Read Oshindonga-Ombiimbeli Ondjapuki 2008 1 Kings 19 Bible Online

1 Kings 19 - Oshindonga-Ombiimbeli Ondjapuki 2008 bible

1 Kings 19

¹Omukwaniilwa Ahab okwa hokololele omukadhi Isebel shaa shoka Elia a ningi nonkene a dhipaga aahunganeki yaBaal.

²Isebel okwa tumu elaka kuElia tali ti: “Ookalunga naa geele ndje, ndi se, ngele pethimbo ngaandika ngula itandi ku ningile, ngaashi wa ningile aahunganeki.”

³Elia okwa li a tila nokwa yi ondapo, a ka holame; okwa kutha omumati gwe e ta yi kuBeersheba muJuda. Oko nkoka Elia a thigi omumati gwe,

⁴ihe ye mwene okwa yi kombuga te ende omutenya aguhe. Okwa kankama e ta gondjo momuzile gwoshingondjo nokwa li a hala a se. Okwa galikana a ti: “Sha gwana, Omuwa, kutha ndje omwenyo gwandje, oshoka kandi shi omwaanawa ndi vule ootate.”

⁵Okwa lala moshihwa e ta kotha. Ohaluka omuyengeli okwe mu pendutha e ta ti: “Penduka, u lye.”

⁶Okwa lengalenga koombinga noombinga e ta mono oshikwiila noshiyuma shomeya popepi nomutse gwe. Okwa li e ta nu e ta lala ishewe.

⁷Omuyengeli gwOmuwa okwa galuka e te mu pendutha olutiyali ta ti: “Penduka, u lye, opo ondjila yaahe ku vule oonkondo.”

⁸Elia okwa penduka, okwa li e ta nu, iikulya noye mu koleke muule womasiku omilongo ne, sigo okondundu ondjapuki Sinai.

⁹Nkwiyaka okwa yi mekololo e ta lala uusiku mboka. Ohaluka Omuwa okwe mu popitha ta ti: “Elia, oto longo shike mpano?”

¹⁰Elia okwa yamukula a ti: “Omuwa, Kalunga Omunankondoawike, aluhe onde ku longele ngoye awike. Ihe Aaisraeli oya teya ehangano lyawo nangoye, oya kumuna po iiyambelo yoye noya dhipaga aahunganeki yoye ayehe. Ongame awike nda hupu ko — notaa kambadhala okudhipaga ndje wo!”

¹¹Omuwa okwa ti kuye: “Pita mo, u ka thikame koshipala shandje kondungu yondundu.” Nena Omuwa okwa pitilile po e ta pepitha ombepo ndjoka tayi tatula noondundu e tayi nyanyagula omamanya, ihe Omuwa ka li mo mombepo. Ombepo oya kodha okupepa, nokwa li ekakamo lyevi — ihe Omuwa ka li mo nande mekakamo lyevi.

¹²Ekakamo olya landulwa komulilo — ihe Omuwa ka li mo nando momulilo. Omulilo nogwa landulwa kokapepo okapu.

¹³Elia sho e ka uvu, okwa siikile oshipala she nelwaakani lye e ta piti mo e ta ka thikama posheelo shekololo. Ewi olya ti kuye: “Elia, oto ningi shike mpano?”

¹⁴Elia okwa yamukula a ti: “Omuwa, Kalunga Omunankondoawike, onde ku longele aluhe — ngoye awike. Ihe Aaisraeli oya teya ehangano lyawo nangoye, oya kumuna po iiyambelo yoye noya dhipaga aahunganeki yoye ayehe. Ongame awike nda hupu ko — oyo notaa kambadhala okudhipaga ndje wo.”

¹⁵Omuwa okwa ti: “Shuna kombuga popepi naDamaskus. Inda moshilando, u gwayeke Hasael, a ninge omukwaniilwa gwaSiria;

¹⁶naJehu yaNimshi, a ninge omukwaniilwa gwaIsrael. Gwayeka Elisa lyaShafat gwokuAbel Mehola, e ku landule muuhunganeki.

¹⁷Shaa ngoka ta hunuka okudhipagwa kuHasael, ota ka dhipagwa kuJehu, noshaa ngoka ta hunuka okudhipagwa kuJehu, ota ka dhipagwa kuElisa.

¹⁸Otandi ka thigalitha aantu omayuvi gaheyali muIsrael — ayehe mboka yi itaala ndje noinaa tsa oongolo kuBaal nenge ya thipe iimenka ye.”

¹⁹Elia okwa yi e ta adha Elisa ta pulula noonani mbali. Oya li nayakwawo omulongo nagumwe; naElisa okwa li pondjoko yahugunina. Elia okwa kutha elwaakani lye e te li umbile kombanda yaElisa.

²⁰Elisa okwa thigi po oonani dhe e ta landula Elia e ta ti: “Etha ndje, ndi ka laleke tate nameme, opo ndi ye tu ye pamwe.” Elia okwa yamukula a ti: “Eewa, shuna. Itandi ku indike.”

²¹Nena Elisa okwa galukile koonani dhe e te dhi dhipaga po e ta teleke onyama a panda po oondjoko, dhi ninge iikuni yokutema. Okwa gandja onyama kaantu, oyo noye yi li po. Nena okwa yi e ta landula Elia noku mu yakula.