Read Oshindonga-Ombiimbeli Ondjapuki 2008 Genesis 49 Bible Online

Genesis 49 - Oshindonga-Ombiimbeli Ondjapuki 2008 bible

Genesis 49

¹Jakob okwi ithana oyana e ta ti kuyo: “Gongaleni, notandi ke mu hokololela shoka tamu ka ningilwa komasiku gokomeho:

²“Ileni pamwe, mu pulakene, ne aana yaJakob. Pulakeneni ho Israel shoka te mu lombwele.

³“Reuben, ngoye osheeli shandje, oonkondo dhandje, osheeli shuukolele wandje, osheeli mesimano nomondjundo, u vule aamwanyoko.

⁴Owa fuluka wa fa omeya, hangoye to ningi omukuluntu, oshoka wa londele kombete yaho, nowe yi nyateke. Eeno, owa londele kontala yandje.

⁵“Simeon naLevi aantu namumwayina. Omagongamwele gawo ohaga dhipaga.

⁶Itandi zimine oonkundathana dhawo, itandi kala moshigongi shawo, oshoka ya dhipaga aalumentu mondjahi, nomuuntsa wawo oya lemaneke oontsezi.

⁷Ondjahi yawo nayi thingwe, oshoka oya pindjala. Uupyakadhi wawo nau thingwe, oshoka kau na ohenda. Otandi ya napeke mokati kaJakob, otandi ya halakanithile muIsrael.

⁸“Juda, aamwanyoko otaye ku tanga. Oshikaha shoye osha kwata ekothi lyaatondi yoye. Aamwanyoko otaa inyongamene koshipala shoye.

⁹Juda oku li po a fa onkoshi, ya kwata oshihakanwa shayo e tayi shuna mekololo lyayo tayi inana ya taandela pevi. Kape na ngoka ta vulu oku mu pendutha.

¹⁰Ondhimbo yuukwaniilwa itayi zi mo muJuda nepangelo moluvalo lwe, sigo taku ya ngoka te li pewa, ngoka iigwana tayi vulika kuye.

¹¹Ota pandekele okasino ke pomuviinu nokasinogona ke opekota lyomuviinulela. Oonguwo dhe ote dhi yogele momaviinu.

¹²Omeho ge ga tiligana ngaashi omaviinu, omayego ge ga tokithwa ga fa omahini.

¹³“Sebulon ota ka kala pooha dhefuta, mpoka tapu ka kala etulilo lyoosikepa. Oshitopolwa she otashi ka adha sigo oSidon.

¹⁴“Issaskar oye okasino ka kola taka lala pokati kiigunda.

¹⁵Okwa mono ko ehala lyaa na uupyakadhi, nevi ndyoka olye mu opalele. Ota petama a humbate ondjoko, ta thiminikilwa iilonga yuupika.

¹⁶“Dan ota tokolele aantu ye, ongaakwawo haa tokolele omazimo gaIsrael.

¹⁷Dan ota kala ngeyoka mepola, a ontela a fa epili mondjila tali shomona okakambe mekondo, nomukayili ta gu okafinyukila.

¹⁸“Ehupitho lyoye, Omuwa, otandi li tegelele.

¹⁹“Gad ota matukilwa kekumbu, ihe ote ya pilukile e te ya landula.

²⁰“Aser iikulya ye omagadhi, ota ka gandja iitowale yo opalela aakwaniilwa.

²¹“Naftali oye oholongo yi na ontuku, oyana oyo opala.

²²Josef okwa fa omuti hagu imi, omuti omutalala pomatondokelo iitayi yagwo tayi taandele kekuma.

²³Oondjumbeta otadhi mu itakeke, otadhi mu ponokele.

²⁴Ihe uuta we owa kola, omaako ge oga pama. Oga kolekwa kOmunankondo, Kalunga kaJakob, okOmusita nokOmugameni gwaIsrael.

²⁵Kalunga kooho ne ku kwathe, Kalunga Omunankondoawike ne ku yambeke. Ne ku pe omayambeko taga zi megulu pombanda, omayambeko gefundja mpaka pevi nomayambeko gokomagundji nogomoshivalelo.

²⁶Omayambeko gaho oge vule ngeyaka gootatekulu, oge vule eopalo lyoondundu dhaaluhe. Omayambeko ngaka naga lambele komutse gwaJosef, okomutse gwomuhogololwa mokati kaamwahe.

²⁷“Benjamin oye embungu hali lyana. Ongula otali hutagula oshihakanwa shalyo, ongulohi otali topola oshikwatwa shalyo.”

²⁸Ngaka ogo omazimo gaIsrael omulongo nagaali, noohapu dhomalaleko odho ndhika e dhi tumbulile moku ga yambeka kehe limwe neyambeko lye li opalela.

²⁹Jakob okwa lombwele oyana a ti: “Otandi yi nondjila yaakuuyuni ayehe; fumvikii ndje mekololo ndyoka li li meyana lyaEfron Omuheti,

³⁰puMakpela, kuuzilo waMamre, mevi lyaKaanan. Ekololo ndika neyana Abraham okwe li landa kuEfron, li ninge omayendo.

³¹Omo tuu moka mwa fumvikwa Abraham nomukadhi Sara, omo mwa fumvikwa Isak nomukadhi Rebekka, nangame nda fumvike mo Lea.

³²Epya nekololo olya li lya landwa kAaheti. Omo tuu fumvikii ndje moka.”

³³Jakob sho a mana omautho ge koyana, okwa taandeleke omagulu ge e ta fudha mo omwenyo gwe, nokwa yi kooyinagulu.