Read Oshindonga-Ombiimbeli Ondjapuki 2008 Genesis 33 Bible Online

Genesis 33 - Oshindonga-Ombiimbeli Ondjapuki 2008 bible

Genesis 33

¹Jakob okwa ligamene ko e ta mono Esau te ya naalumentu ye omathele gane, onkee a topolele Lea, Rakel naadhike ye yaali aanona.

²Aadhike ye noyana okwe ya tula po tango, taku landula Lea noyana, nohugunina oRakel naJosef.

³Jakob okwe ya tetekelele e ti inyongamene pevi luheyali, sho ta hedha kumumwayina.

⁴Ihe Esau okwa matuka e mu tsakaneke, okwe mu papatele momaako ge e te mu thipi komilungu. Ayehe yaali oya lili.

⁵Esau sho a lengalenga e ta mono aakulukadhi naanona, okwa pula a ti: “Oolye mbano u li nayo?” Jakob okwa yamukula a ti: “Oyo aanona mboka Kalunga e ya pe omuntu gwoye omagano.”

⁶Nena aadhike oya hedha ko noyana e tayi inyongamene pevi.

⁷Lea noyana oye ya, nohugunina oJosef naRakel ye ya e taa inyongamene pevi.

⁸Esau okwa pula a ti: “Ongundu ndjiya nda tsakaneke, oyashike? Elalakano lyayo olyashike?” Jakob okwa yamukula a ti: “Oyoku ku geulukitha.”

⁹Esau okwa ti: “Mumwameme, ondi na nale sha gwana; kala niinima yoye.”

¹⁰Jakob okwa ti: “Aawe, ngele owa sila ndje ohenda, taamba omagano gandje. Ngame nge te tala oshipala shoye, onda fa nda tala oshipala shaKalunga, sho u na ombili nangame.

¹¹Kwatha ndje ngaa, u taambe omagano ngaka nde ge ku etele; Kalunga okwa sile ndje ohenda e ta pe ndje ayihe mbyoka nda pumbwa.” Jakob okwe mu thiminike, sigo e yi taamba.

¹²Esau okwa ti: “Thikameni tu yeni, ngame otandi ku tetekelele.”

¹³Jakob okwa yamukula e ta ti: “Ou shi shi kutya aanona aankundi. Ondi na wo oonzi noongombe oonyali nuunzona nuutana. Ngele otadhi ulumikwa nando esiku limwe, oshigunda ashihe otashi si.

¹⁴Kwatha ndje, u tetekelele ndje, otandi isisidha tandi ku landula, te hingi iimuna tse naanona sigo tandi ku adha kuEdom.”

¹⁵Esau okwa ti: “Onda hala ndi ku thigile po aantu yandje yamwe.” Jakob okwa yamukula a ti: “Kandi na ompumbwe yasha we, onda li owala nda hala, u sile ndje ohenda.”

¹⁶Esiku ndyoka Esau okwa tetekele a shuna kuEdom.

¹⁷Ihe Jakob okwa yi kuSukkot, nkoka a dhike egumbo lye niigunda yiimuna ye, onkee ehala lya lukwa Sukkot.

¹⁸Mokugaluka kwe kuMesopotamia Jakob okwa thiki nawa kuShekem mevi lyaKaanan e ta yungu ontanda ye melundu, popepi noshilando.

¹⁹Elundu ndyoka okwe li landa koluvalo lwaHamor, he yaShekem, iimaliwa iisiliveli ethele.

²⁰Okwa dhikile ko oshiyambelo e te shi lukile El, Kalunga kaIsrael.