Read Oshindonga-Ombiimbeli Ondjapuki 1 PETRUS 3 Bible Online

1 PETRUS 3 - Oshindonga-Ombiimbeli Ondjapuki bible

1 PETRUS 3

¹Osho ngeyi ne wo aakiintu, vulikeni kaalumentu yeni, opo aalumentu mboka inaa itaala oohapu dhaKalunga, ya falwe meitaalo komikalo dheni. Itamu pumbwa oku shi ninga noohapu,

²oshoka oyo otaa ka mona, nkene omikalo dheni dha yogoka nonkene hamu simaneke Kalunga.

³Inashi pumbiwa okwiiyopaleka nomaulenga gokombanda, ngaashi kombinga yomitse, etheni okuzala omagwe noonguwo dhuuyamba. Ihe eopalo lyeni nali kale ndyoka lyomeni.

⁴Eopalo itaali hulu po lyombepo yi na ombili noya ngungumana, olyo ndyoka li na oshilonga oshinene koshipala shaKalunga.

⁵Oshoka aakiintu mbeyaka yonale yi ikwatelela muKalunga, osho yi iyopaleke ngaaka. Oya vulika kaalumentu yawo.

⁶Sara osho a li ngaaka; okwa vulika kuAbraham nokwe mu ithana “omuwa gwandje”. Ne aana aakadhona yaSara, ihe ongele tamu longo uuwanawa nokamu na uumbanda washa.

⁷Ne wo aalumentu, mokukalathana kweni naakiintu yeni omu na okutseya kutya oya fa iiyuma yeloya, onkee omu na oku ya simaneka. Oshoka nayo wo Kalunga ote ke ya pa pamwe nane omwenyo omagano. Shika shi ningeni, opo omagalikano geni gaa piyaganekwe kusha.

⁸Pafupi nandi tye: ne omu na okukala mu na edhiladhilo limwe neuvitopamwe. Kaleni mu holathane ongaamwayinathana. Silathaneni ohenda ne mu ifupipikilathane.

⁹Ngoka te mu ningile uuwinayi nenge te mu thingi, inamu mu thinga. Ihe mu shunithileni elaleko nuuyamba, oshoka eyambeko olyo Kalunga e mu uvanekela, sho e mu ithana.

¹⁰Ngaashi enyolo tali ti: “Ngoka a hala okunyanyukilwa okukalamwenyo nokumona omasiku ge na elago, ne ethe okupopya uuwinayi, nomilungu dhe inadhi pititha iifundja.

¹¹Na ze mo miilonga iiwinayi, a longe uuwanawa. Na konge ombili e te yi lalakanene.

¹²Oshoka omeho gOmuwa oge wete aayuuki, naaluhe ota pulakene omaindilo gawo; ihe ota thigi po mboka haa longo uuwinayi.”

¹³Olye te mu etele oshiponga, ngele otamu lalakanene okulonga uuwanawa?

¹⁴Nongele omu na okwaadhika komahepeko, sho hamu longo shoka shu uka, one aanelago. Inamu tila aantu ne inamu kala mwa piyagana.

¹⁵Ihe simanekeni Kristus momitima dheni ne mu mu ninge Omuwa gweni. Kaleni mwi ilongekidha aluhe okuyamukula kehe ngoka te mu pula okufatulula etegameno ndyoka li li mune.

¹⁶Ihe shi ningeni nombili nesimaneko. Kaleni mu na eiyuvo ewanawa. Ngele tamu dhiginine omikalo omiwanawa dhaalanduli yaKristus, aasheki yeni otaa sithwa ohoni kokupopya kwawo.

¹⁷Oshoka okuhepekelwa iilonga iiwanawa, ngele oshi li pahalo lyaKalunga, oshi vule okuhepekelwa lilonga iiwinayi.

¹⁸Oshoka Kristus okwa si omolweni; okwa si lumwe aluke omolwoondjo, omuyuuki omolwaalunde, opo e mu fale kuKalunga. Oye okwa dhipagwa palutu nokwa tulwa omwenyo pambepo;

¹⁹nomokukala kwopambepo okwa yi e tu uvithile oombepo moshaasi.

²⁰Oombepo ndhika odho aantu mboka inaa vulika kuKalunga, sho a tegelele neidhidhimiko eitedhululo lyawo pomasiku ngoka Noa a tungu onguluwato. Monguluwato omwa hupithilwa aantu yahetatu ayeke komeya.

²¹Omeya ngaka ogo efano tali ulike eshasho ndyoka tali mu hupitha ngashingeyi. Eshasho ihali theta po ongaga yokolutu, ihe mulyo otatu pula, Kalunga e tu pe eiyuvo ewanawa omolweyumuko lyaJesus Kristus.

²²Oye okwa londo a yi megulu noku li kolulyo lwaKalunga ta pangele aayengeli, aapangeli yomegulu naanankondo.