Kotokeni, kwaa kale nando ogumwe gwomune e na omwenyo omwiinayi gwaa na eitaalo notagu iteka Kalunga omunamwenyo.

¹³Kumagidhathaneni esiku kehe, manga taku tiwa “onena”, opo kwaa kale nando ogumwe ta fundjalekwa kuulunde e ti ikukutike.

¹⁴Otse oyaKristus, ihe ongele tatu dhiginine sigo opehulilo einekelo ndyoka twa tameke nalyo.

¹⁵Enyolo otali ti: “Onena ndjika nge tamu uvu ewi lyaKalunga, inamu ikukutika, ngaashi mwe shi ningile nale, uuna mwa tsile ondumbo naKalunga.”

¹⁶Oolye ano yu uvu ewi lyaKalunga noya tsu ondumbo naye? Oyo tuu mboka ya tembudhwa kuMoses muEgipiti.

¹⁷Oolye ano mboka Kalunga e ya geele uule woomvula omilongo ne? Oyo tuu mbeyaka ya yono e taa sile mombuga.

¹⁸Kalunga okwa popi oolye, sho a tile: “Oyo kaye na mpoka naa ke ya, ya vululukwe pungame.” Oye okwa popi aantu mboka ya li ya tsu ondumbo naye.

¹⁹Ano ngashingeyi otwa mono kutya, inaa vula okuya mo, oshoka oya li kaaye na eitaalo.