Read Oshindonga-Ombiimbeli Ondjapuki 2008 1 Chronicles 12 Bible Online

1 Chronicles 12 - Oshindonga-Ombiimbeli Ondjapuki 2008 bible

1 Chronicles 12

¹David manga a li muZiklag, nkoka a ka holamene omukwaniilwa Saul, puye opwe ya aakwiita aapyokoki naainekelwa,

²aakwanezimo lyaBenjamin, ndyoka wo ezimo lyaSaul. Oya li haa vulu okuumba iikuti nenge omamanya nomaako agehe gaali, omalulyo nomalumoho.

³Oya li mewiliko lyondjayi Ahiezer naJoas, aana yaShemaa gwomuGibea. Aakwiita oyo mbaka: Jesiel naPelet, aana yaAsmavet Beraka naJehu yomuAnatot Ishmaia gwomuGibeon, omukwiita ofule nomuwiliki gumwe gwomilongo ndatu Jeremia, Jahasiel, Johanan naJosabad muGedera Elusai, Jerimot, Bealia, Shemaria naShefatia muHarif Elkana, Isshia, Asarel, Joeser naJashobeam gwoludhi lwaKora Joela naSebadia, aana yaJeroham gwomuGedor.

⁸Ngaka ogo omadhina gaakwiita aapyokoki noofule yomezimo lyaGad mboka yi itula momatanga gaDavid, sho a li mepopilongulu lyokondundu mombuga. Oya li aapyokoki mokulongitha iikandekitho nomagonga, ye na iipala yomagonya ga fa goonime noye na ondapo oto ti oompengu koondundu.

⁹Oya li ya tulwa momusholondondo tagu landula: Ezer, Obadia, Eliab, Mishmanna, Jeremia, Attai, Eliel, Johanan, Elsabad, Jeremia naMakbannai.

¹⁴Yamwe yomwaambaka yomezimo lyaGad oya li aawiliki yomatanga gaalumentu eyuvi nayamwe oya li aawiliki yomatanga gaalumentu ethele.

¹⁵Momwedhi gwotango gwomumvo gumwe, pethimbo lyefundja lyomulonga Jordan gwa udha omeya sigo oontuni, oya tokola omulonga e taa tidha mo aantu mboka ya kala momalusilu gomulonga, handika nohaandiyaka yagwo.

¹⁶Ongundu yimwe yaalumentu Aabenjamin nAajuda oya piti mo noya yi kuDavid kepopilongulu lye lyokondundu.

¹⁷David okwa yi oku ya tsakaneka e ta ti: “Ngele omwe ya nombili okukwatha ndje, nena otamu taambwa nawa. Ileni kutse! Ihe ngele otamu dhiladhila okugwaaleka ndje, nando inaandi mu ningila nayi, nena Kalunga kootate ne shi tseye ye e mu geele.”

¹⁸Ombepo yaKalunga oye ya muAmasai, ondjayi yaambeyaka omilongo ndatu e ta ti: “David yaIsai, otse aantu yoye! Kala wa nyanyukwa, naakwatheli yoye naa kale aanelago! Kalunga okwa gama kungoye.” David okwe ya taamba nombili e te ya ningi aanashihako yetangakwiita lye.

¹⁹Aakwiita yamwe yomezimo lyaManasse oyi igameke kuDavid, sho a li melondo pamwe nAafilisti, ya kondjithe Saul. Sho shene David ina kwatha Aafilisti, oshoka aakwaniilwa yawo oya li ye mu angala ya dhiladhila kutya ota vulu oku ya gwaaleka kumwene gwe gwonale Saul. Osho ye mu shunitha kuZiklag.

²⁰Aakwiita Aamanasse mbo ya gama kuDavid, sho a shuna, oyo mbaka: Adna, Josabad, Jediael, Mikael, Josabad, Elihu naZilletai. Mezimo lyaManasse kehe gumwe gwaambaka okwa li omuwiliki gwetanga lyaakwiita eyuvi.

²¹Mokuyakula David oya li aanashihako yomatanga ge, oshoka oya li oofule muukwiita. Konima oya ka ninga aanashihako metangakwiita lyAaisraeli.

²²Konyala esiku kehe okwa kala taku ya aantu kuDavid, sigo etangakwiita lye lya ningi lya tilitha ngaashi etanga lyaKalunga.

²³David sho a li muHebron, aakwiita oyendji ya dheuka oya gama komatanga ge noku mu kwathela, ye mu ninge omukwaniilwa peha lyaSaul, ngaashi Omuwa a li u uvaneka. Omiyalu dhawo otadhi landula mpaka: Juda: aalumentu ya homata nawa ye na iikandekitho nomagonga 6 800; Simeon: aalumentu ya dheuka nawa ye li 7 100; Levi: aalumentu 4 600; Aalanduli yaJehoiada moluvalo lwaAaron: aalumentu 3 700; Aakwawo yaSadok, omukwiita omugundjuka gwoshitima: aawiliki 22; Benjamin (ezimo lyaSaul ye mwene): aalumentu 3 000 (Aabenjamin oyendji pethimbo ndiyaka oya li natango ya gama kuSaul); Efraim: aalumentu aanamadhina momaludhi gawo yene 20 800; Manasse kuuninginino: aalumentu aahogololwa ya kwaniileke David ye li 18 000; Issaskar: aawiliki ye li 200 pamwe naawilikwa yawo. (Aawiliki mbaka oya li ya tseya shoka Israel a li e na okuninga nesiku ewanawa lyoku shi gwanitha); Sebulon: aalumentu aavuliki naainekelwa 50 000 yi ilongekidhila olugodhi, ya dheulwa okulongitha omatati niikondjitho yomaludhi agehe; Naftali: aawiliki 1 000 naa(...)

²⁴Aakwiita mbaka ayehe yi ilongekidhila olugodhi, oya yi kuHebron ya tokola ya ninge David omukwaniilwa gwaIsrael alihe. Aaisraeli ayehe yalwe nayo wo oya li ya ya omuyogumwe.

²⁵Oya kala omasiku gatatu puDavid, ya dhana oshituthi shiikulya nokunwa shoka ya longekidhilwa kuyakwawo yomoshilongo.

²⁶Okuza kokule kuumbangalantu, komazimo gaIssaskar, Sebulon naNaftali, aantu oye ya nuusino, oongamelo, omamulutiya noonkutsa dha humbata iikulya — uusila womunziya, oonkwiyu, omandjembele, omaviinu nomagadhi. Oye eta wo oongombe noonzi dhokudhipagwa nokuliwa. Ndika olya li enyanyu moshilongo ashihe.