Read Oshindonga-Ombiimbeli Ondjapuki 1 PETRUS 5 Bible Online

1 PETRUS 5 - Oshindonga-Ombiimbeli Ondjapuki bible

1 PETRUS 5

¹Aakuluntu yegongalo lyaKalunga yomokati keni otandi ya kumagidha, ngame nguka omukuluntu mukweni. Ongame onzapo yomahepeko gaKristus nondi na oshitopolwa meadhimo ndyoka tali ka hololwa. Otandi mu kumagidha:

²Kaleni aasita yoshigunda shoka mwe shi pewa kuKalunga, mu shi tonatele nehalo ewanawa, hakethiminiko. Inamu longa nelalakano tali sitha ohoni lyokukonga eliko, ihe onehalo tali zi momwenyo.

³Inamu pangela mboka ya tulwa metonatelo lyeni, ihe kaleni mu shi kuholelwa kegongalo.

⁴Nena Omusitawiliki ngele ta holoka, otamu ka pewa oshishani sheadhimo itaali kana.

⁵Ne aagundjuka, vulikeni kaakuluntu. Amuhe zaleni eifupipiko, opo mu vule okuyakulathana. Oshoka enyolo otali ti: “Kalunga oha tondo aainenepeki, ihe oha sile ohenda aaishonopeki.”

⁶Onkee ano ishonopekeni kohi yoshikaha shoonkondo shaKalunga, opo e mu nenepeke pethimbo lye.

⁷Mu tsikeni iimpwiyu yeni ayihe, oshoka oye omusilishimpwiyu gweni.

⁸Kotokeni ne mu tonate! Oshoka omutondi gweni Satana ohe mu kundukidha, ta ndunduma a fa onime, ta kongo ngoka, te mu ninagula po.

⁹Kaleni mu na eitaalo lya kola, opo mu vule oku mu kondjitha. Oshoka omwa tseya nooitaali ooyakwetu yomuuyuni auhe otaa pitile momahepeko ogo tuu ngoka.

¹⁰Ihe omahepeko ogokathimbo kowala. Kalunga kesilohenda alihe okwe mu ithana, mu ye meadhimo lye lyaaluhe muukumwe naKristus. Oye ote mu longekidha, te mu pe oonkondo, te mu koleke note mu tula kekankameno lya kola.

¹¹Oye na pangele aluheluhe! Amen.

¹²Ontumwafo ndjika ofupi onde yi nyola kekwatho lyaSilvanus, omwiitaali mukwetu ngoka nde mu inekela. Onda hala oku mu kumika noku mu hokololela kutya ndika olyo esilohendalela lyaKalunga. Kaleni mwi ikolelela mulyo.

¹³Egongalo ekweni lyomuBabilon ndyoka lya hogololwa wo kuKalunga, otali mu kundile po. Osho wo omumwandje Markus ote mu kundile po.

¹⁴Kundilathanii po nohole yopakriste. Ombili nayi kale nane amuhe mboka yaKristus.