Read Oshindonga-Ombiimbeli Ondjapuki JAKOB 5 Bible Online

JAKOB 5 - Oshindonga-Ombiimbeli Ondjapuki bible

JAKOB 5

¹Ne aayamba, pulakenii ndje! Lileni ne mu kuge kuupyakadhi mboka tau mu adha.

²Uuyamba weni owo ola noonguwo dheni odha lika koothithi.

³Oshingoli noshisiliveli sheni oya lika kevi, naashika otashi ka ninga onzapo yoku mu pa uusama. Evi ndika otali ka lya onyama yeni ngomulilo. Omwi igongelele uuyamba pomasiku ngaka gopehulilo.

⁴Aantu mboka ye mu longele omapya, inamu ya futa ondjambi yawo. Pulakeneni, sho taa nyenyeta! Omalilo gaamboka ye mu teyele iilya, oga thiki momakutsi gaKalunga, Omuwa Omunankondoadhihe.

⁵Okukalamwenyo kweni kwokombanda yevi okwa kala meloolo nomelalangali. Omwi iyondodhele esiku lyokutselwa kweni.

⁶Omwa pangula nomwa dhipaga aantu inaa yona sha, yo inaye mu kondjitha.

⁷Aamwameme, kaleni nokwiidhidhimika, sigo uuna Omuwa te ya. Taleni omunepya, nkene ha kala a tegelela neidhidhimiko, epya lye li mu pe eteyo olindji. Oye oha tegelele neidhidhimiko omvula yetemuno noyothinge.

⁸Nane wo omu na okwiidhidhimika. Ituleni omukumo, esiku lyokugaluka kwOmuwa oli li popepi.

⁹Aamwameme, inamu halelathana uuwinayi, opo Kalunga kee mu pangule. Omupanguli oku li popepi posheelo.

¹⁰Aamwameme, dhimbulukweni aahunganeki mboka ya popi medhina lyOmuwa. Ya holeleni mokwiidhidhimikila omaudhigu.

¹¹Tse otatu ya tala aanelago, sho yi idhidhimike. One omu uvu eidhidhimiko lyaJob nomwa tseya, nkene Omuwa e mu kwatha pehulilo. Oshoka Omuwa oye omunesilohenda nomunalukeno.

¹²Aamwameme, komeho gaayihe inamu gana, nge tamu ningi euvaneko. Inamu gana kegulu nenge kevi nenge kushaa shoka. Tyeni owala “Eeno,” uuna mwa dhiladhila eeno, nosho wo “Aawe,” uuna mwa dhiladhila aawe, opo mwaa adhike kepangulo lyaKalunga.

¹³Oku na gumwe gwomokati keni e na uudhigu? Na galikane. Oku na gumwe e li menyanyu? Ni imbe omahambelelo.

¹⁴Oku na gumwe ta alukwa? Ni ithane aakuluntu yegongalo, ye mu galikanene noye mu gwayeke omagadhi medhina lyOmuwa.

¹⁵Egalikano lyomwiitaali otali aludha omuvu. Omuwa ota galulile omuvu uundjolowele we, noondjo dhe otadhi dhimwa po.

¹⁶Hempululilathaneni ano oondjo ne mu galikanenathane, nena otamu aludhwa. Egalikano lyomuyuuki oli na oonkondo okuninga sha.

¹⁷Elia wo okwa li omuntu e tu fa. Sho a galikana a mana mo, omvula yaa loke osha ningwa, noshilongo osha kala inaashi lokwa uule womimvo ndatu netata.

¹⁸Okwa galikanununa ishewe, kegulu nokwa zi omvula, nevi olya menitha iimeno.

¹⁹Aamwameme, ngele oku na gumwe gwomokati keni ta puka mo moshili, naku kale ku na ngoka te mu galula.

²⁰Dhimbulukweni shika: Ngoka ta galula omulunde mondjila ya puka, ota hupitha omwenyo gwomulunde a tya ngaaka meso, noondjo odhindji otadhi dhimwa po.