Read Oshindonga-Ombiimbeli Ondjapuki JAKOB 4 Bible Online

JAKOB 4 - Oshindonga-Ombiimbeli Ondjapuki bible

JAKOB 4

¹Omalugodhi noontamanana mokati keni ohayi zi peni? Ohayi zi muuhalu weni mboka tau kondjo aluhe momalutu geni.

²One omu na okahalu, ihe ihamu likola. Ohamu dhipaga nohamu haluka noonkondo, ihe itamu mono sha. Ohamu tamanana e tamu kondjo. Ne omu li moluhepo, oshoka inamu indila oompumbwe dheni kuKalunga.

³Nuuna tamu indile, itamu pewa, oshoka omalalakano geni omawinayi. Mbyoka tamu yi indile, ohamu ke yi longitha muuhalu weni yene.

⁴Kamu shi aainekelwa! Inamu tseya nani kutya okukala mu na uukuume nuuyuni okwo okutonda Kalunga? Ngoka a hala okukala e na uukuume nuuyuni, oti iningi e tonde Kalunga.

⁵Enyolo itali popi osima, sho tali ti: “Ombepo ndjika Kalunga e yi tula mutse, oku na uukodhi nayo.”

⁶Ihe esilohenda lyaKalunga oli na oonkondo li vule ayihe. Ongaashi enyolo tali ti: “Kalunga ota tondo mboka ye hole uuntsa, ihe ota sile ohenda mboka yi ifupipika.”

⁷Vulikeni ano kuKalunga. Kondjitheni Satana, ye note mu yi ontuku.

⁸Hedheni kuKalunga, ye nota hedha kune. Yelitheni iikaha yeni, ne aalunde. Opalekeni omitima dheni, ne aafudhime.

⁹Tseyeni uukweyi weni, seni oluhodhi ne mu lile. Okuyola kweni naku shituke okulila, nenyanyu lyeni nali ninge oluhodhi.

¹⁰Ifupipikeni koshipala shOmuwa, oye note mu nenepeke.

¹¹Aamwameme, inamu lundilathana. Ngoka ta lundile mukwawo nenge te mu pangula, oye ota lundile ompango e te yi pangula. Ngele oto pangula ompango, nena ito vulu we oku yi gwanitha, ihe oto ningi omupanguli gwayo.

¹²Kalunga oye omugandjimpango nomupanguli. Oye awike ta vulu okuhupitha nokweekelahi. Ongoye lye ano, u vule okupangula mukweni?

¹³Ano pulakenii ndje, ne mboka hamu ti: “Nena nenge ngula otatu ka ya koshilando shontumba noshongandi. Otatu ka ninga ko omumvo, tatu halitha e tatu likola iimaliwa oyindji.”

¹⁴Kamu shi wo, ngele ngula omutse otagu ka kala kumwe nothingo! One omwa fa etsinauko lyolwithi, ndyoka tali holoka okathimbo, notali kana po.

¹⁵Omu na okutya: “Omuwa ngele e shi hala, otatu ka kala tu na omwenyo, e tatu longo shika naashiyaka.”

¹⁶Ihe ngashingeyi omu na uuntsa neitango; eitango lya tya ngeyi olya puka.

¹⁷Onkee ano ngoka e shi kutya oku na okulonga uuwanawa, ndele ite shi ningi, oye oku na oondjo.