Read Oshindonga-Ombiimbeli Ondjapuki 2008 Genesis 44 Bible Online

Genesis 44 - Oshindonga-Ombiimbeli Ondjapuki 2008 bible

Genesis 44

¹Josef okwa lombwele elenga lyomegumbo lye e ta ti: “Udhitha oompunda dhaalumentu mbano iilya nou tule iimaliwa yawo moompunda dhawo.

²Mompunda yonkelo tula mo oshitenga shandje shoshisiliveli pamwe niimaliwa ye mbyoka ya li tayi landwa iilya.” Elenga olya ningi ngaashi lya lombwelwa.

³Ongula onene oya lalekwa noyi idhenge mela lyondjila nuusino wawo.

⁴Sho ye ende ko owala oshinano oshifupi okuza koshilando, Josef okwa ti kelenga lyegumbo lye: “Endelela, u ya landule. Ngele we ya adha, ya pula u tye: ‘Uuwanawa oshike tamu u galulile uuwinayi?

⁵Omolwashike mwa yaka po oshitenga shoshisiliveli shamwene gwandje? Omo amuke ha nwine nosho ha anekelitha. Omwa longo iihuna!’ ”

⁶Elenga sho lye ya adha, olya popi, ngaashi lya lombwela.

⁷Oye li yamukula ya ti: “Tatekulu, oto dhiladhila ngiini, sho to ti ngawo? Oshinima shoka oshi li kokule natse sho.

⁸Oto tseya kutya otwe etelele niimaliwa mbiyaka twa monene moompunda dhetu twa zile nayo kuKaanan. Otatu vulu ngiini okuyaka po oshitenga shoshisiliveli shamwene gwoye megumbo lye nokuli?

⁹Tatekulu, ngoka ta adhika e shi na, oye na dhipagwe, natse atuhe otatu ningi aapika yoye.”

¹⁰Elenga olya ti: “Ote zimine, ihe ngoka awike a kutha po oshitenga, oye ta ningi omupika gwandje, manga ne yalwe otamu yi nombili.”

¹¹Oya kutululile omitsalo dhawo pevi noshaa ngoka okwa dhitulula ompunda ye.

¹²Elenga lyaJosef olya hadha nuudhiginini, okutameka kuyomukuluntu sigo okoyonkelo, oshitenga nosha adhika mompunda yaBenjamin.

¹³Aamwayina oya tuula oonguwo dhawo moluhodhi, oya kutile uusino wawo e taa shuna koshilando.

¹⁴Juda naamwayina oye ya kaandjaJosef noye mu adha ko. Oye mu inyongamene,

¹⁵Josef nokwa ti: “Omwa ningi ngiini? Kamu shi kutya omuntu ngangame ote vulu oku mu mona muunkulungu wokwaanekela?”

¹⁶Juda okwa yamukula a ti: “Tatekulu, otatu ti nduno ngiini? Otatu patana shike? Otatu iyopaleke ngiini? Kalunga okwa holola uusama wetu. Atuhe tse aapika yoye pamwe naangoka a adhika e na oshitenga.”

¹⁷Josef okwa ti: “Aawe! Shivalelwe ndi shi ninge! Ngoka awike a adhika e na oshitenga, oye na ninge omupika. Ne yalwe indeni nombili kuho.”

¹⁸Juda okwa hedha kuJosef e ta ti: “Ombili, tatekulu, kwatha ndje ndi popye nangoye. Ino geela ndje; ngoye owa fa omukwaniilwa polwoye mwene.

¹⁹Tatekulu, owe tu pulile to ti: ‘Omu na ho nenge omumwanyoko gulwe?’

²⁰Otwa yamukulile twa tile: ‘Otu na tate a kulupa nomumwameme onkelo e mu valelwa muukulupe. Omumwayina gwomunona okwa sa, noye awike gwayina e na po omwenyo; he oku mu hole unene.’

²¹Tatekulu, owe tu lombwelele, tu mu ete huka, opo u mu mone.

²²Otwa yamukulile kutya omunona ita vulu okuza po puhe; nge ta zi po, he ota si.

²³Owa tile: ‘Itamu pitikwa okuholoka koshipala shandje, ngele omumwanyoko onkelo ite ya nane.’

²⁴“Sho twa shunine kutate, otwe mu hokololele shoka wa tile.

²⁵Nena okwe tu lombwele, tu galuke tu ye tu lande iilya.

²⁶Otwa yamukula twa ti: ‘Itatu vulu okuya; itatu pitikilwa tu holoke koshipala shomulumentu ngwiyaka, ngele omumwameme onkelo itatu yi naye. Otatu vulu okuya ashike, ngele omumwameme onkelo ota yi wo.’

²⁷Tate okwe tu lombwele a ti: ‘Omu shi shi kutya mukadhandje Rakel okwa valele ndje aamati yaali ayeke.

²⁸Gumwe okwa thiga ndje po nale. Ngiika okwa lika po kiilikama, oshoka inandi mu mona we sigo onena.

²⁹Ngele otamu kutha po ishewe nguno pungame, e ta ka adhika koshiponga, oluhodhi ndoka tamu etele ndje, otalu dhipaga ndje.’ ”

³⁰Juda okwa tsikile a ti: “Ngashingeyi, tatekulu, ngele ote shuna kutate ndaa na omunona, shampa tuu a mono kutya omunona ke li pamwe nangame, ota si. Omwenyo gwe ogu li momwenyo gwomunona ngu, nokwa kulupa lela, tashi ti, oluhodhi nduka tatu mu etele, otalu mu dhipaga.

³²Ngame ondu uvanekele tate, ndi sile omunona oshimpwiyu. Onde mu lombwele kutya, ngele itandi eta omunona kuye, ote kala ndi na ondjo koshipala she okukalamwenyo kwandje akuhe.

³³Ngashingeyi, tatekulu, ote kala po, ndi ninge omupika gwoye peha lyomunona; mu etha a ye pamwe naamwahe.

³⁴Ote vulu ngiini okushuna kutate, ngele omunona inandi ya naye? Ite vulu okwiidhidhimikila okutala oluhodhi lwatate lu thike mpoka.”