Read Oshindonga-Ombiimbeli Ondjapuki JAKOB 2 Bible Online

JAKOB 2 - Oshindonga-Ombiimbeli Ondjapuki bible

JAKOB 2

¹Aamwameme, eitaalo lyeni mokwiitaala Omuwa gwetu gweadhimo, Jesus Kristus, inali kala ndyoka tali tongola aantu pandjelo yokombanda.

²Natu tye, ngele mwa gongala, otamu ya omuyamba a zala okalinga koshingoli noonguwo dhuulenga, nosho wo ohepele a zala iinyanyu.

³Ngele tamu simaneke ngoka a zala nawa e tamu mu lombwele: “Kuutumba koshipundi shika oshiwanawa,” ihe ohepele otamu mu lombwele: “Kala wa thikama, nenge kuutumba pevi poompadhi dhandje,”

⁴nena omu na oondjo, sho tamu itongola neyene nokuninga omapangulo taga pangelwa komatompelo omawinayi.

⁵Aamwameme aaholike, pulakeneni! Kalunga okwa hogolola oohepele yomuuyuni mbuka, ya ninge aayamba yomeitaalo noya ka pewe Oshilongo shoka e shi uvanekela mboka ye mu hole.

⁶Ihe ne ohamu dhini oohepele! Aayamba hayo tuu mboka haye mu hepeke nohaye mu fala kiipala yaapanguli?

⁷Aayamba hayo tuu mboka haa sheke edhina ewanawa ndyoka mwe li lukilwa?

⁸Otamu opaleke, ngele tamu vulika kompango yOshilongo shaKalunga, ndjoka tayi monika menyolo ndika: “Hola mukweni, ngaashi u ihole mwene.”

⁹Ihe ngele ohamu kala naantu noku ya tongola pandjelo yokombanda, nena omu na oondjo, nompango otayi mu pangula kutya one aayoni yayo.

¹⁰Kehe ngoka ta yono oshipango shimwe shomompango, okwa yono wo iipango ayihe.

¹¹Oshoka ngoka a ti: “Ino hondela,” oye wo a ti: “Ino dhipaga.” Ano ngoye nando ino hondela, oto ningi omuyoni gwompango, ngele to dhipaga.

¹²Popyeni ne mu longe ngaashi aantu mboka taa ka pangulithwa kompango ndjoka tayi ya mangulula.

¹³Oshoka uuna Kalunga ta pangula aantu mboka yaa na ohenda, ite ke ya sila ohenda; ihe mboka ye na ohenda, otaa ka pita mepangulo.

¹⁴Aamwameme, omuntu ngoka ta ti kutya oku na eitaalo, ndele eitaalo lye itali holoka miilonga, otashi mu kwatha tuu sha? Eitaalo lya tya ngawo itali mu hupitha.

¹⁵Natu tye, oku na ooitaali ooyakweni aalumentu nenge aakiintu ye na onkayi nondjala.

¹⁶Ngele to ya lombwele to ti: “Endii po nawa. Ki isiikileni e tamu li nawa,” otashi kwatha shike, ngele inamu ya pa shoka ye shi pumbwa?

¹⁷Ano neitaalo osho li li: ngele eitaalo lyowala, lyaa na iilonga, nena eitaalo lya tya ngaaka olya sa.

¹⁸Ihe pamwe oku na ngoka ta ti: “Oku na omuntu gumwe e na eitaalo, manga mukwawo e na iilonga.” Eyamukulo lyandje olyo ndika: “Ulukila ndje, nkene omuntu ta vulu okukala e na eitaalo lyaa na iilonga. Ngame otandi ku ulukile wo eitaalo lyandje tali holoka miilonga.”

¹⁹Owi itaala kutya oku na owala Kalunga gumwe. Ou li mondjila. Oompwidhuli wo odhe shi itaala notadhi kakama kuumbanda.

²⁰Mugoya ngoye! Owa hala tuu, u ulukilwe kutya eitaalo lyaa na iilonga, itali tompola sha?

²¹Tatekulu Abraham okwa ningi ngiini omuyuuki koshipala shaKalunga? Osha zi miilonga ye, sho a ka yamba omwana Isak koshiyambelo.

²²U wete ko ano? Eitaalo lye niilonga ye oya longele kumwe; eitaalo lye olya hololwa nawa kiilonga ye.

²³Nenyolo wo olya tsa ndyoka tali ti: “Abraham okwi itaale Kalunga, nomolweitaalo lye Kalunga okwe mu tala omuyuuki.” Osho ngaaka Abraham okwi ithanwa kuume kaKalunga.

²⁴Ngashingeyi omu wete ko kutya omuntu ota ningi omuyuuki koshipala shaKalunga omolwiilonga ye, hamolweitaalo alike.

²⁵Osho sha li wo sha ningwa kohonda Rahab. Rahab okwa ningi omuyuuki koshipala shaKalunga omolwiilonga ye, sho e edhilile oondaadhi dhaJuda e te dhi pititha nondjila yilwe.

²⁶Onkee ano ngaashi naanaa omuntu ngele ke na omufudho, ta talwa a sa, osho wo neitaalo lyaa na iilonga, olya sa.