Read Oshindonga-Ombiimbeli Ondjapuki AAHEBELI 7 Bible Online

AAHEBELI 7 - Oshindonga-Ombiimbeli Ondjapuki bible

AAHEBELI 7

¹Melkisedek nguka okwa li omukwaniilwa gwaSalem nomuyambi gwaKalunga gwokombandambanda. Abraham sho a li ta zi kiita, hoka a sindi aakwaniilwa mbeyaka, Melkisedek okwe mu tsakaneke nokwe mu yambeke.

²Abraham okwe mu pe oshitimulongo shomiinima mbyoka e yi kwata miita. Edhina ndika Melkisedek otali ti “Omukwaniilwa guuyuuki”, ihe molwaasho okwa li omukwaniilwa gwaSalem, edhina lye otali ti ishewe “Omukwaniilwa gwombili”.

³Melkisedek nguka ke na he, ye ke na yina nenge ezimo; ko inaku tumbulwa wo evalo lye neso lye. Okwa yelekwa nOmuna gwaKalunga: Oye ota kala omuyambi sigo aluhe.

⁴Ano mpaka omu wete kutya Melkisedek okwa li omuntu omunene. Onkee kuku Abraham okwe mu pe oshitimulongo shomiinima mbyoka e yi kwata miita.

⁵Aayambi ayehe yomezimo lyaLevi oya lombwelwa kompango, ya pule mAaisraeli oshitimulongo. Oyo otaye shi pula maakwawo, nando nayo wo oyomoluvalo lwaAbraham.

⁶Melkisedek ye mwene ka li gwomezimo lyaLevi, ihe okwa pewa oshitimulongo kuAbraham nokwa yambeke Abraham tuu ngoka a pewa omauvaneko kuKalunga.

⁷Osha yela kutya ngoka a yambeke mukwawo, oku na esimano li vule lyaangoka a yambekwa.

⁸Aayambi mboka taa pula iitimulongo, ohaa si, ihe Melkisedek ngoka a pula wo iitimulongo, ina sa, ongaashi enyolo tali ti.

⁹Abraham sho a gandja oshitimulongo, aanezimo lyaLevi oye shi gandja wo.

¹⁰Oshoka uuna ndwiyaka Abraham a tsakaneke Melkisedek, Levi ka li a valwa natango.

¹¹Pautho lyompango Aaisraeli oya li ye na okudhiginina uuyambi wopaLevi. Iilonga yaayambi Aalevi ando oya li ya gwana, ando kakwa li kwa pumbiwa we omuyambi gulwe, e ye palandulathano lyaMelkisedek, halyopaAron.

¹²Oshoka muuyambi sho mwe ya elunduluko, nomompango wo omu na okulunduluka.

¹³Oshoka Omuwa gwetu ngoka ta popiwa mpaka, ke shi gwomezimo lyaayambi, nokakwa li nando ogumwe gwomezimo lye a li moshilonga shuuyambi.

¹⁴Omuwa gwetu okwa tseyika nawa kutya okwa zi mezimo lyaJuda, ndyoka Moses inee li tumbula nando, sho a popi aayambi.

¹⁵Oshinima ngashingeyi oshe ya puuyelele: Opwe ya omuyambi gulwe a fa Melkisedek.

¹⁶Nguka ina ningwa omuyambi kaantu nenge komalombwelo gaantu, ihe okwa ningi omuyambi koonkondo oonamwenyo ndhoka kaadhi na ehulilo.

¹⁷Oshoka enyolo otali ti: “Ongoye to ka ninga omuyambi gwaaluhe ngaashi Melkisedek.”

¹⁸Ano ompango onkulu oya dhimwa po, oshoka kayi na we oonkondo, oya kulupa.

¹⁹Oshoka ompango yaMoses inayi vula okugwanitha sha. Onkee ano ngashingeyi opwa tulwa etegameno ewanawalela, mundyoka tatu hedha kuKalunga.

²⁰Okwa gwedhwa wo okugana kwaKalunga. Nale inaku ningwa egano lya tya ngeyi, uuna aayambi mbeyaka ya langekwa moshilonga.

²¹Ihe Jesus okwa ningi omuyambi koonkondo dhegano, uuna Kalunga e mu lombwele a ti: “Omuwa okwa gana, ita lundulula we edhiladhilo lye: ‘Ongoye to ka ninga omuyambi gwaaluhe.’ ”

²²Ano eyooloko ndika otali ningi Jesus a kale omugameni gwehangano ewanawa li vule ndiyaka.

²³Ope na wo eyooloko ekwawo: Aayambi mbeyaka yalwe oya li oyendji, oshoka oya si noinaa vula okutsikila iilonga yawo.

²⁴Ihe Jesus oku na omwenyo sigo aluhe, onkee oshilonga she shuuyambi itashi kuthwa po kugulwe.

²⁵Onkee ota vulu aluhe okuhupitha mboka taye ya kuKalunga taa pitile muye. Oshoka oku na omwenyo aluhe note ya galikanene koshipala shaKalunga.

²⁶Ano Jesus oye omuyambi omukuluntu ngoka te tu gwanithile oompumbwe dhetu. Oye omuyapuki, ke na nando oshipo nenge oondjo. Oye okwa kuthwa maantu nokwa yeluthilwa kombandambanda megulu.

²⁷Oye ina fa aayambi yalwe mboka haa yamba esiku kehe, tango omolwoondjo dhawo yene, opo ihe dhaantu yalwe. Ihe Jesus okwa yamba eyambo lumwe aluke, sho i igandja ye mwene.

²⁸Aantu mboka ya hogololwa pampango yaMoses, ya ninge aayambi aakuluntu, oya li aankundi. Ihe okugana kwaKalunga hoka kwa ningwa hugunina yompango, okwa langeke Omwana ngoka ta kala a gwana a pwa sigo aluhe.