Read Oshindonga-Ombiimbeli Ondjapuki 2008 1 Kings 21 Bible Online

1 Kings 21 - Oshindonga-Ombiimbeli Ondjapuki 2008 bible

1 Kings 21

¹Popepi nuuwa waAhab muJesreel opwa li oshitsambe shomulumentu gumwe edhina lye Nabot.

²Esiku limwe Ahab okwa ti kuNabot: “Pe ndje oshitsambe shoye shomiviinu; osha kwatathana nuuwa wandje, onda hala ndi shi ninge oshikunino shiikwamboga. Otandi ke ku pa ngaa oshitsambe oshiwanawa shi shi vule, nenge, ngele wa hala, otandi ke shi futa ofuto ombwanawa.”

³Nabot okwa yamukula a ti: “Oshitsambe shika onde shi thigulula kootatekulu. Omuwa ne shi keelele, ndi shi ku pe!”

⁴Ahab okwa yi kegumbo a ninga omwenyo omwiinayi nokwa geela Nabot, sho e mu lombwele ngaaka. Okwa ka lala mombete ye a taalela mekuma noina lya sha.

⁵Omunyekadhi gwe Isebel okwe ya kuye e ta pula: “Oshike wa tyololoka? Oshike itoo li?”

⁶Ahab okwa yamukula: “Omolwoohapu dhaNabot e dhi lombwele ndje. Onde mu indile, ndi lande po oshitsambe she shomiviinu, nenge, ngele e shi hala, ndi mu pe shilwe, ihe okwa lombwele ndje kutya itandi shi pewa!”

⁷Isebel okwa yamukula a ti: “Ndishi ngoye omukwaniilwa gwaIsrael nenge hangoye? Penduka, ndjangumukwa, u lye. Otandi ke ku monena oshitsambe shaNabot.”

⁸Nena okwa nyola oontumwafo dhimwe medhina lyaAhab, e dhi sitomba nositombe yomukwaniilwa e te dhi tumu komalenga nokaawiliki yoshilando muJesreel.

⁹Oontumwafo otadhi ti ngeyi: “Uvitheni esiku lyeidhiliko, gongeleni aantu ne mu kuutumbike Nabot komeho gawo.

¹⁰Tuleni aantu yaamakaha yaali ye mu taalela, ye mu lundile ya tye, Nabot okwa tuku Kalunga nomukwaniilwa. Nena mu pititheni mo moshilando, ne mu mu dhipage nomamanya.”

¹¹Omalenga naawiliki yiilando yaJesreel oya ningi, ngaashi Isebel e shi ya lombwele.

¹²Oyu utha esiku lyeidhiliko, ya gongele aantu e taa tula Nabot komeho gawo.

¹³Aantu mbeyaka yaali yaamakaha oye mu lundile montaneho taa ti kutya okwa tuku Kalunga nomukwaniilwa. Nena okwa falwa pondje yoshilando e taye mu dhipaga nomamanya.

¹⁴Elaka olya tuminwa Isebel tali ti: “Nabot a dhipagwa.”

¹⁵Nanziya sho Isebel a taamba elaka, okwa ti kuAhab: “Nabot a si. Ngashingeyi inda, u ka kuthe oshitsambe shoka a tindi e shi ku landithe po.”

¹⁶Nanziya Ahab okwa yi koshitsambe, e ke shi lale.

¹⁷Nena Omuwa okwa ti kuElia, omuhunganeki a za muTishbe:

¹⁸“Inda komukwaniilwa gwaSamaria Ahab. Oto ke mu adha moshitsambe shaNabot te ke shi lala.

¹⁹Mu lombwela kutya Omuwa ota ti kuye: ‘Sho wa dhipaga omuntu, owa kutha po uuthiga we!’ Mu lombwela u tye, ngame ote ti: ‘Pehala ngaa mpoka oombwa dha lathele ombinzi yaNabot, opo tadhi ka lathela wo ombinzi yoye!’ ”

²⁰Ahab sho a mono Elia, okwa ti: “Mutondi gwandje, owa endja ndje mo nduno?” Elia okwa ti: “Eeno, owi igandja ngoye mwene thilu, u longe iihuna koshipala shOmuwa.

²¹Omuwa ota ti kungoye: ‘Otandi ke ku undulila omupya. Otandi ke ku komba po notandi ka hanagula po aalumentu ayehe yomezimo lyoye, aagundjuka naakulupe.

²²Ezimo lyoye otali ka kala ngaashi lyomukwaniilwa Jeroboam yaNebat nolyomukwaniilwa Baasha yaAhija, oshoka owa geyitha ndje mokufala Israel muulunde.’

²³Kombinga yaIsebel Omuwa ota ti kutya oombwa otadhi ka lya omudhimba gwe pedhingililokuma lyaJesreel.

²⁴Shaa ngoka gwomezimo lyoye ta sile moshilando, ota ka lika po koombwa, noshaa ngoka ta sile melundu, ota ka lika po koontsa.”

²⁵(Kakwa li ngoka ti igandja ye mwene, a yone kOmuwa mokulonga iihuna ngaashi Ahab — ayihe okwe yi ningithwa komukadhi Isebel.

²⁶Okwa longo iisithahoni yuulunde, sho a longele iimenka, ngaashi Aayamori ya li haa ningi, mboka Omuwa a tidha moshilongo, opo Aaisraeli ya kale mo.)

²⁷Elia sho a mana okupopya, Ahab okwa tuula oonguwo dhe, e dhi ihula e ta zala ehahi. Okwa tindi okulya, a lala mehahi nokwe endaenda a lulilwa.

²⁸Omuwa okwa ti komuhunganeki Elia:

²⁹“Owa ndhindhilika tuu kutya Ahab okwi ifupipika koshipala shandje? Molwashoka a ningi ngeyi, itandi mu undulile we omupya nguka, manga e na omwenyo, ihe pethimbo lyomwana ezimo lye otandi ke li etela omupya.”