Read Oshindonga-Ombiimbeli Ondjapuki AAHEBELI 6 Bible Online

AAHEBELI 6 - Oshindonga-Ombiimbeli Ondjapuki bible

AAHEBELI 6

¹Tu etheni iilongwa yopetameko yomuukriste, tse tu lalakaneni uukuluntu. Onkee itatu popi we iinima mbyoka yetameko ngaashi iilonga yaa na oshilonga, eitaalo okwiitaala Kalunga,

²omalongo gomashasho, omatenteko giikaha, eyumuko lyaasi nepangulo lyahugunina.

³Tu humeni komeho! Eeno, osho twa hala okuninga, Kalunga ngele te shi tu pitikile.

⁴Oshoka mboka ya shuna monima, otaa itedhululithwa we tuu? Oyo oya li muuyelele waKalunga. Oya makele iikulya yomegulu noya pelwe Ombepo Ondjapuki.

⁵Oya li ya makele uutoye woohapu dhaKalunga noya li yu uvite oonkondo dhomuuyuni mboka tau ke ya.

⁶Sho ya shuna monima, itaa vulu we okwiitedhululithwa, oshoka oyo otaa alele natango Omuna gwaKalunga komushigakano noku mu sitha ohoni montaneho yaayehe.

⁷Kalunga ota yambeke epya ndyoka tali lokwa olwindji komvula notali meneke iimeno yo opalela aalongi yalyo.

⁸Ihe ngele tali meneke oongwena noondjoho, otali thingwa e tali yonwa po nomulilo.

⁹Ookuume aaholike, nando tatu popi ngeyi, otwe mu inekela natango. One omu na omayambeko omawanawa tage mu fala mehupitho.

¹⁰Kalunga oku shi kwiinekelwa. Ita dhimbwa iilonga nohole yeni mokusimanekitha edhina lye, sho hamu yakula aakriste ooyakweni.

¹¹Otwa hala unene, kehe gumwe gwomune a dhiginine okukala ta lalakana sigo okehulilo, opo a adhe shoka a kala e shi tegamena.

¹²Tse inatu hala, mu kale aananyalo, ihe holeleni mbeyaka yi itaale noyi idhidhimike, sigo ya pewa shoka Kalunga e shi uvaneka.

¹³Kalunga sho u uvanekele Abraham euvaneko, okwa gana kutya ote li tsakanitha. Sho kaapwa li ngoka omunene e mu vule, oye okwa gana kedhina lye mwene.

¹⁴Oye okwa ti: “Otandi ku uvanekele kutya otandi ke ku yambeka e tandi ku pe oluvalo olwindji.”

¹⁵Abraham okwi idhidhimike e ta pewa shoka Kalunga e mu uvanekela.

¹⁶Uuna omuntu ta gana, oha longitha edhina lyaangoka e mu vule, negano otali hulitha po omaludhi gawo.

¹⁷Kalunga okwa li a hala okuyelithila nawa mboka ya pewa euvaneko lye kutya ita ka lundulula nando edhiladhilo lye. Onkee okwe li koleke negano.

¹⁸Oku na iinima mbika iyali mbyoka tayi holola kutya Kalunga iha lundulula ye iha fundju. Onkee ano tse mboka twa mono egameno muye, otwa tsuwa omukumo omunene, opo tu tegamene shoka shi li komeho.

¹⁹Etegameno ndika lyetu olya kwata lya dhiginina oomwenyo dhetu. Otatu yi nalyo, sigo twa piti metopolitho lyotempeli yomegulu e tatu yi muuyapukielela,

²⁰moka Jesus a tetekele okuya mo molwetu. Oye okwa ningi omuyambi omukuluntu sigo aluhe palandulathano lyaMelkisedek.