Read Oshindonga-Ombiimbeli Ondjapuki 2008 1 Chronicles 16 Bible Online

1 Chronicles 16 - Oshindonga-Ombiimbeli Ondjapuki 2008 bible

1 Chronicles 16

¹Oya fala oshikethahangano meni lyetsali ndyoka lye shi tungilwa kuDavid. Noya yamba omafikilondjambo nomakwatathanondjambo kuKalunga.

²David sho a zimbuka okuyamba oondjambo, okwa yambeke oshigwana medhina lyOmuwa

³e te ya palutha ayehe. Okwa pe omulumentu nomukiintu kehe muIsrael oshikwiila, ontumba yonyama ya yothwa noonganye dhomandjembele.

⁴David okwa langeke Aalevi yamwe, ya wilike elongelokalunga lyokusimaneka Omuwa, Kalunga kaIsrael, komeho goshikethahangano taa imbi noku mu hambelela.

⁵Asaf okwa langekwa muuwiliki yo naSakaria, omuyakuli gwe. Jeiel, Shemiramot, Jehiel, Mattitia, Eliab, Benaia, Obed Edom naJeiel oya li aahiki yuuharpa. Asaf okwa li omukwelengendjithi gwoosimbaale.

⁶Naayambi yaali, Benaia naJahasiel, oya li ye na okuhika omankuma ethimbo alihe komeho goshikethahangano.

⁷Esiku ndyoka olya li lyotango, David sho a gandja kuAsaf pamwe nAalevi ooyakwawo oshimpwiyu shokwiimbila Omuwa omahambelelondjimbo.

⁸Hambeleleni Omuwa, uvitheni uunene we; lombweleni iigwana shoka a longo.

⁹Imbileni Omuwa omahambelelondjimbo; hokololeni iilongankumwe e yi longo.

¹⁰Nyanyukweni, oshoka tseni oye; ayehe mboka haye mu simaneke, naa nyanyukwe!

¹¹Kongeni ekwatho kOmuwa, ne mu mu simaneke aluheluhe.

¹²Ne oluvalo lwaJakob, omupiya gwaKalunga, oluvalo lwaIsrael, ne mboka mwa hogololwa kuKalunga, dhimbulukweni iikumithalonga mbyoka Kalunga e yi longo nomapangulo ngoka a gandja.

¹⁴Omuwa oye Kalunga ketu; iipango ye oyuuyuni auhe.

¹⁵Inamu dhimbwa ehangano lyaKalunga, ndyoka a dhike sigo aluhe,

¹⁶ehangano e li hangana naAbraham, euvaneko e li uvanekele Isak.

¹⁷Omuwa okwa hangana naJakob, naIsrael li kale lyaaluhe.

¹⁸Okwa ti: “Otii ku pe evi lyaKaanan, otali ka ninga eliko lyoye.”

¹⁹Aantu yaKalunga oya li aashona momwaalu, aakwiilongo moshilongo shaKaanan.

²⁰Oye endagula oshilongo noshilongo, okuza koshitunda noshitunda.

²¹Ihe Kalunga ine etha nando ogumwe, e ya hepeke; moku ya gamena okwa londodha aawa:

²²“Inamu alula aapiya yandje aahogololwa, inamu guma aahunganeki yandje.”

²³Imbileni Omuwa, uuyuni auhe! Hokololeni esiku kehe elaka etoye nokutya okwe tu hupitha.

²⁴Uvithileni iigwana esimano lye, iilonga yoonkondo okiigwana ayihe.

²⁵Omuwa oye omunene nomusimanekwa pombanda; oye omutilithi e vule ookalunga ayehe.

²⁶Iikalunga yiigwana ayihe yilwe oyo iimenka yowala, ihe Omuwa okwa shiti omagulu.

²⁷Eadhimo nesimano olye mu kunduka, oonkondo nenyanyu olyu udha otempeli ye.

²⁸Hambeleleni Omuwa, ne aantu amuhe; kombanda yevi; tangeni eadhimo noonkondo dhe.

²⁹Hambeleleni edhina lyOmuwa lyeadhimo, eteni omayambo ne mu ye motempeli ye. Isizimikeni koshipala shOmuyapuki, nge ta holoka;

³⁰evi alihe nali kakame koshipala she! Evi olya dhikika lyo itali inyenganyenga.

³¹Nyanyukweni, ne evi negulu! Hokololeleni iigwana kutya Omuwa omukwaniilwa.

³²Efuta, ndunduma, niishitwa ayihe yi li mungoye! Omalundu ligoleni, naashihe shi li mune!

³³Omiti dhomokuti otadhi ka kugilila kenyanyu, uuna Omuwa te ya, okupangela uuyuni.

³⁴Hambeleleni Omuwa, oshoka oye omwaanawa; ohole ye oyaaluhe.

³⁵Mu lombweleni mu tye: “Tu hupitha, Kalunga Omuhupithi gwetu; tu gongela pamwe, tu hupitha kiigwana, opo tu pandule nokusimaneka edhina lyoye eyapuki.”

³⁶Hambeleleni Omuwa, Kalunga kaIsrael! Mu simanekeni nena nosigo aluhe! Nena aantu ayehe oya ti: “Amen,” noya simaneke Omuwa.

³⁷Omukwaniilwa David okwa langeke Asaf nAalevi aakwawo okuninga kehe esiku elongelokalunga pehala mpoka pwa pungulwa oshikethahangano.

³⁸Obed Edom lyaJedutun naalumentu omilongo hamano nayahetatu yoludhi lwe oya li aayakuli yawo. Hosa naObed-Edom oya li miilonga yokutonatela omiyelo.

³⁹Omuyambi Sadok naayambi ooyakwawo oya li mesiloshimpwiyu lyokusimaneka Omuwa pehala lyelongelokalunga muGibeon.

⁴⁰Ongula nongulohi kehe oya li ye na okuyamba omidhidhindjambo, ye dhi lungunithile koshiyambelo, ngaashi mwa shangwa mompango ndjoka Omuwa e yi gandja kuIsrael.

⁴¹Oya li pamwe naHeman naJedutun nayalwe mboka ya li ya hogololelwa okwiimba nokuhambelela Omuwa omolwohole ye yaaluhe.

⁴²Heman naJedutun oya tonatele wo omankuma niiyaha niihikomwa yilwe mbyoka ya li hayi hikwa, uuna omahambelelondjimbo ga li taga imbwa. Ondhikwa yoludhi lwaJedutun oya li aalangeli yopiiyelo.

⁴³Nena shaa ngoka okwa yi kaandjawo naDavid okwa yi kegumbo, a kale ethimbo pamwe naangandjawo.