Read Oshindonga-Ombiimbeli Ondjapuki 2008 1 Chronicles 17 Bible Online

1 Chronicles 17 - Oshindonga-Ombiimbeli Ondjapuki 2008 bible

1 Chronicles 17

¹Omukwaniilwa David okwa kala muuwa we. Esiku limwe okwa tumu komuhunganeki Natan e ye kuye e ta ti kuye: “Ondi li megumbo lya tungika nomisedeli, ihe oshikethahangano shOmuwa osha pungulwa metsali!”

²Natan okwa yamukula a ti: “Ninga shoka wa dhiladhila, oshoka Kalunga oku ku na.”

³Ihe muusiku tuu mboka Kalunga okwa ti kuNatan:

⁴“Inda, u ka lombwele omuntu gwandje David to ti: ‘Hangoye nguka to tungile ndje otempeli, ndi kale mo.

⁵Okuza kethimbo ndiyaka nda hupitha Aaisraeli muEgipiti sigo ongashingeyi, ine kala motempeli; aluhe onda kala momatsali ga dhilukithilwa kehala nehala.

⁶Moondjenda dhandje adhihe pamwe nAaisraeli inandi pula nando ogumwe gwomaawiliki mboka nda langeke kutya omolwashike inaa tungila ndje otempeli yomisedeli.’

⁷“Ano ka lombwele omuntu gwandje David kutya ngame Omuwa Omunankondoawike ote ti kuye: ‘Onde ku kutha kuusita woonzi momalundu nonde ku ningi omuleli gwaantu yandje Aaisraeli.

⁸Onda kala nangoye shaa nkoka wa yile nonda sindi aatondi yoye ayehe mondjila yoye. Otii ke ku ninga omuntu omunene wa fa aawiliki aanenenene muuyuni.

⁹Onda hogololele aantu yandje Aaisraeli ehala moka nde ya langeke mo, moka taa kala yo itaa piyaganekwa we. Hela ye ya mevi ndika, oya matukilwa kaageyentu, ihe itashi ka ningwa we. Otandi uvaneke okusinda aatondi yoye ayehe noku ku pa oluvalo.

¹¹Nge wa si e to fumvikwa poohokulu, otandi ka kwaniileka gumwe gwomaamwoyemati nota kala e na uukwaniilwa wa kola.

¹²Oye ta ka tungila ndje otempeli notii ka sila ezimo lye oshimpwiyu, li kale koshipundi shuukwaniilwa sigo aluhe.

¹³Otii ka ninga he noye ta ningi omumwandje. Itandi ke mu thiga po, ngaashi nda ningi Saul, ngoka nde mu shundula, opo u ninge omukwaniilwa.

¹⁴Otandi mu pe uusita waantu yandje moshilongo shandje sigo aluhe. Ezimo lye itali hulu po.’ ”

¹⁵Natan okwa lombwele David ashihe shoka Kalunga e mu hololele.

¹⁶Nena omukwaniilwa David okwa yi metsalihangano, i inyongamene pevi e ta galikana ta ti: “Omuwa Omupangeliawike, inandi gwanena ashihe shoka wa ningile ndje nezimo lyandje sigo onena.

¹⁷Ihe ngashingeyi oto ningile ndje oshindji shi vule shonale; owa uvaneke omauvaneko taga popi oluvalo lwandje momimvo dhokomeho. Omuwa Kalunga, oto ningi ndje nda fa omunenentu.

¹⁸Ote vulu we okutya shike kungoye! Nando owa tseya ndje nawa, oto simaneke ndje, omuntu gwoye.

¹⁹Shika osha li ehalo lyoye nelalakano lyoye, u shi ningile ndje ngoye u ulukile ndje uunene wandje wokonakuyiwa.

²⁰Omuwa, kape na ngoka e ku fa; otwa tseya aluhe kutya ongoye awike Kalunga.

²¹Kaku na shigwana shilwe kombanda yevi sha fa Israel, shoka wa hupitha muupika, shi ninge oshigwana shoye mwene. Owe shi ningile iinima iinene niikumithi nowa taandelitha esimano lyoye nuuyuni auhe. Owa hupitha aantu yoye muEgipiti e to tidha mo iigwana yilwe mondjila yaantu yoye.

²²Owa ningi Aaisraeli aantu yoye mwene sigo aluhe, nangoye, Omuwa, wa ningi Kalunga kawo.

²³“Nongashingeyi, Omuwa Kalunga, gwanitha aluhe euvaneko we li uvanekele ndje noluvalo lwandje, u ninge shoka wa popi.

²⁴Esimano lyoye otali ningi enene, naantu otaa ka tya aluhe: ‘Omuwa Omunankondoawike oye Kalunga kaIsrael.’ Ongoye noto dhiginine ezimo lyandje sigo aluhe.

²⁵Ondi na omukumo okugalikana egalikano ndika, Kalunga kandje, oshoka wa hololele ndje ayihe mbika, ngame omuntu gwoye, nowa lombwele ndje kutya oluvalo lwandje oto ke lu ninga olukwaniilwa.

²⁶Omuwa, ongoye Kalunga nowa uvanekele ndje euvaneko ndika ekumithi.

²⁷Otandi ku galikana, u yambeke oluvalo lwandje, opo lu nyanyukilwe okukala mesilohenda lyoye. Ngoye, Omuwa, owe lu yambeke, neyambeko lyoye otali ka kala kombanda yalwo aluhe sigo aluhe.”