Read Oshindonga-Ombiimbeli Ondjapuki RUT 3 Bible Online

RUT 3 - Oshindonga-Ombiimbeli Ondjapuki bible

RUT 3

¹Esiku limwe Naemi okwa ti kuRut: “Ondi na oku ku monena ombushiki, opo u mone elugo lyoye mwene.

²Dhimbulukwa kutya omulumentu nguka Boas ngu gwaakiintu mwa teya nayo, omukwetu. Pulakena nduno ngashingeyi. Ongulohi yonena ota ka yungulitha iishokelya.

³Iyoga ano e to igwayeke nde to zala nawa. Inda kolupale, ihe kambadhala, waa monike kuye, sigo naanaa a mana okulya nokunwa.

⁴Tala mpoka ta ka lala nongele a pwile moomposi, inda u yeluthe ekumbyatha e to lala poompadhi dhe. Nena ote ku lombwele shoka u na oku shi ninga.”

⁵Rut okwa yamukula: “Ote ningi ashihe to lombwele ndje.”

⁶Rut okwa yi kolupale e ta ningi naanaa, ngaashi yinamweno e mu lombwele.

⁷Boas sho a mana okulya nokunwa, okwa li a shambukwa. Okwa ka lala pondumba yiilya. Rut okwa gogonyotokele kuye e ta yelutha ekumbyatha e ta lala poompadhi dhe.

⁸Pokati kuusiku Boas okwa haluka e ta punguluka nokwa mono kutya omukiintu a lala poompadhi dhe.

⁹Okwe mu pula: “Ongoye lye?” Omukiintu okwa yamukula: “Ongame omuntu gwoye Rut, tatekulu. Shoka ngoye ogwomezimo lyetu, osho oshinakugwanithwa shoye okusila ndje oshimpwiyu.”

¹⁰Boas okwa ti: “Omuwa ne ku yambeke, mumwandje. Mushoka wa ningi ngashingeyi, owa holola ohole yuunezimo shi vule shoka wa ningile nyokomweno, sho inoo lambalala aalumentu aagundjuka, aayamba nenge oohepele.

¹¹Ino tila, Rut, otii ku ningile ashihe shoka to pula. Kehe omuntu moshilando shika okwa tseya kutya ngoye omukiintu wo opala.

¹²Eeno, oshoshili, ngame omunezimo nguka ndi na oku ku sila oshimpwiyu, ihe ope na gumwe gwomekoto e vule ndje.

¹³Kala mpaka uusiku mbuka. Ongula otatu tala, ngele te ku kutha po. Ngele te shi ningi, onawa, nongele ite shi ningi, nena ote gana kuKalunga omunamwenyo kutya otii ku sile oshimpwiyu. Lala ashike, u tege ku she.”

¹⁴Osho Rut a lala poompadhi dhaBoas, ihe okwa penduka, manga inaaku sha nawa, oshoka Boas ka li a hala, shi tseyike kutya Rut okwe ya kolupale.

¹⁵Boas okwa ti kuye: “Hula mo eguyo lyoye u liyale mpee.” Rut okwe shi ningi. Nena Boas okwa tile po oolata mbali dhiishokelya e te mu tsike kepepe lye. Rut okwa shuna koshilando.

¹⁶Sho e ya kegumbo yinamweno okwe mu pula: “Oshe ende ngiini?” Rut okwe mu hokololele ashihe e shi ningilwa kuBoas.

¹⁷Okwa gwedha ko ta ti: “Okwa lombwele ndje kutya itandi ya niikaha yowala kungoye, omolwasho a pe ndje iishokelya mbika ayihe.”

¹⁸Naemi okwa ti kuye: “Ngashingeyi idhidhimika, Rut, sigo to mono, ayihe mbika nkene tayi ende. Boas ita fudha, manga inaa tsakanitha oshinima shika.”