Read Oshindonga-Ombiimbeli Ondjapuki RUT 2 Bible Online

RUT 2 - Oshindonga-Ombiimbeli Ondjapuki bible

RUT 2

¹Naemi okwa li e na omunezimo Boas, omulumentu omuyamba nomusimani gwomezimo lyomulume Elimelek.

²Esiku limwe Rut okwa ti kuNaemi: “Andiya ndi ye komapya, ndi ka pupule nda landula olwenge lwaateyi. Ondi inekela kutya ote mono ngaa ngoka te shi pitikile ndje.” Naemi okwa yamukula ta ti: “Eewa, inda ano, mumwandje.”

³Osho Rut a yi komapya ta pupula a landula aateyi. Nani sho a yi, okwa yi mepya lyaBoas, omunezimo gwaElimelek.

⁴Ohaluka Boas okwe ya a zi kuBetlehem e ta kundu aateyi ta ti: “Omuwa na kale pamwe nane.” Yo oya yamukula taa ti: “Omuwa ne ku laleke nuuyamba.”

⁵Nena Boas okwa pula omuwiliki gwaateyi: “Omufuko ngoka ogwalye?”

⁶Omuwiliki okwa yamukula: “Oye omukwiilongo ngoka a zi kuMoab pamwe naNaemi.

⁷Okwa pula ndje, ndi mu zimine, a pupule a landula aateyi. Okwa tameke ongula onene nokwa thuwa po ashike okathimbo momuzile.”

⁸Nena Boas okwa ti kuRut: “Ndati, mumwandje: Ino ya komapya galwe, u ka pupule. Longa ashike pamwe naakiintu ooyakweni mpaka;

⁹yu undja mpoka taa teya, u kale pamwe nayo. Onda lombwele aamati yandje, yaaye ku piyaganeke. Nuuna wa sa enota, inda u ka nwe omeya miiyuma ya thikikwa.”

¹⁰Rut okwi isizimike omutse pevi nokwa ti kuBoas: “Omolwashike u na olukeno nangame, u sile ndje oshimpwiyu, nando ngame omukwiilongo?”

¹¹Boas okwa yamukula: “Ondu uvu ayihe mbyoka wa ningila nyokomweno okuza pomulumentu gwoye sho a mana oondjenda. Owa thigi po ho nanyoko noshilongo shaandjeni nowe ya okukala mokati kaantu kuu ya shi shitonale.

¹²Omuwa ne ku futile shoka we shi ningi. Kala u na ondjambi ya gwanenena ya za kOmuwa Kalunga kaIsrael, kungoka we ya okukonga egameno.”

¹³Rut okwa yamukula: “Tatekulu, ngoye owa sile ndje ohenda. Ondu uvite nawa, sho wa popitha ndje nombili, nando ngame ine gwana, onda fe gumwe gwomaapiya yoye.”

¹⁴Pethimbo lyomwiha Boas okwa lombwele Rut: “Ila, u pewe sha shokulya, u shi elele momahoka.” Osho ngeyi a kuutumba pamwe naateyi, Boas e te mu pe omaha ga yaywa. Rut okwa li e ta kuta nokwa hupitha ko.

¹⁵Sho a yi ishewe, a ka pupule, Boas okwa lombwele aateyi ta ti: “Mu pitikeni, a pupule pooha dhoondudhi, ne inamu mu indika. Shila oku mu homononena omitse dhimwe moondudhi, e dhi toole po.”

¹⁷Osho Rut a tsikile okupupula mepya sigo ongulohi. Sho a yungula, okwa mono mo oolata mbali dhiishokelya.

¹⁸Okwa kutha iilya e ta yi koshilando noku ulukile yinamweno shoka a gongele. Rut okwe mu pe wo iikulya mbyoka ya hupu komwiha.

¹⁹Naemi okwe mu pula: “Owa pupula peni nena? Owa teya mepya lyalye? Kalunga na laleke nuuyamba omulumentu ngoka e ku sile ohenda.” Osho Rut okwa hokololele yinamweno nokutya okwa teya mepya lyomulumentu edhina lye Boas.

²⁰Naemi okwi igidha a ti: “Omuwa na yambeke Boas! Omuwa oha dhiginine omauvaneko ge kaanamwenyo nokaasi.” Okwa tsikile ko ta ti: “Omulumentu ngoka ogwomezimo lyetu, oye gumwe gwomwaamboka ye na oku tu sila oshimpwiyu.”

²¹Nena Rut okwa ti: “Ndele okwa lombwele ndje wo, ndi tsikile ashike okupupula pamwe naateyi ye sigo opehulilo lyeteyo.”

²²Naemi okwa ti kuRut: “Eewa, mumwandje, oshe ku opalela okulonga pamwe naakiintu yaandjaBoas. Momapya gayalwe oto vulu okungwandjagulwa.”

²³Osho nduno Rut a pupula puyo, sigo iishokelya nosiima ya pu okuteywa. Okwa kala pamwe nayinamweno nombili.