Read Oshindonga-Ombiimbeli Ondjapuki 2008 Genesis 2 Bible Online

Genesis 2 - Oshindonga-Ombiimbeli Ondjapuki 2008 bible

Genesis 2

¹Ano osho ngeyi egulu nevi noongundu dhago adhihe odha pu okushitwa.

²Mesiku etiheyali Kalunga sho a tsakanitha iilonga ye ayihe yeshito, okwa vululukwa.

³Kalunga nokwa yambeke esiku etiheyali e te li yapula, oshoka okwa mana eshito lye alihe nokwa vululukwa kiilonga ye.

⁴Ndika olyo ehokololo lyeshito lyegulu nevi, sho ga shitwa. Omuwa Kalunga sho a shiti egulu nevi,

⁵kevi kakwa li ku na iihwa yokelundu nenge omwiidhi komalundu, oshoka okwa li inaa lokitha manga omvula, nokakwa li ngoka a longo evi,

⁶ihe oshimuke osha zi mevi e tali tosima.

⁷Omuwa Kalunga okwa kutha ontsi yevi e te yi umbu omuntu. Okwe mu fudhile ombepo yomwenyo momayulu, omuntu nokwa ningi omunamwenyo.

⁸Nena Omuwa Kalunga okwa toto eyana muEden, kuuzilo, nokwa langeke mo omuntu ngoka e mu shiti.

⁹Okwa menithile mo omiti dhomaludhi gi ili nogi ili dho opala dhokutalwa nodhokuliwa. Pokati keyana okwa menithile po omuti gwomwenyo nomuti gwokutseya uuwanawa nuuwinayi.

¹⁰Omulonga gwa tondoka muEden e tagu tutike eyana. Handiya yaEden ogwa topoka miimpanalonga ine.

¹¹Oshimpanalonga shotango oPishon tashi tondokele moshilongo ashihe shaHavila.

¹²(Oshingoli shoshilongo shika oshiwanawa, noku na wo iizimba iiwanawa nomamanya gondilo.)

¹³Oshimpanalonga oshitiyali oGihon tashi kunkula nevi alihe lyaKush.

¹⁴Oshimpanalonga oshititatu oTigris, shoka tashi tondokele kuuzilo waAssur, noshimpanalonga oshitine osho Eufrat.

¹⁵Omuwa Kalunga okwa langeke omuntu meyana lyaEden, opo e li longe ye e li keelele.

¹⁶Okwa ti kuye: “Lya komuti kehe meyana,

¹⁷kakele komuti gwokutseya uuwanawa nuuwinayi. Iiyimati yomuti ngoka ino yi lya; ngele oto shi ningi, oto si shili.”

¹⁸Omuwa Kalunga okwa popi e ta ti: “Inashi opala, omuntu i ikalele oye awike. Otandi mu shitile omukwathi e mu opalela.”

¹⁹Okwa kutha ontsi yevi e ta shiti iinamwenyo ayihe noondhila adhihe. Ayihe okwe yi eta komuntu a tale, nkene te yi luku omadhina gayo. Osho iinamwenyo ayihe oyi na omadhina gayo, ngaashi omuntu e yi luku.

²⁰Omuntu okwa luku iinamwenyo ayihe, oondhila adhihe niiyamakuti ayihe, ihe ini imonena omukwathi e mu opalela.

²¹Omuwa Kalunga okwa kotheke omuntu omposi ondhigu, nomanga a li a kotha, okwa kutha mo olupati lwe lumwe nopehala mpoka e lu kutha, okwa thitike po nontumba.

²²Olupati okwe lu shiti omukiintu e te mu eta komulumentu.

²³Omulumentu okwa ti: “Ndika esipa lyomomasipa gandje nonyama yomonyama yandje. Na lukwe omukiintu oshoka okwa kuthwa momulumentu.”

²⁴Omolwashika omulumentu oku na okuthiga po he nayina e ta kwatathana nomukadhi, oyo notaa ningi omuntu gumwe.

²⁵Omulumentu nomukiintu ayehe oya li omudhuu, ihe inaa saathana ohoni.