Read Oshindonga-Ombiimbeli Ondjapuki 2008 Genesis 48 Bible Online

Genesis 48 - Oshindonga-Ombiimbeli Ondjapuki 2008 bible

Genesis 48

¹Konima yaambika Josef okwa lombwelwa kutya he ota alukwa. Josef okwa kutha oyana yaali, Manasse naEfraim, e ta yi a ka talele po he.

²Jakob sho a lombwelwa kutya omwana Josef okwe ya oku mu talela po, okwi ikankameke e ta kuutumba kombete ye.

³Jakob okwa ti kuJosef: “Kalunga Omunankondoawike okwi ihololele ndje puLus mevi lyaKaanan e ta yambeke ndje.

⁴Okwa lombwele ndje a ti: ‘Otandi ku pe aanona oyendji, opo oluvalo lwoye lu ka ninge oshigwana oshinene. Otandi gandja evi ndika koluvalo lwoye, li ninge eliko lyalwo sigo aluhe.’ ”

⁵Jakob okwa tsikile a ti: “Josef, aamwoye yaali ye ku valelwa muEgipiti, manga inaandi ya huka, oyandje. Efraim naManasse oye thike paamwandje mboka Reuben naSimeon.

⁶Aamwoye yalwe ye ku valelwa konima yawo, naa kale yoye; mokugandja iitopolwa yevi eliko lyawo nali pitile muEfraim naManasse.

⁷Sho nda li mokugaluka kuMesopotamia, onda silwa Rakel mondjila muKaanan, popepi naEfrata. Onde mu fumvike mooha dhondjila yokuEfrata.” (Efrata nena ohaku tiwa Betlehem.)

⁸Jakob sho a mono aana yaJosef, okwa pula a ti: “Aanona mbano oolye?”

⁹Josef okwa yamukula a ti: “Mbaka aamwandje, Kalunga e ya pele ndje muka muEgipiti.” Jakob okwa ti: “Ya eta kungame, opo ndi ya yambeke.”

¹⁰Omeho gaJakob oga li ga tsiyala kuukulupe, ka li ta mono ko nawa. Josef okwe eta aamati kuye, oye nokwe ya idhingile e te ya thipi komilungu.

¹¹Jakob okwa lombwele Josef a ti: “Kanda li nda tegelela tandi ku mono we, ihe Kalunga okwa monitha ndje aana yoye nokuli.”

¹²Nena Josef okwe ya kutha po pekolo lye e te mu inyongamene a tsa oshipala mevi.

¹³Josef okwa tula Efraim kolumoho lwaJakob naManasse kolulyo lwe.

¹⁴Ihe Jakob okwa shigakaneke iikaha ye e ta tenteke olulyo lwe komutse gwaEfraim, nando oye ondenge, nolumoho lwe okomutse gwaManasse, ngoka a li omukuluntu.

¹⁵Okwa yambeke Josef a ti: “Kalunga ngoka a longelwa kootate Abraham naIsak, na yambeke aamati mbaka! Kalunga ngoka e enditha ndje sigo onena, ne ya yambeke!

¹⁶Omuyengeli ngoka a hupitha ndje miiponga ayihe, ne ya yambeke! Edhina lyandje nedhina lyootate Abraham naIsak nali kale maamati mbaka! Yo naa kale ye na okakwiyu, oluvalo olwindji.”

¹⁷Josef okwa li e shi tala epuko, sho a mono he a tenteke olulyo lwe komutse gwaEfraim. Okwa kutha ko oshikaha shahe komutse gwaEfraim e te shi tula komutse gwaManasse.

¹⁸Okwa ti kuhe: “Hangaaka, tate. Omukuluntu oye nguka; tenteka oshikaha shoye shokolulyo komutse gwe.”

¹⁹He okwa tindi e ta ti: “Ondi shi shi, mentu gwandje, ondi shi shi. Oluvalo lwaManasse otalu ka ninga oshigwana oshinene. Ihe ondenge ota ka ninga omunene e mu vule, noluvalo lwe otalu ka ninga iigwana iinene.”

²⁰Osho ngaaka e ya yambeke esiku ndyoka ta ti: “Aaisraeli otaa ka tumbula omadhina geni, uuna taa tomona omayambeko. Otaa ka tya: ‘Kalunga ne ku faathanithe naEfraim naManasse.’ ” Osho Jakob a tula Efraim komeho gaManasse.

²¹Jakob okwa lombwele Josef a ti: “Ngaashi u shi wete, ondi li pokusa, ihe Kalunga ota kala nane note ke mu tembudhila kevi lyoohokulu.

²²Eyana lyokuShekem ongoyelela tandi li pe, haamwanyoko, etathapya ndyoka nda yugu Aayamori negongamwele lyandje nuutati wandje.”