Read Oshindonga-Ombiimbeli Ondjapuki 1 PETRUS 4 Bible Online

1 PETRUS 4 - Oshindonga-Ombiimbeli Ondjapuki bible

1 PETRUS 4

¹Ano Kristus sho e ehamekwa palutu, nane wo ikumikeni nelalakano ndika. Oshoka kehe ngoka te ehamekwa palutu, oye ote etha uulunde.

²Onkee ano okuza kongashingeyi methimbo ndyoka lya hupu ko lyokukalamwenyo kweni kwokombanda yevi, inamu etha, mu pangelwe kuuhalu wopantu, ihe pangelweni kehalo lyaKalunga.

³Oshoka osha gwana, sho mwa kala nale hamu longo iilonga ya faathana noyaapagani. Omwa kala muukeeneidhiliko, muuhalu, muunkolwi, muufukedhi, momanwino nomiihuna yesimaneko lyiimenka.

⁴Onkee ano aapagani oya kumwa notaye mu sheke nokuli, sho itaamu ya holele mokukala muuholume nomokwaaidhilika.

⁵Ihe oye na oku ki ihokolola koshipala shaKalunga, ngoka ta ka pangula aanamwenyo naasi.

⁶Shika osho sha ningitha, elaka etoye li uvithilwe wo aasi, oomboka mokukala kwawo kombanda yevi ya pangulwa ngaashi aantu ayehe. Oyo oyu uvithilwa, opo mokukalamwenyo kwawo kwopambepo ya kale ye na omwenyo, ngaashi Kalunga e na omwenyo.

⁷Ehulilo lyiinima ayihe oli li popepi. Omu na okwiikwata nawa nomwa tonata, opo mu vule okugalikana.

⁸Komeho gaayihe holathaneni nomwenyo aguhe, oshoka ohole ohayi siikile omayono ogendji.

⁹Yakuleni aayenda momagumbo geni mwaa na omangungutulo.

¹⁰Kehe gumwe na longithe omagano ngoka e ga pewa okukwatha yakwawo, ongaashi sho opalela aatonateli aawanawa yomagano gaKalunga gi ili nogi ili.

¹¹Ngoka tu uvitha, nu uvithe oohapu dhaKalunga. Ngoka ta yakula, na yakule koonkondo ndhoka e dhi pewa kuKalunga. Opo kehe shimwe shi simanekithe Kalunga molwaJesus Kristus, ngoka e na eadhimo noonkondo aluhe sigo aluhe. Amen.

¹²Ookuume kandje aaholike, inamu kuminwa emakelo elulu ndyoka mu li mulyo ngashingeyi ongoshinima inaamu shi mona nale.

¹³Ihe nyanyukweni, sho mu na oshitopolwa momahepeko gaKristus, opo mu ka nyanyukwe nokuligola, uuna eadhimo lye tali ka hololwa.

¹⁴Ngele otamu shekwa molwaasho tamu landula Kristus, one aanelago, oshoka Ombepo yuuyelele, Ombepo yaKalunga, oyi li kombanda yeni.

¹⁵Inaku kala gumwe gwomokati keni ta hepekwa molwaasho oye omudhipagi nenge omufuthi nenge omukolokoshi nenge ngoka hi itula miinima yayakwawo.

¹⁶Ihe ngele otamu hepekwa molwaasho one aakriste, inamu sa ohoni, ihe panduleni Kalunga, sho mu na edhina lyaKristus.

¹⁷Ethimbo lyepangulo lyaKalunga olya thikana, naantu yaKalunga otse tatu pangulwa tango. Ngele epangulo otali tameke natse, ehulilo lyalyo otali ka kala lya tya ngiini kumboka inaa itaala elaka etoye lya za kuKalunga?

¹⁸Ongaashi enyolo tali ti: “Ngele ehupitho lyomuyuuki okonyala, ngoka kee na Kalunga nomulunde ota ningwa ngiini?”

¹⁹Onkee ano mboka taa hepekwa molwaasho ehalo lyaKalunga osho tali ti, naa longe uuwanawa nokwiiyethela mOmushiti gwawo omwiinekelwa.