Read Oshindonga-Ombiimbeli Ondjapuki 2008 1 Chronicles 14 Bible Online

1 Chronicles 14 - Oshindonga-Ombiimbeli Ondjapuki 2008 bible

1 Chronicles 14

¹Omukwaniilwa Hiram gwaTiro okwa tumu aatumwa kuDavid; okwe mu kwatha omiti dhomisendeli naahongi yomamanya naanashihongelo, ye mu tungile ongulumbala.

²Osho ngaaka David okwa dhimbulula kutya Omuwa okwe mu ningi omukwaniilwa gwaIsrael nokwa koleke uukwaniilwa we omolwoshigwana she Israel.

³MuJerusalem David okwa hokanene mo aakulukadhi oyendji nokwa li e na oyana aamati naakadhona oyendji.

⁴Mboka e ya valelwa muJerusalem, oyo Shammua, Shobab, Natan, Salomo,

⁵Ibhar, Elishua, Elpelet,

⁶Nogah, Nefeg, Jafia,

⁷Elishama, Beeliada naElifelet.

⁸Aafilisti sho ya kundana kutya David a ningi omukwaniilwa gwaIsrael alihe, etangakwiita lyawo olya piti mo, ye ke mu kwate po. David sho e shi uvu, okwe ke ya tsakaneka.

⁹Aafilisti oya thiki polusilu lwaRafaim e taa tameke okuyuga.

¹⁰David okwa pula Kalunga a ti: “Nandi matukile Aafilisti? Oto pe ndje esindano?” Omuwa okwa yamukula a ti: “Eeno, ya matukila! Otandi ku pe esindano!”

¹¹Osho ngaaka David okwe ya ponokele puBaal-Perazim e te ya sindi. Okwa ti. “Kalunga okwa longitha ndje, ndi panukile aatondi yandje nda fa omeya gefundja.” Okuza kesiku ndiyaka epandja ndyoka olya lukwa Baal-Perazim.

¹²Aafilisti sho ya yi ontuku, oya thigi po iimenka yawo, naDavid okwa gandja elaka, yi fikwe po.

¹³Nanziya Aafilisti oya galukile kolusilu e taa tameke oku lu yuga ishewe.

¹⁴Natango lumwe David okwa pula Kalunga, ngoka e mu yamukula a ti: “Ino ya matukila okuziilila mpaka, ihe ya kunduka, u ya homone to ziilile kombinga yilwe, popepi nomiti dhomitaku.

¹⁵Shampa wa uvu iikukulo yoompadhi momumbolongondjo gwomitaku, nena ya ponokela, oshoka otandi ka katuka ndi li komeho goye, ndi dhenge etangakwiita lyAafilisti.”

¹⁶David okwa ningi, ngaashi Omuwa e mu lombwele, e ta tidha Aafilisti okuza kuGibeon ndongo ondjila ayihe sigo okuGeser.

¹⁷Esimano lyaDavid olya taandele akuhe, nOmuwa okwa tilithitha David kiigwana ayihe.