Read Oshindonga-Ombiimbeli Ondjapuki 2008 Genesis 31 Bible Online

Genesis 31 - Oshindonga-Ombiimbeli Ondjapuki 2008 bible

Genesis 31

¹Jakob okwa kundana kutya aana yaLaban aamati otaa ti: “Jakob okwa kutha po iinima yatate ayihe. Uuyamba we auhe owatate.”

²Sho a tala oshipala shaLaban, kasha li sha fa ohela nuunambo, sho a li e na ombili.

³Omuwa okwa lombwele Jakob a ti: “Shuna koshilongo shooho nokaakweni, otandi kala pamwe nangoye.”

⁴Jakob okwa tumine Rakel naLea elaka, ya ye kuye kiimuna kelundu.

⁵Okwa ti kuyo: “Sho nda tala ho, ke na ombili nangame, ngaashi ha kala shito, ihe Kalunga katate oku li pungame.

⁶Ne amuhe omu shi shi, nkene nda longele ho noonkondo dhandje adhihe.

⁷Ndele okwa kotokele ndje nokulundulula ondjambi yandje lwomulongo. Ihe Kalunga ine mu pitika, a monithe ndje oshiponga.

⁸Shampa Laban a ti: ‘Iikombo yuutotono otayi ka ninga ondjambi yoye,’ likombo ayihe otayi vala owala uukombwena wuutotono. Uuna ta ti: ‘Iikombo yiiyala otayi ka ninga ondjambi yoye,’ iikombo ayihe otayi vala uukombwena wiiyala.

⁹Kalunga okwa kutha ho iimuna e te yi pe ndje.

¹⁰“Pethimbo lyeepepelo lyiimuna onda yaguma ndi wete iikombo iitsezi mbyoka ya li tayi epepele, ya li yi na iiyala, iimbathi nuutotono.

¹¹Omuyengeli gwaKalunga okwa lombwele ndje mondjodhi a ti: ‘Jakob!’ Onda yamukula: ‘Ee.’

¹²Okwa tsikile a ti: ‘Tala ko, iikombo ayihe iitsezi mbyoka tayi epepele, oyo oyi na iiyala, iimbathi nuutotono. Otandi ningi ngeyi, oshoka ondi wete Laban shoka te ku ningile.

¹³Ongame Kalunga ngoka nde ku ihololele puBetel, hoka wa yapula emanya li ninge endhindhiliko, sho wa tilile ko omagadhi gooholivi nowa ganene ndje. Ngashingeyi thikama, u shune kevi lyaandjeni hoka wa valelwa.’ ”

¹⁴Rakel naLea oya yamukula Jakob ya ti: “Tse katu na we uuthiga washa putate.

¹⁵Ote tu ngwandjagula twa fa aayeni. Okwe tu landitha po nokwa hepitha owala iimaliwa mbyoka a futa molwetu.

¹⁶Eliko alihe ndika Kalunga e li kutha tate, olyetu nolyaana yetu. Ninga ano shoka Kalunga e ku lombwele.”

¹⁷Jakob okwa londeke oyana naakadhi koongamelo,

¹⁸e ta faalele iimuna ye ayihe naashihe shoka a likola muMesopotamia. Osho a zi po, a ka shune kuhe Isak kevi lyaKaanan.

¹⁹Laban okwa adhika a ka kulula oonzi dhe. Manga a li hoka, Rakel okwa yaka po iimenka yomegumbo lyahe.

²⁰Jakob okwa kotokele Laban Omuaramea, ine mu lombwela nando kutya ye ota yi.

²¹Okwa gongele iinima ye ayihe e ta yi neulumo. Okwa tokola omulonga Eufrat e ta yi u uka koshilongo shokoondundu dhaGilead.

²²Omasiku gatatu sho ga piti po, Laban okwa lombwelwa kutya Jakob a yi ontuku.

²³Laban okwa kutha aantu ye e ta landula Jakob. Konima yomasiku gaheyali okwe mu adha moshilongo shokoondunda dhaGilead.

²⁴Uusiku tuu mboka Kalunga okwe ya kuLaban mondjodhi e ta ti kuye: “Kotoka, waa ende Jakob nayi.”

²⁵Jakob okwa adhika a yungu ontanda ye kondundu, naLaban okwa yungu ontanda ye koshilongo shokoondundu dhaGilead pamwe naantu ye.

²⁶Laban okwa ti kuJakob: “Omolwashike wa kotokele ndje e to kutha po aamwandje ya fa aakiintu ya kwatwa po kiita?

²⁷Omolwashike wa kotokele ndje e to iyaka po inoo lombwela ndje? Ando owa li wa laleke ndje, ando nde ku thindikile mondjila yoye nondigolo nokwiimba nokuhika oontunda nuuharpa.

²⁸Inandi pitikwa ndi laleke aatekulu yandje naamwandje nethipo lyokomilungu. Owa ningi uugoya!

²⁹Ondi na oonkondo oku ku monitha oshiponga, ihe uusiku mbuka wonena Kalunga kaho okwa londodha ndje, ndaahe ku ninge nayi.

³⁰Ondi shi shi kutya owa zi po, oshoka owa yuulukwa kegumbo, ihe omolwashike wa yaka po iimenka yandje yomegumbo?”

³¹Jakob okwa yamukula a ti: “Onda li nda tila, oshoka onda dhiladhila kutya oto kutha ndje aamwoye.

³²Ihe ngoka to adha e na iimenka yoye, na dhipagwe. Montaneho yaantu yetu noyoye konga ashihe shoka shoye, ngoye u shi kuthe po.” Jakob ina tseya kutya Rakel okwa yaka po iimenka yaLaban.

³³Laban okwa hadha metsali lyaJakob, nena okwa yi metsali lyaLea nometsali lyaakulukadhi aapika yaali, ihe ina mona mo iimenka ye. Nena okwa yi metsali lyaRakel.

³⁴Rakel okwa li a kutha po iimenka e te yi tula kohi yomutumba gwongamelo nokwa li a kuutumba kugwo. Laban okwa hadha etsali alihe, ihe ine yi mona.

³⁵Rakel okwa lombwele he a ti: “Tate, ino geela ndje, oshoka ite vulu okuthikama montaneho yoye; ondi li komwedhi.” Laban okwa hadha, ihe ina mona iimenka ye yomegumbo.

³⁶Nena Jakob okwa geye e ta ti: “Uuwinayi washike nda ninga?” Okwa nyenyetele Laban e ta ti: “Oshinima naanaa nda yona, oshishike, sho to thiminike ndje ngeyi?

³⁷Ngashingeyi sho wa hadha iinima yandje ayihe, owa mona tuu iinima yoye? Yi tula nduno mpaka puuyelele, opo tse naantu yoye tu yi mone, yo ya tokole kutya olye gwomutse e li mondjila.

³⁸Onda kala pungoye omimvo omilongo mbali. Oonzi dhoye niikombo inayi gwitha mo omala, nangame inandi lya po nando onzi yoye yimwe.

³⁹Onzi ndjoka ya lika po kiilikama, ondi ihepeke nayo. Inandi yi kutha, ndi yi ete kungoye ngaye ndi tye kandi na mbedhi. Owa li ho pula ndje, ndi fute oshimuna kehe sha yakwa, ongele omutenya nenge uusiku.

⁴⁰Omutenya onda li nda pi omutenya nuusika onda si uutalala, omulumentu nda londokwa koomposi.

⁴¹Osho sha li omimvo ndhoka omilongo mbali, sho nda kalele pungoye. Omimvo omulongo nane onde ku longelele aakadhona yoye yaali, nomimvo hamano iimuna. Nando ongeyi, owa lundulula ondjambi yandje lwomulongo.

⁴²Ando Kalunga kootate, Kalunga kaAbraham naIsak, ina kala pungame, ando wa shunitha ndje iikaha yowala. Ihe Kalunga okwa mono uudhigu wandje niilonga mbyoka nda ningi, nuusiku wa zi ko okwa pangula shoka shu uka.”

⁴³Laban okwa yamukula Jakob a ti: “Aakiintu mbaka aamwandje, oyana wo aamwandje, iimuna mbika oyandje. Tashi ti, iinima ayihe to mono mpaka, oyandje. Ihe aamwandje noyana otandi ya ningi ngiini?

⁴⁴Ondi ilongekidha okuhangana nangoye. Natu ninge ondumba yomamanya, yi ninge onzapo yehangano lyetu.”

⁴⁵Jakob okwa kutha emanya e te li dhike, li ninge endhindhiliko.

⁴⁶Jakob okwa lombwele aantu ye, ya ndumbile omamanya ondumba. Sho ye shi ningi, oya lile po pondumba.

⁴⁷Laban okwe li luku Jegar Sahaduta, manga Jakob e li luka Galed.

⁴⁸Laban okwa lombwele Jakob a ti: “Ondumba ndjika yomamanya oyo edhimbulutho lyetu atuhe yaali.” Omolwashoka ehala ndyoka olya lukwa Galed.

⁴⁹Laban okwa ti ishewe: “Omuwa ne tu tonatele, sho tatu topoka.” Onkee ehala olya lukwa Mispa.

⁵⁰Laban okwa tsikile a ti: “Ngele oto ningi aamwandje nayi nenge to hokana aakiintu yalwe, manga ndaaye shi shi, dhimbulukwa kutya Kalunga okwe tu tonatela.”

⁵¹Laban okwa ti natango kuJakob: “Mpaka ope na ondumba yomamanya naampaka ope na endhindhilikomanya nde li dhike pokati ketu nangoye.

⁵²Ondumba ndjika nendhindhilikomanya ndika nayi kale onzapo okudhimbulutha ndje, ndaa konde omamanya ngaka, ndi ku matukile. Onzapo ndjika nayi ku dhimbuluthe wo, waa konde omamanya ngaka, u matukile ndje.

⁵³Kalunga kaAbraham naKalunga kaNahor na tokole pokati ketu.” Jakob okwa gana medhina lyaKalunga ngoka he Isak ha tila, a gwanithe euvaneko ndika.

⁵⁴Okwa dhipaga oshimuna e te shi yamba omagandjelondjambo kondundu e ta hiya aantu ye kiikulya. Sho ya li, oya lala kondundu.

⁵⁵Laban okwa meneka ongula onene e ta laleke aatekulu ye noyana nethipo lyokomilungu nokwa shuna kaandjawo.