Read Oshindonga-Ombiimbeli Ondjapuki 2008 Genesis 23 Bible Online

Genesis 23 - Oshindonga-Ombiimbeli Ondjapuki 2008 bible

Genesis 23

¹Sara okwa kala nomwenyo omimvo ethele nomilongo mbali naheyali.

²Okwa sile muHebron, kokutya Kiriatarba, mevi lyaKaanan, Abraham nokwe mu lili oosa.

³Nena Abraham okwa zi po pomudhimba gwomukadhi e ta lombwele Aaheti ta ti:

⁴“Ngame ondjendi ndi li mokati keni. Kwathii ndje, ndi lande kune eha, ndi fumvike mo omusi gwandje.”

⁵Oya yamukula ya ti:

⁶“Tatekulu, tu pulakena! Ongoye omuwiliki omunankondo mokati ketu. Fumvika mukadhoye mombila ombwanawa kwaadhihe ndhoka dhetu. Shaa ngoka gwomutse ota nyanyukwa oku ku pa ombila, opo u mu fumvike mo.”

⁷Nena Abraham okwi inyongamene pevi koshipala shawo

⁸e ta ti: “Ngele otamu pitika, ndi fumvike mukadhandje mpaka, kwathii ndje, mu pule Efron lyaZohar,

⁹a landithe ndje po ekololo lyaMakpela ontega nepya lye. Mu puleni, e li landithe po kungame ondando yalyo ya gwana po, opo li ninge lyandje mwene lyomayendo.”

¹⁰Efron mwene okwa li a kuutumba pamwe nAaheti pehala lyoshigongi posheelo shoshilando. Okwa yamukula montaneho yaantu ayehe a ti:

¹¹“Pulakena, tatekulu. Epya alihe otandi li ku pe nekololo ndyoka li li mulyo. Otandi li ku pe mpaka montaneho yaakwetu, opo u fumvike mo mukadhoye.”

¹²Abraham okwi inyongamene pevi koshipala shAaheti

¹³e ta ti kuEfron montaneho yaantu: “Kwatha ndje ngaa u pulakene. Epya alihe onda hala ndi li lande. Taamba iifuta yandje notii ka fumvika mo mukadhandje.”

¹⁴Efron okwa yamukula a ti:

¹⁵“Tatekulu, eyana ndyoka olyiimaliwa iisiliveli omathele gane, ihe kayi shi sha pokati ketu. Fumvika owala mukadhoye.”

¹⁶Abraham okwa zimine e te mu yelekithile omwaalu ngoka Efron a tomona montaneho yaantu — iimaliwa iisiliveli omathele gane pamuthika ngoka hagu yelekwa kaalandithi.

¹⁷Osho ngaaka eliko lyaEfron puMakpela, kuuzilo waMamre, olya ningi lyaAbraham, epya alihe nekololo ndyoka li li mo nomiti adhihe mepya nopooha dhalyo.

¹⁸Osha ziminwa kAaheti ayehe ya li moshigongi posheelo shoshilando.

¹⁹Abraham okwa fumvike mo omukadhi Sara mekololo ndyoka li li mevi lyaKaanan.

²⁰Osho ngaaka epya lyAaheti nekololo li li mulyo, olya ningi lyaAbraham lyomayendo.