Read Oshindonga-Ombiimbeli Ondjapuki 2008 Genesis 22 Bible Online

Genesis 22 - Oshindonga-Ombiimbeli Ondjapuki 2008 bible

Genesis 22

¹Konima yaambika Kalunga okwa yeleke Abraham. Okwa ti kuye: “Abraham!” Abraham okwa yamukula a ti: “Ee!”

²Kalunga okwa ti: “Kutha omumwoye, epona lyoye Isak, ngoka u mu hole, ngoye u ye koshilongo shaMoria. Inda, u ke mu yambe, a ninge efikilondjambo kondundu ndjoka tandi yi ku ulukile.”

³Abraham okwa meneka ongula onene e ta kutile okasino, a kutha omwana Isak naapiya ye yaali. Sho a panda iikuni yefikilondjambo, okwa yi u uka kehala hoka a lombwelwa.

⁴Mesiku etitatu Abraham okwa lengalenga nokwa monene ehala ndyoka kokule.

⁵Nena okwa lombwele aapiya ye a ti: “Kaleni mpaka nokasino. Tse nomumwandjemati otatu yi tu ka galikane hwiyaka notatu ka galukila huka.”

⁶Abraham okwa tsike Isak iikuni yefikilondjambo, noye mwene okwa humbata omwele nomulilo. Manga ya li taa ende,

⁷Isak okwa pula he Abraham ta ti: “Tate!” He nokwa ti: “Ee.” Isak okwa ti: “Otu na omulilo niikuni, ihe onzi yefikilondjambo oyi li peni?”

⁸Abraham okwa yamukula a ti: “Kalunga mwene oti imonene.” Oyo noye ende pamwe ayehe yaali.

⁹Sho ya thiki kehala ndyoka Kalunga e li mu lombwele, Abraham okwa tungu oshiyambelo e ta tula ko iikuni. Okwa manga omwana Isak e te mu langeke koshiyambelo kombanda yiikuni.

¹⁰Okwa pweya mo omwele, e mu dhipage.

¹¹Ihe omuyengeli gwOmuwa okwe mu igidha megulu a ti: “Abraham, Abraham!” Abraham okwa yamukula a ti: “Ee!”

¹²Omuyengeli okwa ti kuye: “Oshikaha shoye ino shi gumitha omumwoye, u mu ningile ando uuwinayi washa. Ngashingeyi ondi shi shi kutya oho tila Kalunga, oshoka ino mu tindila omumwoye epona.”

¹³Abraham okwa lengalenga e ta mono onzi yi li mengande ya kwatwa komankono. Okwa yi e te yi patukununa mo nokwe yi yamba efikilondjambo peha lyomwana.

¹⁴Ehala ndyoka Abraham okwe li luku “Omuwa ti imonene.” Sigo onena aantu ohaa ti: “Okondundu yOmuwa ti imonene.”

¹⁵Omuyengeli gwOmuwa okwi ithana Abraham megulu lutiyali

¹⁶a ti: “Otandi iganene mwene — Omuwa osho ta ti — otandi ke ku yambeka. Molwashoka wa ningi shika noino tindila ndje omumwoye epona,

¹⁷Otandi uvaneke kutya otandi ku pe oluvalo olwindji lwa fa oonyothi dhokegulu nenge ehekevi lyomooha dhefuta. Oluvalo lwoye otalu ka sinda aatondi yalwo.

¹⁸Omungoye nomoluvalo lwoye aantu yomiigwana ayihe otaa ka lalekwa nuuyamba, oshoka owa vulika kelombwelo lyandje.”

¹⁹Abraham okwa shuna kaapiya ye, noyo ayehe oye ya kuBeersheba, nkoka Abraham a tula.

²⁰Konima yaambika Abraham okwa lombwelwa: “Milka ota mono aanona; okwa valele omumwanyoko Nahor aamati.”

²¹Osheeli oUz, taku landula Bus, Kemuel, he yaAram,

²²Kesed, Haso, Pildash, Jidlaf naBetuel.

²³Betuel ohe yaRebekka. Milka okwa valele Nahor, omumwayina gwaAbraham, aamati mbaka yahetatu.

²⁴Omukiintu gwaNahor gwoponto, edhina lye Reuma, okwa valele Nahor Tebak, Gaham, Tahash naMaaka.