Read Oshindonga-Ombiimbeli Ondjapuki 1 PETRUS 2 Bible Online

1 PETRUS 2 - Oshindonga-Ombiimbeli Ondjapuki bible

1 PETRUS 2

¹Etheni ano uuwinayi auhe niifundja, uufudhime, efupa noohapu adhihe dhomahokolo.

²Ihe kaleni onguuhanona mwa sa enota aluhe lyomahinihini gopambepo. Ngele tamu ga nu, otamu koko e tamu hupithwa.

³Ongaashi enyolo tali ti: “One omwa makela uuwanawa wOmuwa.”

⁴Ileni kOmuwa, okemanya li na omwenyo, lye ekelwahi kaantu ongolyaa na oshilonga, ihe Kalunga okwe li hogolola nokwe li tala li na oshilonga.

⁵Ileni ongomamanya ge na omwenyo, mu igandje e tamu ningi iitungitha yotempeli yopambepo. Muka otamu ka ninga aayambi aayapuki yokuyamba omayambo gopambepo noga hokiwa kuKalunga molwaJesus Kristus.

⁶Oshoka enyolo otali ti: “Onda hogolola emanya lya simana, ndyoka tandi li ningi ngashingeyi emanya lyokolonela muSion. Nakehe ngoka te mu itaale, ita sithwa ohoni.”

⁷Emanya ndika oli na oshilonga oshinene kune mboka mwi itaala; ihe kumboka inaa itaala: “Emanya tuu ndyoka aatungi ye li ekelehi, olya ningi emanya li na oshilonga li vule agehe.”

⁸Enyolo ekwawo otali ti: “Emanya ndika otali pundukitha aantu. Emanya ndyoka tali ya gwilitha po.” Oyo otaa punduka, oshoka inaa itaala ohapu ndjika. Shika osho Kalunga a li e ya halela.

⁹Ihe one ezimo lya hogololwa, aayambi yOmukwaniilwa, oshigwana oshiyapuki, aantu yaKalunga mwene mwa hogololwa, mu hokolole iilonga ye iinene. Kalunga okwe mu ithana mo momilema, mu ye muuyelele we uukumithi.

¹⁰Nale kamwa li aantu yaKalunga, ihe ngashingeyi omwa ningi aantu ye. Nale omwa li inaamu tseya esilohenda lyaKalunga, ihe ngashingeyi omu li shi.

¹¹Aaholike, one oondjendi naakwiilongo muuyuni mbuka. Onkee otandi mu kumagidha, inamu etha, mu pangelwe kuuhalu wopantu mboka tau hindi aluhe omwenyo.

¹²Kaleni wo mu na omikalo omiwanawa mokati kaapagani, opo uuna taye mu lundile kutya one aayoni, ya dhimbulule iilonga yeni iiwanawa noya ka hambelele Kalunga mesiku ndyoka te ke ya.

¹³OmolwOmuwa vulikeni kepangelo kehe lyokombanda yevi: Komupangeli, ngoka e li kombanda yaayehe,

¹⁴nokaaleli mboka ye li kohi yepangelo lye, oomboka ya tumwa okugeela aayoni nokupandula mboka haa longo uuwanawa.

¹⁵Oshoka Kalunga okwa hala, mu mweneke okupopya kwaagoya niilonga iiwanawa.

¹⁶Kaleni mu na emanguluko, ndele emanguluko lyeni inamu li longitha okusiikila uukolokoshi, ihe kaleni ongaapiya yaKalunga.

¹⁷Simanekeni aantu ayehe, holeni ooitaali ooyakweni, tileni Kalunga ne mu simaneke omupangeli.

¹⁸Aalelwa, vulikeni kooyene yeni ne mu ya simaneke. Inamu vulika owala kwaamboka aawanawa naanambili, ihe nokumboka wo ye na onyanya.

¹⁹Kalunga ote ke mu yambeka, ngele tamu idhidhimikile omahepeko, naasho mwa tseya kutya shika osho ehalo lye.

²⁰Oshoka otashi mu kwatha shike, ngele tamu idhidhimikile omadhengo, ihe nani omwa yona? Ihe ngele tamu idhidhimikile omahepeko nuuna inaamu yona sha, nena Kalunga ote shi mu yambekele.

²¹Oshoka oshinima sha tya ngeyi osho Kalunga e mu ithanene. Oshoka Kristus wo okwa hepekwa omolweni nokwe mu thigile oshiholelwa, opo mu landule ondjila ndjoka a li e yi ende.

²²Oye ina yona nando; kaku na omuntu gumwe u uvu iifundja yasha tayi zi mokana ke.

²³Ina tuka mboka ye mu tuku; naasho a hepekwa, ina sa ondjahi, ihe okwi inekele Kalunga, omupanguli omuyuuki.

²⁴Kristus okwa humbata oondjo dhetu komapepe ge sigo okomushigakano, opo tu vule okumanguluka muulunde, tu ninge aayuuki. One omwa aludhwa kiilalo ye.

²⁵Omwa li mwa fa oonzi dha kana, ihe ngashingeyi omwa galulilwa kegumbo, opo mu landule omusita nomutekuli gwoomwenyo dheni.