Read Oshindonga-Ombiimbeli Ondjapuki 1 JOHANNES 3 Bible Online

1 JOHANNES 3 - Oshindonga-Ombiimbeli Ondjapuki bible

1 JOHANNES 3

¹Taleni ohole mpoka yi thike, Tate sho e tu hole! Ohole ye oyi li po onene, sho tse hatu ithanwa aana yaKalunga. Osho oshili kutya tse oyana. Onkee ano uuyuni inau tu tseya, oshoka owo inau tseya Kalunga.

²Ookuume kandje aaholike, otse aana yaKalunga ngashingeyi, ihe inashi yela natango kutya otatu ka kaleni twa tya ngiini! Ihe otu shi shi kutya uuna Kristus ta holoka, otatu ka ningeni twe mu fa, oshoka otse otatu ke mu mona, ngashika naanaa e li.

³Kehe ngoka e na etegameno ndika muKristus, oti ikaleke a yela ngashika Kristus.

⁴Kehe ngoka ta yono, oye oku na ondjo yokuyona ompango yaKalunga, oshoka uulunde owo okuyona ompango.

⁵One omu shi shi kutya Kristus okwa holoka, opo a kuthe po oondjo dhaantu, nomuye kamu na nando oondjo.

⁶Onkee ano kehe ngoka e li muKristus, oye ita longo uulunde. Ngoka ta longo uulunde, oye ine mu mona nando olumwe ye inee mu tseya.

⁷Aamwandje, inamu etha, mu pukithwe nando okulye. Kehe ngoka ta longo shoka shu uka, oye omuyuuki ngashika Kristus omuyuuki.

⁸Kehe ngoka ta longo uulunde, oye ota longithwa komuhindadhi, oshoka omuhindadhi nkene a kala oha longo uulunde. Onkee ano Omuna gwaKalunga okwa holoka, opo a hanagule po iilonga yomuhindadhi.

⁹Shaa ngoka e li omuna gwaKalunga, oye ita longo uulunde, oshoka okukala kwaKalunga oku li muye. Onkee ano shoka Kalunga oye He, ita vulu okulonga uulunde.

¹⁰Eyooloko pokati kaana yaKalunga naana yomuhindadhi opo li li mpa: Shaa ngoka itaa longo shoka shu uka nenge kee hole mukwawo, oye ke shi omuna gwaKalunga.

¹¹Oshoka elaka ndyoka twe li uvu okuza ketameko olyo ndika: otse otu na okuholathana.

¹²Inatu kaleni twa fa Kain, ngoka a li ta longithwa komuhindadhi nokwa dhipaga po omumwayina. Omolwashike ano Kain a dhipaga mumwayina? Omolwaashoka iilonga yaKain ya li ya puka, ihe iilonga yomumwayina oya li yu uka.

¹³Aamwameme, inamu kumwa, aantu yomuuyuni ngele taye mu tondo.

¹⁴Tse otu shi shi kutya otwa za mo meso notwe ya momwenyo, oshoka tse otu hole ooyakwetu. Ngoka ke na ohole, oku li natango meso.

¹⁵Kehe ngoka e tonde mukwawo, oye omudhipagi. One omu shi shi kutya omudhipagi kee na omwenyo gwaaluhe.

¹⁶Ohole otwe yi tseya kutya oyo oshike. Oyo ndjika kutya Kristus okwa si peha lyetu. Ano natse wo otu na okuhupula oomwenyo dhetu omolwooyakwetu.

¹⁷Ngele ku na ngoka e na uuyamba wiinima yomuuyuni mbuka, nota mono mukwawo a hepa e ta kala inee mu pa sha, omuntu a tya ngaaka ota vulu ngiini okutya, ye oku na ohole yaKalunga momwenyo gwe?

¹⁸Aamwandje! Ohole yetu inayi kala ashike moohapu nomokupopya, aawe, nayi kale ohole yashili, ndjoka tayi iholola yo yene miilonga wo.

¹⁹Opo tuu mpoka tatu idhimbulula kutya otu li moshili. Osho ngeyi otatu kala tu uvite omukumo okukala koshipala shaKalunga.

²⁰Oshoka eiyuvo lyetu ngele otali tu pe uusama, nena otu shi shi kutya Kalunga oye omunene e vule eiyuvo lyetu nokwa tseya iinima ayihe.

²¹Onkee ano, ookuume kandje aaholike, eiyuvo lyetu ngele itali tu pe uusama, nena otu na omukumo okuhedha koshipala shaKalunga.

²²Otse notatu pewa kuye ashihe shoka tatu mu indile, oshoka ohatu vulika kiipango ye nohatu longo shoka she mu opalela.

²³Oshipango she osho shika kutya tse otwi itaala edhina lyOmwana Jesus Kristus notu holathane, ngashika naanaa Kristus e tu lombwele.

²⁴Kehe ngoka ta vulika kiipango yaKalunga, oye oku li muKalunga, naKalunga oku li muye. Ombepo ndjoka e yi tu pa, oyo tayi ulike kutya Kalunga oku li mutse.