Read Oshindonga-Ombiimbeli Ondjapuki 2008 Genesis 21 Bible Online

Genesis 21 - Oshindonga-Ombiimbeli Ondjapuki 2008 bible

Genesis 21

¹Omuwa okwa yambeke Sara, ngaashi u uvaneka.

²Sara okwa ningi omusimba e ta valele Abraham okamati muukulupe. Okamati oka valwa pethimbo ndyoka Kalunga e li uvaneke.

³Abraham okwe ka luku Isak.

⁴Isak sho a gwanitha omasiku gahetatu, Abraham okwe mu fukalekitha, ngaashi Kalunga e mu lombwele.

⁵Abraham okwa li e na omimvo ethele, Isak sho a valwa.

⁶Sara okwa ti: “Kalunga okwa pe ndje enyanyu e tandi yolo. Shaa ngoka te shi uvu, ota ka yola pamwe nangame.”

⁷Sara okwa gwedha ko a ti: “Olye a li ta vulu okulombwela Abraham kutya Sara ona ka yamutha aanona? Onkene tuu onde mu valele okamati muukokele we.”

⁸Okamati oka koko, nuuna ndoka ka toya, Abraham okwa ningi oshituthi oshinene.

⁹Ihe Sara sho a mono okamati hoka Hagar Omuegipiti e ka valele Abraham, taka popi oohapu dhomasheko,

¹⁰okwa ti kuAbraham: “Tidha po omupika nguka nomwana. Omuna gwomukiintu nguka ke na okuthigulula uuthiga mboka tau thigululwa komumwandje Isak.”

¹¹Shika osha ningitha Abraham omwenyo omwiinayi, oshoka Ismael okwa li omwana.

¹²Ihe Kalunga okwa ti kuAbraham: “Ino ipyakidhila nomumati nonomupika gwoye Hagar. Gwanitha shoka Sara te ku lombwele, oshoka muIsak omo to mono oluvalo nde lu ku uvanekele.

¹³Omuna gwomupika otandi ke mu pa oluvalo olwindji nota ka ninga oshigwana, oshoka oye omumwoye wo.”

¹⁴Abraham okwa meneka e ta pe Hagar iikulya nombago yu udha omeya. Abraham okwa tsike Hagar e te mu laleke, a ye. Okwa yi e ta alaala nombuga yaBeersheba.

¹⁵Omeya sho ga pu po, okwa tula omunona poshihwa,

¹⁶e ta ka kuutumba oshinano shi thike peumbilo lyoshikuti. Okwi ipopile ta ti: “Itandi vulu okutala omumwandje ta si.” Okwa kuutumba mpoka e ta lili.

¹⁷Kalunga oku uvu elilo lyomunona, nomuyengeli gwaKalunga okwa popi megulu a lombwele Hagar a ti: “Hagar, oto lilile shike? Ino lila. Kalunga oku uvu elilo lyomunona, sho a lala mpee.

¹⁸Inda, u ke mu kuthe po. Otandi mu ningi oshigwana oshinene.”

¹⁹Kalunga okwa tonatitha omeho gaHagar e ta mono omuthima. Okwa yi e tu udhitha ombago omeya e ta nwetha omunona.

²⁰Kalunga okwa li pamwe nomunona mokukoka kwe. Okwa kala mombuga yaParan e ta ningi ondjumbeta.

²¹Mokukala kwawo mombuga yina okwe mu kongele omukiintu Omuegipiti.

²²Pethimbo ndyoka Abimelek nondjayi yiita ye Pikol oye ya kuAbraham noye mu lombwele ya ti: “Kalunga oku li pamwe nangoye mwaayihe mbyoka to ningi.

²³Ngashingeyi gana koshipala shaKalunga kutya ito kotokele ndje, naamwandje naatekulu yandje. Hololela ndje ohenda yoye, osho wo oshilongo moka u li mo, ngaashi ngame nde ku ningile.”

²⁴Abraham okwa yamukula a ti: “Otandi gana.”

²⁵Abraham okwa nyenyetele Abimelek molwomuthima ngoka aapiya yaAbimelek ye gu mu yugile.

²⁶Abimelek okwa ti: “Inandi tseya ngoka e shi ningi, nangoye ino shi lombwela ndje nando onale. Opo tandi shi uvu lwotango nena mpa.”

²⁷Nena Abraham okwa pe Abimelek oonzi noongombe noyo ayehe yaali oya ningi euvathano.

²⁸Abraham okwa yoolola oonzigona heyali moonzi dhe,

²⁹naAbimelek okwe mu pula ta ti: “Omolwashike we shi ningi?”

³⁰Abraham okwa yamukula a ti: “Taamba oonzigona ndhika heyali, shi ninge onzapo kutya ongame nda hupa po omuthima nguka.”

³¹Ehala ndyoka onkee lya lukwa Beersheba, molwashoka mboka yaali opo ya ganenathana.

³²Sho ya ningi euvathano puBeersheba, Abimelek naPikol oya shuna kuFilistea.

³³Nena Abraham okwa tsike omuti omutamariske muBeersheba, oye nokwa galikana Omuwa, Kalunga kaaluhe.

³⁴Abraham okwa kalele muFilistia ethimbo ele.