Read Oshindonga-Ombiimbeli Ondjapuki 2008 Genesis 14 Bible Online

Genesis 14 - Oshindonga-Ombiimbeli Ondjapuki 2008 bible

Genesis 14

¹Aakwaniilwa yane: Amrafel gwokuBabilonia, Arjok gwokuEllasar, Kedorlaomer gwokuElam naTidal gwokuGoiim.

²Oya ka hingila aakwaniilwa yakwawo yatano iita: Bera gwokuSodom, Birsha gwokuGomorra, Shinab gwokuAdma, Shemeber gwokuSeboim nomukwaniilwa gwaBela (kokutya gwaZoar).

³Aakwaniilwa mbaka yatano oya hangana e taa gongele omatangakwiita gawo molusilu lwaSiddim, mpoka pu na ngashingeyi Efuta lya sa.

⁴Oya adhika ya kala mepangelo lyaKedorlaomer omimvo omulongo nambali, ihe momumvo omutimulongo nomutitatu oya tsu ondumbo naye.

⁵Momumvo omutimulongo nomutine Kedorlaomer naamboka ya gama kuye, oye ya nomatangakwiita gawo e taa dhenge Aarafa muAshterot-Karnajim, Aasusi muHam, Aaemim molushandja lwaKirjatajim

⁶nAahori moondundu dhaEdom sigo okuElparan kooha dhombuga.

⁷Nena oya galuka e taye ya kuKadesh (haku tiwa Enmishpat). Oya lala evi alihe lyaAayamaleki e taa dhenge Aayamori mboka ya kala muHazazon Tamar.

⁸Nena aakwaniilwa gwaSodom, gwaGomorra, gwaAdma, gwaZebojim nogwaBela oya fala omatangakwiita gawo molusilu lwaSiddim e taa kondjitha

⁹aakwaniilwa mboka gwaElam, gwaGoiim, gwaBabilonia nogwaEllasar, aakwaniilwa yatano ya kondjitha aakwaniilwa yane.

¹⁰Ihe olusilu lwaSiddim olwa li lu udha iiko yi na onka yomevi, naakwaniilwa gwaSodom nogwaGomorra sho ya kambadhala okufadhuka po, oya gwile miiko, manga aakwaniilwa yakwawo yatatu ya yi ontuku koondundu.

¹¹Aakwaniilwa mboka yane oya yugu po shaa shoka muSodom nomuGomorra, osho wo iikulya, e taa yi.

¹²Lot, omwanagona gwaAbram, okwa li wo muSodom, onkee oye mu kwata po pamwe nomaliko ge agehe.

¹³Ihe omuntu gumwe okwi iyaka po e te ke shi lombwela Abram, Omuhebeli ngoka a li popepi noomwandi oondjapuki dhaMamre Omuamori. Mamre naamwayinamati Eshkol naAner oya li ye na ekwatathano naAbram.

¹⁴Abram sho a kundana kutya omwanagona a kwatwa po, okwa homateke aapiya ye aainekelwa ayehe mboka ye shi okukondja, ye li 318 ayehe kumwe, e taa landula aakwaniilwa mbeyaka yane sigo okuDan.

¹⁵Oko Abram a topola aantu ye moongundu e ta ponokele aatondi ye uusiku e te ya dhenge. Okwe ya tidha sigololo oHoba, kuumbugantu waDamaskus,

¹⁶e ta galula ko iihakanwa ayihe ya li ya kuthwa po. Okwa galula ko wo omwanagona Lot nomaliko ge agehe pamwe naakiintu noonkwatwa adhihe.

¹⁷Abram sho a galuka kokusinda Kedorlaomer naakwaniilwa ooyakwawo, omukwaniilwa gwaSodom okwe mu tsakaneke molusilu lwaShave (halu ithanwa wo Olusilu lwaakwaniilwa).

¹⁸Nena Melkisedek, omukwaniilwa gwaSalem, ngoka a li wo omuyambi gwaKalunga kokombandambanda, okwe etele Abram oshikwiila nomaviinu

¹⁹nokwe mu yambeke ta ti: “Kalunga kokombandambanda, ngoka a shiti egulu nevi, na yambeke Abram;

²⁰Kalunga kokombandambanda, ngoka e ku pe esindano okusinda aatondi yoye, na simanekwe!” Abram nokwa pe Melkisedek oshitimulongo shomiihakanwa ye ayihe e yi kutha miita.

²¹Omukwaniilwa gwaSodom okwa lombwele Abram a ti: “Kwatha ndje, u galulile ndje aantu yandje ayehe, ihe iihakanwa kala nayo.”

²²Abram okwa yamukula a ti: “Otandi gana koshipala shOmuwa, Kalunga kokombandambanda, omushiti gwegulu nevi,

²³kutya itandi tindile sha shoye, nando okashona, nando oluthipathipa nenge omuya gwoongaku, opo waa tye, owa yambapaleke Abram.

²⁴Itandi ikuthile sha. Otandi zimine owala shoka aantu yandje ya longitha mokulya. Ihe aalumentu mbaka twa li nayo: Aner, Eshkol naMamre, naa taambe oshitopolelwa shawo.”