Read Oshindonga-Ombiimbeli Ondjapuki 2008 Genesis 28 Bible Online

Genesis 28 - Oshindonga-Ombiimbeli Ondjapuki 2008 bible

Genesis 28

¹Isak okwi ithana Jakob e te mu laleke ta ti: “Ino hokana omukadhona Omukaanani.

²Inda kuMesopotamia, kaandjahokulu Betuel, u hokane gumwe gwomaana yahokulu Laban.

³Kalunga Omunankondoawike na yambeke ondjokana yoye, ye e ku pe aanona oyendji, opo u ka ninge he yiigwana oyindji!

⁴Ne ku yambeke noluvalo lwoye, ngaashi a yambekele Abraham; ne ku pe evi ndika, moka wa kala mo ondjendi naandyoka Kalunga e li pe Abraham!”

⁵Isak okwa laleke Jakob, a ye kuMesopotamia kaandjaLaban yaBetuel, Omuaramea, ngoka omumwayina gwaRebekka, yina yaJakob naEsau.

⁶Esau okwa koneke kutya Isak okwa yambeke Jakob e te mu laleke, a ye kuMesopotamia, a ka konge omukiintu. Okwa koneke wo kutya Isak mokuyambeka Jakob okwe mu lombwele, kaa hokane aakiintu Aakaanana.

⁷Okwe shi kutha mo wo kutya Jakob okwa vulika kuhe nayina e ta yi kuMesopotamia.

⁸Nena Esau okwa li wo u uvite kutya he ina hokwa aakiintu Aakaanana.

⁹Okwa yi kaandjaIsmael yaAbraham e ta hokana omwana Mahalat, omumwayina gwaNebaiot.

¹⁰Jakob okwa zi kuBeersheba u uka kuHaran.

¹¹Peningino lyetango okwe ya pehala eyapuki e ta yungu ontanda. Okwa lala a kothe, a gwila omutse gwe kemanya.

¹²Okwa yaguma e wete oshilondelo sha za pevi sha tsa megulu, naayengeli taa londo notaa kuluka ye li kusho.

¹³Omuwa mwene oku li kondungu yasho e ta ti kuye: “Ongame Omuwa, Kalunga kaAbraham naIsak. Evi ndika mpoka wa lala, otandi li ku pe noluvalo lwoye.

¹⁴Oluvalo lwoye otalu ka kala lu thike pontsi yevi, lwaa shi kuyalulwa. Otalu ka taandela kuuninginino nokuuzilo, kuumbangalantu nokuumbugantu. Mungoye nomoluvalo lwoye otandi ka yambekela iigwana ayihe kombanda yevi.

¹⁵Dhimbulukwa, otandi kala nangoye e tandi ku gamene shaa nkoka to yi, notandi ke ku galulila kevi ndika. Itandi ku etha, sigo nda gwanitha ayihe nde yi ku uvanekele.”

¹⁶Jakob okwa papudhuka po nokwa ti: “Omuwa oku li mpaka! Oku li mehala ndika, ngame inandi shi tseya!”

¹⁷Okwa li a tila e ta ti: “Ehala ndika etilithi ngiini! Mpaka ope na egumbo lyaKalunga, mpaka ope na osheelo shegulu.”

¹⁸Jakob okwa meneka ongula onene, okwa kutha emanya ndyoka a li a gwila ko omutse gwe e te li dhike, li ninge endhindhiliko. Nena okwa tile ko omagadhi gooholivi, opo e li yapulile Kalunga.

¹⁹Ehala ndika okwe li luku Betel, nando oshilando shoka nale okwa li hashi ithanwa Lus.

²⁰Nena Jakob okwa ganene Omuwa a ti: “Ngele oto kala pungame e to gamene ndje mondjenda ndjoka tandi ende e to pe ndje iikulya noonguwo,

²¹nongele tandi galukile kaandjatate, nena oto ningi Kalunga kandje.

²²Emanya ndika lyendhindhiliko nde li dhike, otali ka ninga ehala mpoka to galikanenwa, ongame notandi ke ku pa oshitimulongo mwaashihe shoka to shi pe ndje.”