Read Oshindonga-Ombiimbeli Ondjapuki 2008 Genesis 9 Bible Online

Genesis 9 - Oshindonga-Ombiimbeli Ondjapuki 2008 bible

Genesis 9

¹Kalunga okwa yambeke Noa noyana e ta ti: “Kaleni mu na oluvalo ne mu indjipale kombanda yevi alihe.

²Iinamwenyo ayihe, oondhila noohi otayi kala hayi mu tila. Ayihe oya tulwa mepangelo lyeni.

³Ngashingeyi otayi ningi oondya dheni naanaa ngaashi iimeno, mbyoka nde yi mu pele, yi ninge oondya dheni.

⁴Ihe inamu lya onyama yi na ombinzi; otandi yi indike, oshoka omwenyo ogwa kala mombinzi.

⁵Ihe ngele ku na ngoka ta dhipaga omuntu, ota geelwa. Nokehe oshinamwenyo tashi dhipaga omuntu, otashi geelwa neso.

⁶Omuntu okwa shitwa a fa Kalunga, onkee ngoka ta dhipaga omuntu mukwawo, ota ka dhipagwa wo.

⁷“Kaleni mu na oluvalo ne mu indjipale kombanda yevi alihe.”

⁸Kalunga okwa lombwele Noa e ta ti:

⁹“Taleni, otandi dhike ehangano nane nonoluvalo lweni

¹⁰noniinamwenyo ayihe kombanda yevi — oondhila adhihe, iimuna ayihe niiyamakuti ayiheyihe mbyoka ya piti monguluwato pamwe nangoye.

¹¹Otandi hangana nane notandi uvaneke kutya iinamwenyo itayi ka hanagulwa po we kefundja, eyelu itali ka hanagula po we evi.

¹²Endhindhiliko lyehangano lyaaluhe ndyoka tandi hangana nane noniinamwenyo ayihe, olyo ndika:

¹³otandi tula uutamvula miikogo, notau ningi endhindhiliko lyehangano lyandje nevi.

¹⁴Uuna te tula iikogo kegulu, ndele uutamvula tau holoka,

¹⁵nena otandi dhimbulukwa euvaneko ndyoka nde li mu uvanekele niinamwenyo ayihe kutya eyelu itali ka hanagula po we iinamwenyo ayihe.

¹⁶Uuna uutamvula tau holoka miikogo, otandi u mono e te dhimbulukwa ehangano lyaaluhe pokati ketu noonakukala kombanda yevi ye na omwenyo.

¹⁷Ndika olyo endhindhiliko lyeuvaneko ndyoka nda uvanekele oonakukala ayehe kombanda yevi.”

¹⁸Aana yaNoa aamati mboka ya zi monguluwato, oyo Sem, Ham naJafet. (Ham ohe yaKaanan.)

¹⁹Aana yaNoa mbaka yatatu oyo oohekulu yiigwana ayihe kombanda yevi.

²⁰Noa okwa li omunamapya, oye gwotango a ningi oshitsambe shomiviinu.

²¹Ihe sho a nu omaviinu, okwa kolwa, a hula mo oonguwo dhe e ta lala e li omudhuu metsali lye.

²²Ham, he yaKaanan, sho a mono he e li omudhuu, okwa piti mo e te shi lombwele aamwayina yaali.

²³Nena Sem naJafet oya kutha elwaakani ye li humbata komapepe gawo. Oye ende oshaanimanima yu uka metsali e taa siikile he. Inaa tala nande konima, opo yaa mone epenge lyahe.

²⁴Noa sho a kololokwa, okwa dhimbulula shoka omwana onkelo e shi mu ningile,

²⁵e ta ti: “Kaanan na tulwe omutima! Na kale omupika gwaamwaina!

²⁶Omuwa, Kalunga kaSem, na hambelelwe! Kaanan na kale omupika gwaSem!

²⁷Kalunga na indjipalithe Jafet! Jafet na kale momagumbo gaSem! Kaanan na kale omupika gwawo!”

²⁸Konima yeyelu Noa okwa kala nomwenyo omimvo 350

²⁹nokwa si e na omimvo 950.