Read Oshindonga-Ombiimbeli Ondjapuki 2008 Genesis 35 Bible Online

Genesis 35 - Oshindonga-Ombiimbeli Ondjapuki 2008 bible

Genesis 35

¹Kalunga okwa lombwele Jakob a ti: “Inda kuBetel, u kale ko. Tungila ndje ko oshiyambelo, Kalunga ngoka nde ku ihololele, sho wa li to yi ontuku omumwanyoko Esau.”

²Jakob okwa lombwele egumbo lye alihe naayehe mboka ya li puye ta ti: “Thigii po iikalunga ayihe iikwiilongo mbyoka mu na, iyapuleni ne mu zale oonguwo dha yela.

³Otatu tembukeni po mpaka, tu ye kuBetel, nkoka tandi ka tungila Kalunga oshiyambelo, Kalunga ngoka a kwatha ndje methimbo lyuudhigu wandje naangoka a kala pungame shaa mpoka nda yile.”

⁴Oyo noya gandja kuJakob iikalunga yawo ayihe mbyoka ya li ye yi na nosho wo uutenda womomakutsi mboka ya li ya zala. Oye nokwe u fumvike momwandi popepi naShekem.

⁵Jakob noyana sho ya zi po, etilo enene olya kwata aantu yomiilando yopopepi, yo inaye ya landula.

⁶Jakob okwe ya naantu ye ayehe puLus, ngashingeyi oBetel, mevi lyaKaanan.

⁷Okwa tungu oshiyambelo e ta luku ehala Kalunga kaBetel, oshoka Kalunga okwe mu ihololele hoka, sho a li ta yi mumwayina ondapo.

⁸Omuyamuthi gwaRebekka, Debora okwa si nokwa fumvikwa momwandi kuumbugantu waBetel. Onkee gwi ithanwa “Omwandi gwokulila oosa.”

⁹Jakob sho a galuka kuMesopotamia, Kalunga okwe mu ihololele ishewe e te mu yambeke.

¹⁰Kalunga okwa ti kuye: “Edhina lyoye oJakob, ihe okuza konena otali ningi Israel.” Osho ngaaka Kalunga e mu luku Israel.

¹¹Kalunga okwa ti kuye: “Ongame Kalunga Omunankondoawike. Kala u na oluvalo olwindji. Iigwana nayi ze moluvalo lwoye, oto ka ninga hekulu yaakwaniilwa.

¹²Otandi ku pe evi ndyoka nda pele Abraham naIsak, notandi li pe oluvalo lwoye talu ku landula.”

¹³Nena Kalunga okwe mu thigi po a yi.

¹⁴Peha mpoka Kalunga e mu popitha, Jakob okwa dhike po endhindhilikomanya e te li yapula noku li tila omaviinu nomagadhi gooholivi.

¹⁵Ehala okwe li luku Betel.

¹⁶Jakob naantu ye oya tembuka po puBetel, nomanga ya li natango oshinano shimwe okuza kuEfrata, ethimbo olya thikana, Rakel a vale okanona; okwa li e na oshitheta oshilulu.

¹⁷Oshitheta sho sha li tashi lundalala mokuvala, omuvalithi okwa ti kuye: “Rakel, ino tila, owa eta ko omumati ishewe.”

¹⁸Ihe okwa li nokuli pokusa, nopethimbo ta fudha mo omufudho gwe gwahugunina, okwa luku omwana Benoni, ihe he okwe mu luku Benjamin.

¹⁹Rakel sho a si, okwa fumvikwa pondjila yu uka kuEfrata, ngashingeyi oBetlehem.

²⁰Jakob okwa dhike po endhindhilikomanya pombila ye; olyo endhindhiliko lyombila yaRakel sigo onena.

²¹Jakob okwa humu ko e ta ka yunga ontanda peha lilwe handiyaka yaEder.

²²Jakob manga a li moshilongo shika, Reuben okwa lala naBilha, omudhike gwahe. Jakob okwe shi uvu nokwa li a thita po kondjahi. Jakob okwa li e na oyana aamati omulongo nayaali.

²³Aana yaLea oyo Reuben (osheeli shaJakob), Simeon, Levi, Juda, Issaskar naSebulon.

²⁴Aana yaRakel oyo Josef naBenjamin.

²⁵Aana yaBilha, omupika gwaRakel, oyo Dan naNaftali.

²⁶Aana yaSilpa, omupika gwaLea, oyo Gad naAser. Aanona mbaka oya valelwa muMesopotamia.

²⁷Jakob okwa yi kuhe Isak kuMamre, popepi naHebron, nkoka Abraham naIsak ya li ya kala.

²⁸Isak okwa li e na omwenyo omimvo ethele nomilongo hetatu.

²⁹Oye okwa si muukulupe uunene nokwa li a kuta omwenyo, sho a gongelwa poohekulu. Oyana Esau naJakob oye mu fumvike.