Read Oshindonga-Ombiimbeli Ondjapuki 2 PETRUS 2 Bible Online

2 PETRUS 2 - Oshindonga-Ombiimbeli Ondjapuki bible

2 PETRUS 2

¹Ngaashi naanaa aahunganeki aafundja ya kala nale haa holoka mokati kaantu, osho wo aalongi aafundja otaa ka holoka mokati keni. Oyo otaa ke eta omalongo tage mu yono po nogaa na oshili. Aantu ya tya ngaaka otaa ki idhimbika Omuwa ngoka e ya kulile e taa iyetele ehanagulo lyombadhilila.

²Aantu oyendji otaa ka holela uukeeneidhiliko wawo, nomolwiilonga yawo aantu otaa ka sheka ondjila yoshili.

³Omolwolwiho lwawo aalongi mbaka aafundja otaye mu hokololele iifundja, opo ye mu likole. Ihe nkene ya kala, omupanguli gwawo okwi ilongekidha, nomuhanaguli gwawo oku li popepi.

⁴Oshoka Kalunga ine etha inaa geela aayengeli mbeyaka ya yono, ihe okwe ya umbile moheli, moka ye li mo ya mangwa nomalyenge, ya tegelela esiku lyepangulo.

⁵Kalunga ine etha inaa geela uuyuni mbwiyaka wonale waakeenakonasha naye, ndele okwe u tumine eyelu. Noa, omuuvithi guuyuuki, oye awike a hupithwa kuKalunga pamwe nooyakwawo yaheyali.

⁶Kalunga okwa geele iilando mbiyaka Sodom naGomorra, sho e yi hanagula po nomulilo, u ulukile aakeenakonasha naKalunga shoka taa ka ningwa.

⁷Ihe oye okwa hupitha Lot, omulumentu omuyuuki, ngoka a li u uvite nayi kuukeeneidhiliko waakeenompango.

⁸Omuyuuki nguka okwa kala mokati kawo, nesiku kehe oku uvu nokwa mono iilonga yawo iiwinayi e tayi alula omutima gwe omuyogoki.

⁹Ano Omuwa oku shi shi, nkene e na okuhupitha aantu ye momamakelo ngoka tage ya adha. Ihe oye ota geele aakolokoshi sigo omesiku lyepangulo,

¹⁰unene mboka taa landula uuhalu wa nyata wopantu e taa dhini oonkondo nepangelo lyaKalunga. Aalongi aafundja ya tya ngeyi oyo aalaadhi naatuwalali noihaa tila okusheka iikwayadhimo yomegulu.

¹¹Naayengeli mboka ye na uukolele noonkondo ye vule aalongi mbaka aafundja, ihaye ya tamanekele okusheka kwawo koshipala shaKalunga.

¹²Aantu ya tya ngeyi pakukala kwawo oya fa iiyamakuti ya valelwa okukwatwa nokudhipagwa. Otaa sheke iinima kaaye yi shi, notaa ka yonwa po ya fa iiyamakuti.

¹³Aantu mbaka otaa ka geelelwa uukolokoshi wawo. Nopokati komutenya ohaa nyanyukilwa okulonga shaa shoka tashi opalele uuhalu womalutu gawo. Osho esithahoni nesheko, ngele taa kala pamwe nane piililo yeni, kombinga onkwawo ohaa kala moohedhi dhawo oombwinayi.

¹⁴Itaa kongo sha shilwe shaa shi aakiintu aaholume. Ihaa kuta okulonga uulunde. Otaa kwatitha aantu mboka aankundi komwigo. Oomwenyo dhawo odha dheulilwa olwiho. Oye li kohi yethingo lyaKalunga.

¹⁵Oyo oye etha ondjila yu uka e taa kana. Oyo oya landula ondjila ndjoka ya landulilwe kuBileam, omuna gwaBeor, sho a hokwa iimaliwa e ta longo shoka sha puka.

¹⁶Oye okwa pukululilwa eyono lye. Okasino ihaaka popi, oka popi ka fa omuntu noka mweneke iilonga yuugoya yomuhunganeki nguka.

¹⁷Aantu ya tya ngeyi oya fa owala oothithiya dha kukuta niikogo ya halakanithwa koshikungulu shombepo. Kalunga okwe ya yoololela eha molumbogo lwomuule.

¹⁸Oyo ohaa popi iitya yuuntsa noyu udha uugoya. Mboka taa kambadhala okuyanda aantu mboka ye li momapuko, ohaa yulwa nuuhalu wopalutu nonuukeeneidhiliko.

¹⁹Aapukithi otaye ya uvanekele emanguluko, manga yo yene ya ningwa aapika komikalo tadhi ya fala meyonuuko. Oshoka omuntu ota ningwa omupika kukehe shoka tashi mu pangele.

²⁰Oshoka aantu mboka ya li ya yi ontuku eolelo lyomuuyuni, sho ya tseya Omuwa gwetu nOmukulili Jesus Kristus, ngele taa shuna ishewe meolelo ndyoka e taa sindwa, nena ohugunina yaantu ya tya ngaaka otayi ka ninga ombwinayi yi vule yopetameko.

²¹Ando okwa li inaa tseya ondjila yuuyuuki, ando ihwepo shi vule, sho ye yi shi e taa etha ompango ondjapuki ndjoka ye yi pewa.

²²Shoka tashi ya adha, otashi holola kutya eyele olyoshili ndyoka tali ti: “Ombwa otayi galukile konkungo,” na: “Oshingulu sha yogwa otashi galangata ishewe mondoya.”